ભારતના કરોડો પગારદાર કર્મચારીઓ માટે 'કર્મચારી ભવિષ્ય નિધિ' (EPFO) એ નિવૃત્તિ પછીની આર્થિક સુરક્ષાનું સૌથી મોટું સાધન છે. છેલ્લા કેટલાક સમયથી સોશિયલ મીડિયા અને વિવિધ મીડિયા પ્લેટફોર્મ પર એવી ચર્ચાઓ જોર પકડી રહી હતી કે સરકાર PF પરના વ્યાજ દરોમાં મોટો ઉછાળો લાવીને તેને 10% કરી શકે છે. જોકે, હવે આ મામલે કેન્દ્ર સરકારે સંસદમાં સ્થિતિ સ્પષ્ટ કરી દીધી છે.
વ્યાજ દર અંગે સરકારની સ્પષ્ટતા
તાજેતરમાં સંસદમાં રજૂ કરવામાં આવેલા એક લેખિત નિવેદનમાં સરકારે સ્પષ્ટ કર્યું છે કે, હાલમાં PF પરના વ્યાજ દર વધારીને 10% કરવાની કોઈ દરખાસ્ત વિચારણા હેઠળ નથી. સરકારના જણાવ્યા અનુસાર, EPFO ના વ્યાજ દરો 'સેન્ટ્રલ બોર્ડ ઓફ ટ્રસ્ટી' (CBT) દ્વારા નક્કી કરવામાં આવે છે. સરકારે ઉમેર્યું હતું કે, અન્ય સરકારી બચત યોજનાઓની સરખામણીમાં EPF પર મળતું વ્યાજ હજુ પણ ઘણું આકર્ષક અને સુરક્ષિત છે. આ સ્પષ્ટતા બાદ 10% વ્યાજ મળવાની આશા રાખતા લાખો કર્મચારીઓમાં અફવાઓનો અંત આવ્યો છે.
વર્તમાન વ્યાજ દરોની સ્થિતિ
નાણાકીય વર્ષ 2023-24 માટે સરકાર દ્વારા EPF વ્યાજ દર 8.25% નક્કી કરવામાં આવ્યો છે. જો આપણે છેલ્લા ત્રણ વર્ષના આંકડા જોઈએ તો આ દરમાં મામૂલી સુધારો જોવા મળ્યો છે. વર્ષ 2022-23 માં આ દર 8.15% અને 2021-22 માં 8.10% હતો. જોકે, 2020-21 માં તે 8.50% ના ઉચ્ચ સ્તરે હતો. હાલનો 8.25% નો દર રોકાણકારો માટે સ્થિર અને સારો વળતર આપનારો ગણાય છે.
નવી સુવિધા: 'પાસબુક લાઇટ' દ્વારા બેલેન્સ ચેક કરો
EPFO એ તેના સભ્યો માટે ટેકનોલોજીના ઉપયોગને વધુ સરળ બનાવ્યો છે. હવે સભ્યો 'પાસબુક લાઇટ'નામની નવી સુવિધા દ્વારા સરળતાથી પોતાનું બેલેન્સ અને યોગદાન ચેક કરી શકે છે. તેની રીત નીચે મુજબ છે:
સૌ પ્રથમ EPFO ની સત્તાવાર વેબસાઈટ પર જઈને તમારા UAN અને પાસવર્ડ દ્વારા લોગ-ઈન કરો.
હોમ પેજ પર ડાબી બાજુએ આપેલા 'View' ટેબ પર ક્લિક કરો.
ડ્રોપ-ડાઉન મેનૂમાંથી 'Passbook Lite' પસંદ કરો.
અહીં તમે તમારા છેલ્લા પાંચ યોગદાનનો સારાંશ જોઈ શકશો.
જો તમારે સંપૂર્ણ પાસબુક જોવી હોય, તો તમારા મેમ્બર આઈડી (Member ID) પર ક્લિક કરીને 'View Passbook' પસંદ કરો.
આ પણ વાંચોઃ Petrol Price Hike: ડીઝલ 520 અને પેટ્રોલ 458 રૂપિયા પ્રતિ લિટર, આ દેશમાં ઇંધણના ભાવ આસમાને
