આ વર્ષે, 1 ફેબ્રુઆરી, 2026 ના રોજ, કેન્દ્રીય બજેટ રજૂ થવાના દિવસે રવિવાર હોવા છતાં NSE અને BSE પર ટ્રેડિંગ કરવામાં આવશે. કેન્દ્રીય નાણાં પ્રધાન નિર્મલા સીતારમણ તે દિવસે નાણાકીય વર્ષ 2026-27 માટે કેન્દ્રીય બજેટ રજૂ કરશે.
રવિવારના રોજ ટ્રેડિંગ
નેશનલ સ્ટોક એક્સચેન્જ (NSE) એ એક પરિપત્રમાં રોકાણકારોને માહિતી આપી હતી કે બજેટને ધ્યાનમાં રાખીને લાઇવ ટ્રેડિંગ સત્રો સામાન્ય સમય મુજબ હાથ ધરવામાં આવશે. પ્રી-ઓપન માર્કેટ: સવારે 9:00 થી 9:08 વાગ્યા સુધી. સામાન્ય ટ્રેડિંગ: સવારે 9:15 થી 3:30 વાગ્યા સુધી. તેવી જ રીતે BSE એ 1 ફેબ્રુઆરીને 'ખાસ ટ્રેડિંગ દિવસ' તરીકે જાહેર કર્યો છે અને જણાવ્યું છે કે બજારો નિયમિત ટ્રેડિંગ કલાકો માટે ખુલ્લા રહેશે. બજેટના દિવસે બજાર ખુલવાથી રોકાણકારોને નીતિ જાહેરાતો પર તાત્કાલિક પ્રતિક્રિયા આપવાની તક મળશે.
બજેટ 1 ફેબ્રુઆરી રવિવારે જ થશે રજૂ
કેન્દ્ર સરકારે સ્પષ્ટતા કરી છે કે કેન્દ્રીય બજેટ 2026 1 ફેબ્રુઆરીના રોજ નિર્ધારિત સમય મુજબ રજૂ કરવામાં આવશે. રવિવાર હોવા છતાં બજેટની તારીખમાં કોઈ ફેરફાર કરવામાં આવ્યો નથી. આ અંગેની બધી અટકળો પર હવે વિરામ લાગી ગયો છે. તાજેતરમાં મળેલી કેબિનેટ કમિટી ઓન પાર્લામેન્ટરી અફેર્સ (CCPA) ની બેઠકમાં બજેટ સત્ર સંબંધિત તમામ મુખ્ય તારીખોને મંજૂરી આપવામાં આવી હતી. સરકારના પ્રસ્તાવિત સમયપત્રક મુજબ:
28 જાન્યુઆરી: સંસદના સંયુક્ત સત્રમાં રાષ્ટ્રપતિનું સંબોધન
29 જાન્યુઆરી: સંસદમાં આર્થિક સર્વે રજૂ કરવામાં આવશે
1 ફેબ્રુઆરી (રવિવાર): નાણામંત્રી કેન્દ્રીય બજેટ 2026 રજૂ કરશે
નવમું બજેટ રજૂ કરશે નિર્મલા સીતારમણ
નાણામંત્રી નિર્મલા સીતારમણ આ પ્રસંગે તેમનું નવમું બજેટ રજૂ કરે તેવી અપેક્ષા છે. તેમણે અત્યાર સુધીમાં બે વચગાળાના અને છ પૂર્ણ બજેટ રજૂ કર્યા છે. આ બજેટ સાથે તેઓ પ્રણવ મુખર્જીના રેકોર્ડને પાછળ છોડી દેશે અને પી. ચિદમ્બરમના નવ વખત બજેટ રજૂ કરવાના રેકોર્ડની બરાબરી કરશે. એ પણ નોંધનીય છે કે ઘણા વર્ષોમાં પહેલી વાર, બજેટ રવિવારે રજૂ કરવામાં આવશે, જે તેને રાજકીય અને આર્થિક બંને દ્રષ્ટિકોણથી ઐતિહાસિક બનાવશે.
