કમાણી અને રોકાણ કરવા છતાં મોટાભાગના ભારતીય પરિવારો ઇમર્જન્સીના ખર્ચ માટે સંપૂર્ણ રીતે તૈયાર નથી. એક સર્વે રિપોર્ટ મુજબ, 46% લોકો પાસે 3 મહિનાનો ખર્ચ ચલાવવા જેટલું ઇમર્જન્સી ફંડ નથી. બીજી તરફ, 60% લોકોના સમગ્ર પરિવાર પાસે 25 લાખ રૂપિયાથી ઓછું હેલ્થ ઇન્શ્યોરન્સ કવર છે.
ફિનોઇવેટ ફાઇનાન્શિયલ સર્વિસિસના આ રિપોર્ટમાં બચત, દેવું, ટેક્સ પ્લાનિંગ, રોકાણ અને પરિવારની સુરક્ષા જેવા ઘણા મુદ્દાઓની તપાસ કરવામાં આવી છે.
ઇમર્જન્સી ફંડ એવી રકમ છે, જે નોકરી જતી રહે, અચાનક સારવારનો ખર્ચ આવે અથવા પરિવારની કોઈ જરૂરી જરૂરિયાત ઊભી થાય ત્યારે ઉપયોગમાં લઈ શકાય છે. સર્વેમાં 46% લોકોએ જણાવ્યું કે તેમની પાસે 3 મહિનાના ખર્ચ જેટલી રકમ નથી અથવા તેમની પાસે કોઈ ઇમર્જન્સી ફંડ જ નથી.
આવી સ્થિતિમાં જો અચાનક આવક બંધ થઈ જાય અથવા મોટો ખર્ચ આવી પડે, તો ઘરનાં બજેટ પર દબાણ વધી શકે છે. ઇમર્જન્સી ફંડ માટે કેટલી રકમ જરૂરી છે તે દરેક પરિવાર માટે અલગ હોઈ શકે છે. તે તમારી આવક, EMI, પરિવારની જવાબદારી અને નોકરીની સ્થિતિ પર આધાર રાખે છે.
હેલ્થ ઇન્શ્યોરન્સ અંગે પણ રિપોર્ટમાં મોટો ગેપ સામે આવ્યો છે. સર્વે મુજબ, 60% લોકોના સમગ્ર પરિવારનું હેલ્થ ઇન્શ્યોરન્સ કવર 25 લાખ રૂપિયાથી ઓછું છે.
આજના સમયમાં હોસ્પિટલનો ખર્ચ ઝડપથી વધી રહ્યો છે. આવી સ્થિતિમાં માત્ર હેલ્થ ઇન્શ્યોરન્સ હોવું જ પૂરતું નથી, પરંતુ તમારી પોલિસી મોટા સારવાર ખર્ચને કવર કરવા માટે પૂરતી છે કે નહીં તે પણ જોવું જરૂરી છે.
સર્વે મુજબ, લગભગ 43% લોકો પાસે કંપની તરફથી મળતું અને પોતે લીધેલું, બંને પ્રકારનું હેલ્થ ઇન્શ્યોરન્સ છે. બીજી તરફ, 14% લોકો માત્ર પોતાની કંપનીના હેલ્થ કવર પર નિર્ભર છે. આ ઉપરાંત, 14% લોકોએ જણાવ્યું કે તેમની પાસે કોઈ હેલ્થ ઇન્શ્યોરન્સ નથી.
કંપનીની પોલિસી નોકરી સાથે જોડાયેલી હોય છે. નોકરી બદલ્યા પછી અથવા નિવૃત્તિ બાદ આ કવર ચાલુ રહે તે જરૂરી નથી. તેથી પોતાની જરૂરિયાત મુજબ અલગ હેલ્થ ઇન્શ્યોરન્સ રાખવો જરૂરી છે.
મીડિયા રિપોર્ટ મુજબ, ભારતમાં સ્વાસ્થ્યને લગતી મોંઘવારી લગભગ 11થી 14% રહેવાનો અંદાજ છે, જ્યારે સામાન્ય મોંઘવારી 6થી 7%ની આસપાસ હોવાનું જણાવાયું છે.
એનો અર્થ એ છે કે આજે જે હેલ્થ કવર પૂરતું લાગે છે, તે આવનારા વર્ષોમાં ઓછું પડી શકે છે.
રિપોર્ટમાં લોકોની દેવાની સ્થિતિ પણ સામે આવી છે. સર્વેમાં 57% લોકોએ જણાવ્યું કે તેમના પર કોઈ ને કોઈ પ્રકારની EMI ચાલી રહી છે.
આમાંથી 21% લોકો પોતાની આવકનો 20થી 40% હિસ્સો EMIમાં ખર્ચે છે, જ્યારે 9% લોકોની આવકનો 40%થી વધુ હિસ્સો EMIમાં જતો રહે છે.