ઘર ખરીદવા માટે હોમ લોન લેવાનું વિચારી રહેલા લોકો માટે સપ્ટેમ્બરમાં ઘણી બેંકો અને હાઉસિંગ ફાઇનાન્સ કંપનીઓના શરૂઆતના વ્યાજ દર 7%ની આસપાસ છે. જોકે, ગ્રાહકને મળતો વાસ્તવિક વ્યાજ દર તેની પ્રોફાઇલ અને લોનની શરતો પર આધાર રાખશે. જાણો કઈ બેંક કયા વ્યાજ દરે હોમ લોન આપી રહી છે.
18 સપ્ટેમ્બર 2026ના ઉપલબ્ધ આંકડા અનુસાર, બેંક ઓફ મહારાષ્ટ્ર અને સેન્ટ્રલ બેંક ઓફ ઇન્ડિયામાં હોમ લોનનો શરૂઆતનો વ્યાજ દર 7% છે. જ્યારે બેંક ઓફ ઇન્ડિયામાં તે 7.10% છે. ઇન્ડિયન બેંક, UCO બેંક અને યુનિયન બેંક ઓફ ઇન્ડિયામાં વ્યાજ દર 7.15%થી શરૂ થાય છે.
બેંક ઓફ બરોડાનો શરૂઆતનો વ્યાજ દર 7.20% અને સ્ટેટ બેંક ઓફ ઇન્ડિયાનો 7.25% છે. કેનરા બેંકમાં લોનની રકમ પ્રમાણે શરૂઆતનો વ્યાજ દર 7.15%થી 7.25% વચ્ચે છે.
ખાનગી બેંકોમાં કેટલો છે વ્યાજ દર?
ખાનગી ક્ષેત્રમાં સાઉથ ઇન્ડિયન બેંકનો શરૂઆતનો વ્યાજ દર 7.25% છે. HSBC બેંકમાં તે 7.45%, ICICI બેંકમાં 7.55%, કોટક મહિન્દ્રા બેંકમાં 7.60% અને HDFC બેંકમાં 7.75%થી શરૂ થાય છે. જ્યારે Axis બેંકનો હોમ લોન વ્યાજ દર 8%થી શરૂ થાય છે. ગ્રાહકની પાત્રતા પ્રમાણે આ દરોમાં ફેરફાર થઈ શકે છે.
હાઉસિંગ ફાઇનાન્સ કંપનીઓમાં પણ 7%થી ઉપરના વિકલ્પ
હાઉસિંગ ફાઇનાન્સ કંપનીઓમાં LIC Housing Financeનો શરૂઆતનો વ્યાજ દર 7.15% છે. Bajaj Housing Finance 7.25%, ICICI Home Finance 7.50% અને Godrej Housing Finance 7.65%થી હોમ લોન આપી રહ્યા છે. PNB Housing Financeનો શરૂઆતનો વ્યાજ દર લોનની રકમ પ્રમાણે 7.50%થી છે.
લોનની રકમ પ્રમાણે પણ વ્યાજ દર બદલાઈ શકે છે
દરેક બેંક તમામ લોનની રકમ પર એકસરખો વ્યાજ દર રાખતી નથી. ઉદાહરણ તરીકે, કેનરા બેંકમાં 30 લાખ રૂપિયા સુધીની લોન પર શરૂઆતનો વ્યાજ દર 7.25% છે, જ્યારે 30થી 75 લાખ રૂપિયા સુધીની લોન માટે 7.20% અને 75 લાખ રૂપિયાથી વધુની લોન માટે 7.15%થી શરૂઆત થાય છે.
માત્ર શરૂઆતના વ્યાજ દરને જોઈને નિર્ણય ન લો
બેંક દ્વારા જણાવવામાં આવતો સૌથી ઓછો વ્યાજ દર દરેક ગ્રાહકને મળે તે જરૂરી નથી. ક્રેડિટ સ્કોર, આવક, નોકરીની પ્રોફાઇલ, લોન-ટુ-વેલ્યુ રેશિયો અને પ્રોપર્ટીની માહિતીના આધારે અંતિમ વ્યાજ દર નક્કી થઈ શકે છે. તેથી હોમ લોન લેતી વખતે માત્ર શરૂઆતના વ્યાજ દરને નહીં, પરંતુ પ્રોસેસિંગ ફી, અન્ય ચાર્જ અને સમગ્ર લોનના સમયગાળા દરમિયાન ચૂકવવાના કુલ વ્યાજને પણ ધ્યાનમાં લેવું જરૂરી છે.
