Business : મુકેશ અંબાણી 2025માં કમાણીમાં નંબર 1 હશે, અદાણી ત્રીજા સ્થાને...જાણો બીજા સ્થાને કોણ છે?

દેશના સૌથી ધનિક માણસોનું નામ લેવામાં આવે છે ત્યારે સૌથી પહેલું નામ મુકેશ અંબાણીનું લેવામાં આવે છે. ત્યારે વર્ષ 2025માં અત્યાર સુધી ભારતીય અબજોપતિઓમાં સૌથી વધુ કમાણી કરનાર તરીકે મુકેશ અંબાણી આગળ રહ્યા છે. રિલાયન્સ ઇન્ડસ્ટ્રીઝના શેરમાં થયેલા જોરદાર વધારાએ તેમની સંપત્તિમાં મોટો ઉછાળો લાવ્યો છે. આ વર્ષે રિલાયન્સના શેરમાં લગભગ 27 ટકાનો વધારો થયો છે, જેના કારણે મુકેશ અંબાણીની સંપત્તિમાં આશરે 15.3 બિલિયન ડોલરનો વધારો થયો છે. તેમની કુલ સંપત્તિ હવે 106 બિલિયન ડોલર સુધી પહોંચી ગઈ છે અને તેઓ 100 બિલિયન ડોલરની ક્લબમાં સામેલ થનારા એકમાત્ર ભારતીય બન્યા છે. બ્લૂમબર્ગ બિલિયોનેર્સ ઇન્ડેક્સ મુજબ તેઓ હાલ વિશ્વના ટોપના અબજોપતિઓની યાદીમાં 18મા ક્રમે છે.

પ્લેટફોર્મ્સના સંભવિત IPO

રિલાયન્સના શેરમાં આવેલી તેજી પાછળ મૂલ્ય અનલોકિંગ અંગેની અપેક્ષા, 2026માં JIO પ્લેટફોર્મ્સના સંભવિત IPO અને વિશ્લેષકોના સકારાત્મક અભિપ્રાયો મુખ્ય કારણ તરીકે માનવામાં આવે છે. આ વર્ષે અત્યાર સુધી BSE સેન્સેક્સ પર રિલાયન્સનો શેર શ્રેષ્ઠ પ્રદર્શન કરનાર સ્ટોક્સમાં સામેલ રહ્યો છે, જેના કારણે રોકાણકારોમાં વિશ્વાસ વધ્યો છે.

બીજા નંબરે લક્ષ્મી મિત્તલ

ઘણા લોકો માનતા હતા કે કમાણીની દ્રષ્ટિએ ગૌતમ અદાણી બીજા સ્થાને હશે, પરંતુ હકીકતમાં એવું નથી. બ્લૂમબર્ગના આંકડા અનુસાર 2025માં ભારતીય અબજોપતિઓમાં બીજા નંબરે લક્ષ્મી મિત્તલ આવ્યા છે. વૈશ્વિક સ્ટીલ કંપની આર્સેલર મિત્તલના માલિક લક્ષ્મી મિત્તલની સંપત્તિમાં આ વર્ષે લગભગ 11.7 બિલિયન ડોલરનો વધારો થયો છે અને તેમની કુલ સંપત્તિ હવે 31.4 બિલિયન ડોલર થઈ ગઈ છે.

ગૌતમ અદાણી 2025માં કમાણીની દ્રષ્ટિએ ત્રીજા સ્થાને

ગૌતમ અદાણી 2025માં કમાણીની દ્રષ્ટિએ ત્રીજા સ્થાને રહ્યા છે. આ કેલેન્ડર વર્ષમાં તેમની સંપત્તિમાં અંદાજે 6.52 બિલિયન ડોલરનો વધારો થયો છે અને તેમની કુલ સંપત્તિ હવે 85.2 બિલિયન ડોલર સુધી પહોંચી છે. અદાણી ગ્રુપની કેટલીક કંપનીઓ જેમ કે અદાણી પાવર, અદાણી એનર્જી સોલ્યુશન્સ અને અદાણી પોર્ટ્સના શેરમાં આ વર્ષે સારો વધારો જોવા મળ્યો છે, પરંતુ ACC, અદાણી ટોટલ ગેસ, AWL એગ્રી બિઝનેસ અને NDTV જેવી કંપનીઓના શેર ઘટ્યા હોવાથી કુલ કમાણી પર અસર પડી છે.

આ પણ વાંચો : Stock Market Updates: રૂપિયો ગગ઼ડ્યો..રોકાણકારો ચિંતામાં..ભારતીય શેરબજાર ધડામ