આઇફોનની ખરીદી ભારતમાં શરૂ થઇ ગઇ છે અને લોકોનો આઇફોન પ્રત્યેનો ક્રેઝ પણ ચોંકાવનારી રીતે સામે આવી રહ્યો છે. એક વ્યક્તિએ તેની પત્નીને iPhone 18 Pro અપાવવા માટે પરિવારનું વારસામાં મળેલું સોનું વેચી દીધું તેવો દાવો સોશિયલ મીડિયા પર વાયરલ થઈ રહ્યો છે. આ મામલે ભારતીય ઉદ્યોગપતિ હર્ષ ગોએન્કાએ વીડિયો શેર કર્યો છે. 

જ્યારથી iPhone 18 Pro Max લોન્ચ થયો છે ત્યારથી લોકોમાં તેને લઈને ભારે ઉત્સાહ જોવા મળી રહ્યો છે. 18 સપ્ટેમ્બરથી iPhone 18 Proની ખરીદી માટે એપલના સ્ટોર પર સવારથી જ લાંબી કતારો જોવા મળી રહી છે. આ દરમિયાન સોશિયલ મીડિયા પર એક વીડિયો વાયરલ થયો છે, જેના કારણે આ ફોનને લઈને ચર્ચા શરૂ થઈ છે.

વ્યક્તિએ સોનું વેચીને પત્ની માટે ફોન ખરીદ્યો

દિલ્હીના એક યુવકનો વીડિયો સોશિયલ મીડિયા પર સામે આવ્યો છે. જેમાં તેણે દાવો કર્યો છે કે તેણે પોતાની પત્ની માટે નવો iPhone 19 Pro Max ખરીદ્યો છે. રસપ્રદ વાત એ છે કે તેણે આ ફોન પરિવાર પાસેથી મળેલી જૂની સોનાની વસ્તુઓ વેચીને ખરીદ્યો હોવાનો દાવો કર્યો છે.

વ્યક્તિનું કહેવું છે કે આ સોનું તેને પરિવારની અગાઉની પેઢીઓ પાસેથી વારસામાં મળ્યું હતું. તેણે પોતાના પૂર્વજોએ આપેલા સોનામાંથી થોડું સોનું વેચીને પત્ની માટે ફોન ખરીદવાનો નિર્ણય લીધો હોવાનો દાવો કર્યો છે.

હર્ષ ગોએન્કાએ વીડિયો શેર કર્યો

દેશના જાણીતા ઉદ્યોગપતિ હર્ષ ગોએન્કાએ આ વીડિયો સોશિયલ મીડિયા પ્લેટફોર્મ પર શેર કર્યો હતો. હર્ષ ગોએન્કાએ વીડિયો પર પોતાનો અભિપ્રાય આપતાં જણાવ્યું કે કેટલાક લોકો ઘર ખરીદવા માટે પોતાનું સોનું વેચે છે, જ્યારે કેટલાક લોકો પોતાના બાળકોનું ભવિષ્ય બનાવવા માટે આવું કરે છે.

જોકે, આ વ્યક્તિએ પોતાની પત્નીને ફોન અપાવવા માટે પરિવાર પાસેથી વારસામાં મળેલું સોનું વેચવું યોગ્ય માન્યું.

https://twitter.com/hvgoenka/status/2100997058979414343

ગોએન્કાની પોસ્ટ બાદ સોશિયલ મીડિયા પર ચર્ચા શરૂ થઈ ગઈ. કેટલાક લોકોનું કહેવું હતું કે તેણે પ્રેમમાં આવીને આ પગલું ભર્યું, જ્યારે અન્ય લોકોએ કહ્યું કે આટલા મોંઘા ફોન માટે પોતાનું વારસામાં મળેલું સોનું વેચવું યોગ્ય નથી.

કેટલાક લોકોએ એવું પણ કહ્યું કે જો કોઈ મોંઘી વસ્તુ ખરીદવી હોય તો તે પહેલાં પોતાની આર્થિક સ્થિતિને ધ્યાનમાં રાખીને નિર્ણય લેવો જોઈએ.

iPhone 18 Proની કિંમત કેટલી છે?

એપલના જણાવ્યા અનુસાર ભારતમાં iPhone 18 Proની શરૂઆતની કિંમત ₹1,64,900 છે, જ્યારે iPhone 18 Pro Maxની કિંમત ₹1,79,900 રાખવામાં આવી છે.

નવા પ્રો મોડલમાં 48MP ફ્યુઝન મેઈન કેમેરા, ઓછા પ્રકાશમાં વધુ સારી ફોટો અને વીડિયો ક્ષમતા ઉપરાંત લાંબી બેટરી લાઇફ જેવા ફીચર્સ આપવામાં આવ્યા છે.