જો તમારું પણ જૂની કંપનીમાં પીએફ (PF)નું નાણું ફસાયેલું છે અથવા પીએફ સંબંધિત કામ માટે વારંવાર ઈપીએફઓ (EPFO) કચેરીના ધક્કા ખાવા પડે છે, તો તમારા માટે સારા સમાચાર છે. 1 નવેમ્બર, 2026ના રોજ ઈપીએફઓ પોતાનો 74મો સ્થાપના દિવસ ઉજવી રહ્યું છે. આ પ્રસંગે કેન્દ્રીય મંત્રી ડૉ. મનસુખ માંડવિયાએ નોકરી કરતા કરોડો કર્મચારીઓ માટે બે નવી ડિજિટલ સુવિધાઓ શરૂ કરવાની જાહેરાત કરી છે.
આ નવી સુવિધાઓથી પીએફ સંબંધિત સેવાઓ મેળવવી વધુ સરળ બનશે. હવે કર્મચારીઓ વોટ્સએપ દ્વારા પીએફ બેલેન્સ, પાસબુક અને અન્ય જરૂરી વિગતો મેળવી શકશે. આ ઉપરાંત, લાંબા સમયથી નિષ્ક્રિય પડેલા અને 1,000 રૂપિયા સુધીની રકમ ધરાવતા પીએફ ખાતાંનું ઓટોમેટિક સેટલમેન્ટ પણ કરવામાં આવશે.
હવે વોટ્સએપ પર મળશે EPFOની સેવાઓ
અત્યાર સુધી પીએફ સંબંધિત ઘણી સેવાઓ મેળવવા માટે કર્મચારીઓએ ઈપીએફઓની કચેરી અથવા ઉમંગ (UMANG) એપનો ઉપયોગ કરવો પડતો હતો. પરંતુ નવી સુવિધા શરૂ થયા બાદ આ પ્રક્રિયા વધુ સરળ બનશે. કર્મચારીઓ સીધા વોટ્સએપ દ્વારા ઈપીએફઓની વિવિધ સેવાઓનો લાભ લઈ શકશે.
આ સુવિધા હેઠળ કર્મચારીઓ વોટ્સએપ પર 'Hi' લખીને પોતાનું પીએફ બેલેન્સ ચેક કરી શકશે. એટલું જ નહીં, તેઓ પોતાની ઈપીએફ પાસબુક પણ ડાઉનલોડ કરી શકશે. આ ઉપરાંત, યુનિવર્સલ એકાઉન્ટ નંબર (UAN) સક્રિય છે કે નહીં તેની માહિતી અને ઈ-કેવાયસી (e-KYC)નું સ્ટેટસ પણ જાણી શકશે.
જો કોઈ કર્મચારીએ પીએફ ઉપાડવા માટે ક્લેમ કર્યો હોય, તો તે પોતાના ક્લેમનું સ્ટેટસ પણ વોટ્સએપ દ્વારા ચેક કરી શકશે. જોકે, આ સુવિધાનો લાભ લેવા માટે કર્મચારીનો મોબાઇલ નંબર તેના યુએએન સાથે લિંક હોવો જરૂરી છે. ઈપીએફઓ દ્વારા ટૂંક સમયમાં આ સેવા માટે સત્તાવાર વોટ્સએપ નંબર જાહેર કરવામાં આવશે.
₹1,000 સુધીની રકમ ધરાવતા જૂના PF ખાતાંનું ઓટો સેટલમેન્ટ
ઈપીએફઓની બીજી નવી સુવિધા એવા કર્મચારીઓ માટે મોટી રાહત લઈને આવી છે, જેમનાં જૂનાં પીએફ ખાતાંમાં નાની રકમ જમા છે, પરંતુ લાંબા સમયથી તે ખાતાં નિષ્ક્રિય પડ્યાં છે.
ઘણા કર્મચારીઓ નોકરી બદલ્યા પછી જૂની કંપનીનાં પીએફ ખાતાંમાં 500થી 1,000 રૂપિયા જેવી નાની રકમ છોડી દે છે. આ રકમ મેળવવા માટે ક્લેમ કરવાની પ્રક્રિયા લાંબી લાગતી હોવાથી ઘણા લોકો તેના પર ધ્યાન આપતા નથી. હવે ઈપીએફઓ આવા પાત્ર નિષ્ક્રિય ખાતાંનું ઓટોમેટિક સેટલમેન્ટ કરશે.
આ પ્રક્રિયા હેઠળ પાત્ર ખાતાંમાં જમા રહેલી રકમ કર્મચારીના લિંક કરેલા બેંક ખાતામાં અથવા હાલના સક્રિય પીએફ ખાતામાં ટ્રાન્સફર કરવામાં આવશે. એટલે કે, કર્મચારીઓને આ નાની રકમ મેળવવા માટે અલગથી ક્લેમ કરવાની જરૂર નહીં પડે.
કર્મચારીઓને શું થશે ફાયદો?
ઈપીએફઓ દ્વારા શરૂ કરવામાં આવેલી આ બંને સુવિધાઓનો મુખ્ય ઉદ્દેશ કર્મચારીઓને સરળ અને ઝડપી ડિજિટલ સેવાઓ પૂરી પાડવાનો છે. ખાસ કરીને નોકરી બદલનારા કર્મચારીઓ માટે જૂનાં પીએફ ખાતાંની રકમ મેળવવી સરળ બનશે.
વોટ્સએપ દ્વારા બેલેન્સ ચેક કરવું, પાસબુક ડાઉનલોડ કરવી અને ક્લેમનું સ્ટેટસ જાણવું જેવી સુવિધાઓથી સમયની બચત થશે. બીજી તરફ, નિષ્ક્રિય ખાતાંમાં પડેલી નાની રકમનું ઓટોમેટિક સેટલમેન્ટ થવાથી કર્મચારીઓને તેમના પૈસા મેળવવામાં સરળતા રહેશે.
આ નવી પહેલથી પીએફ સંબંધિત સેવાઓ વધુ સુલભ બનશે અને કર્મચારીઓને ઈપીએફઓની કચેરીના વારંવાર ધક્કા ખાવાની જરૂરિયાત પણ ઘટશે. જોકે, વોટ્સએપ સેવા માટે સત્તાવાર નંબર જાહેર થયા બાદ જ કર્મચારીઓ તેનો ઉપયોગ કરી શકશે. ત્યાં સુધી કોઈ અજાણ્યા નંબર પર પીએફની વ્યક્તિગત માહિતી કે ઓટીપી શેર કરવાનું ટાળવું જોઈએ.
