ક્રેડિટ કાર્ડથી ખરીદી કર્યા બાદ ઘણા લોકો તેનું પેમેન્ટ કરતી વખતે દશાંશ પછીની રકમને ધ્યાનમાં લેતા નથી. તેના કારણે બિલ ભર્યા પછી પણ તેમના ખાતામાંથી પૈસા કપાઈ શકે છે. ખાસ ધ્યાન આપવા જેવી વાત એ છે કે 1 રૂપિયાથી પણ ઓછી બાકી રકમ માટે તેમને મોટી લેટ ફી ચૂકવવી પડી શકે છે. ચાલો આ વિશે સમજીએ.
ક્રેડિટ કાર્ડનું બિલ ભરવામાં નાની ભૂલ પડી શકે છે ભારે
ક્રેડિટ કાર્ડ અથવા કોઈપણ પ્રકારની લોનનો હપ્તો ભરતી વખતે થોડી બેદરકારી તમારું બજેટ બગાડી શકે છે. ઘણા લોકો બિલ ભરતી વખતે દશાંશ પછીની રકમ છોડી દે છે. ઉદાહરણ તરીકે, જો તમારું કુલ બિલ 12,000.39 રૂપિયા છે, તો ઘણા લોકો માત્ર 12,000 રૂપિયા જ ભરે છે અને માને છે કે આખું બિલ ચૂકવાઈ ગયું છે. પરંતુ આ નાની ભૂલના કારણે મોટી પેનલ્ટી અને વધારાનું વ્યાજ ચૂકવવું પડી શકે છે.
બાકી રકમ પર લાગી શકે છે મોટું વ્યાજ
બેંક અથવા નાણાકીય સંસ્થા તમારા દ્વારા બાકી રાખવામાં આવેલી થોડી રકમને પણ અધૂરું પેમેન્ટ માને છે. તમે 99 ટકાથી વધુ રકમ ચૂકવી હોય તો પણ સિસ્ટમમાં તમારું બિલ બાકી દેખાઈ શકે છે. આવી સ્થિતિમાં ક્રેડિટ કાર્ડનો વ્યાજમુક્ત સમયગાળો સમાપ્ત થઈ શકે છે અને બેંક બાકી રહેલી 39 પૈસાની રકમને બદલે આખા 12,000 રૂપિયા પર વ્યાજ વસૂલવાનું શરૂ કરી શકે છે.
લેટ ફી અને પેનલ્ટીનો ખતરો
દશાંશ પછીની રકમ ચૂકવવામાં ન આવે તો બેંક તેને ઓવરડ્યૂ તરીકે ગણી શકે છે. ત્યારબાદ આવતા મહિનાના બિલમાં માત્ર વ્યાજ જ નહીં, પરંતુ લેટ પેમેન્ટ પેનલ્ટી પણ લાગી શકે છે. આ રીતે માત્ર 39 પૈસા બાકી રાખવાના કારણે તમારે સૈંકડો કે હજારો રૂપિયાની વધારાની રકમ ચૂકવવી પડી શકે છે. તેની સીધી અસર તમારા ખિસ્સા પર પડે છે.
CIBIL સ્કોર પર પણ થઈ શકે છે અસર
બિલની સંપૂર્ણ રકમ ચૂકવાઈ ન હોવાની માહિતી બેંક ક્રેડિટ બ્યુરો એટલે કે CIBILને આપી શકે છે. તમારી ક્રેડિટ રિપોર્ટમાં ખાતું ‘પાર્ટિશિયલી પેઇડ’ અથવા ‘ડિફોલ્ટ’ તરીકે નોંધાઈ શકે છે. આના કારણે તમારો ક્રેડિટ સ્કોર ખરાબ થઈ શકે છે અને ભવિષ્યમાં નવી લોન અથવા ક્રેડિટ કાર્ડ મેળવવામાં મુશ્કેલી પડી શકે છે.
પેમેન્ટ કરતી વખતે આ વાતોનું ધ્યાન રાખો
ક્રેડિટ કાર્ડ અથવા લોનનું બિલ ભરતી વખતે હંમેશા ‘ટોટલ અમાઉન્ટ ડ્યૂ’ એટલે કે કુલ ચૂકવવાની રકમ જ પસંદ કરો. જો કોઈ એપમાં દશાંશ પછીના આંકડા લખવામાં મુશ્કેલી પડતી હોય તો 1 કે 2 રૂપિયા વધારે ચૂકવી દો. વધારાની ચૂકવેલી રકમ તમારા આગામી બિલમાં આપમેળે એડજસ્ટ થઈ જાય છે અને તમે વધારાના ચાર્જથી બચી શકો છો.
