Make in India: આ સમયે સમગ્ર વિશ્વ યુદ્ધની સમસ્યાઓ અને આર્થિક મંદી જેવા પડકારોનો સામનો કરી રહ્યું છે. આવા મુશ્કેલ વૈશ્વિક માહોલ વચ્ચે ભારતીય અર્થતંત્રએ મજબૂત પ્રદર્શન કર્યું છે. નાણાકીય વર્ષ 2026-27ના પ્રથમ ત્રિમાસિક ગાળામાં ભારતનો GDP ગ્રોથ 7.8 ટકા નોંધાયો છે. એક તરફ દુનિયા અનેક સંકટોમાંથી પસાર થઈ રહી છે, જ્યારે બીજી તરફ ભારતમાં પણ કેટલાક લોકો નિરાશાનું વાતાવરણ ઊભું કરવાનો પ્રયાસ કરી રહ્યા છે. જોકે, આ તમામ પડકારો વચ્ચે ભારતે વિકાસની ગતિ જાળવી રાખી છે. સામાન્ય લોકોની ભાગીદારી અને મહેનતને પણ આ વૃદ્ધિ પાછળનું મહત્વનું કારણ માનવામાં આવી રહ્યું છે.
નિરાશા ફેલાવનારાઓને વિકાસથી જવાબ
સરકારે આ આર્થિક સફળતાનો શ્રેય દેશના લોકોની સંકલ્પશક્તિને આપ્યો છે. સરકારનું કહેવું છે કે કેટલાક લોકો ‘જૂઠની ગૂંજ’ના માધ્યમથી નિરાશા ફેલાવવાનો પ્રયાસ કરી રહ્યા છે. તેમ છતાં 140 કરોડ ભારતીયોની એકતા દેશને સતત આગળ લઈ જઈ રહી છે. વર્ષ 2020માં કોરોના મહામારી બાદથી વિશ્વમાં સ્થિરતા જોવા મળી નથી. અનેક વૈશ્વિક પડકારો વચ્ચે પણ ભારત સતત આગળ વધી રહ્યું છે. આર્થિક મજબૂતી પાછળ દેશની સામૂહિક શક્તિ અને લોકોની મહેનત મહત્વની રહી છે.
https://www.instagram.com/reel/Dcusqf4J5Nc/?utm_source=ig_embed&ig_rid=AMAjH4jtZR025U96SuocI6I
સ્વદેશી પર ભાર
ભારતના વિકાસની આ ગતિને લાંબા સમય સુધી જાળવી રાખવા માટે આત્મનિર્ભર બનવું જરૂરી છે. સરકાર તરફથી લોકોને ‘વોકલ ફોર લોકલ’ અને ‘મેક ઇન ઈન્ડિયા’ને વધુ પ્રોત્સાહન આપવાની અપીલ કરવામાં આવી છે. આ સાથે કેટલાક ખાસ સૂચનો પણ આપવામાં આવ્યા છે. બિનજરૂરી વિદેશ પ્રવાસ ટાળવા અને વિદેશમાં ડેસ્ટિનેશન વેડિંગ કરવાથી બચવાની સલાહ આપવામાં આવી છે. જો ખૂબ જરૂરી ન હોય તો સોનું ખરીદવાનું પણ ટાળવા કહેવામાં આવ્યું છે. સ્વદેશી વસ્તુઓ અને સેવાઓ પર વધુ ભાર મૂકવાથી આઝાદીના 100મા વર્ષ સુધી યુવાનો માટે વિકસિત ભારતનું નિર્માણ કરી શકાશે.
મેન્યુફેક્ચરિંગ સેક્ટરમાં પણ જોરદાર વૃદ્ધિ
અમેરિકાના નોર્થ કેરોલિનાથી નાણામંત્રી નિર્મલા સીતારમણે પણ GDPના આ આંકડા પર ખુશી વ્યક્ત કરી છે. તેમણે કહ્યું કે આ માત્ર એક આંકડો નથી, પરંતુ દેશના વિવિધ ક્ષેત્રોમાં વૃદ્ધિ થઈ રહી છે. મેન્યુફેક્ચરિંગ સેક્ટરે 9.2 ટકાની નોંધપાત્ર વૃદ્ધિ નોંધાવી છે. વૈશ્વિક પડકારો વચ્ચે પણ જો ભારતીય અર્થતંત્ર 7.8 ટકાની ઝડપે આગળ વધી રહ્યું છે, તો તેમાં ભારતીયોની મહેનતનો મોટો ફાળો છે.
જૂના કાયદા દૂર થતાં વધ્યો વિશ્વાસ
ભારતની આ આર્થિક વૃદ્ધિમાં રાજ્યોની ભૂમિકા પણ મહત્વપૂર્ણ રહી છે. વેપાર અને ઉદ્યોગ માટેનું વાતાવરણ સરળ બનાવવા સરકારે નાગરિકો અને વ્યવસાયો પરના કમ્પ્લાયન્સના બોજને ઘટાડવાના પ્રયાસો કર્યા છે. આશરે એક હજાર જૂના કાયદા દૂર કરવામાં આવ્યા છે, જ્યારે 40 હજારથી વધુ નિયમોને સરળ બનાવવામાં આવ્યા છે. સરકાર અને ઉદ્યોગ જગત વચ્ચે સતત ચર્ચા ચાલી રહી છે. આ ઉપરાંત વિવિધ દેશો સાથે દ્વિપક્ષીય વેપાર કરારો પણ કરવામાં આવી રહ્યા છે. ભારતમાં વિદેશી રોકાણ અને NRI દ્વારા મોકલવામાં આવતી રકમમાં પણ સતત વધારો થઈ રહ્યો છે. ભારતીય બેન્કોમાં આવી રહેલા નાણાં એ સંકેત આપે છે કે લોકોનો દેશની બેન્કિંગ સિસ્ટમ પરનો વિશ્વાસ વધુ મજબૂત બન્યો છે.
આ પણ વાંચો: Gold Silver Price Today: સોનું ન ખરીદવાની PM મોદીની ફરી અપીલ, જાણો 10 ગ્રામ સોનાનો ભાવમાં શું આવ્યો ફેરફાર
