ઈનકમ ટેક્સ રિટર્ન ફાઈલ કર્યા બાદ લોકો હવે રિફંડની રાહ જોઈ રહ્યા છે. પરંતુ ઘણી વખત લોકો ખોટા ઈનકમ ટેક્સ રિફંડ ક્લેઈમ કરતા હોય છે. હવે આવી કોઈ જ ચાલાકી નહીં ચાલે. કારણ કે હવે ઈનકમ ટેક્સ વિભાગ ખોટા ક્લેઈમ કરનારને પકડી તેની સામે કડક હાથે કાર્યવાહી કરશે. ઈનકમ ટેક્સ વિભાગ પણ હાઈટેક ટેકનોલોજીની મદદ લઈ આવા ખોટા ક્લેઈમને પકડી શકે છે. જીહાં. ઈનકમ ટેક્સ વિભાગે આવા ખોટા ક્લેમને શોધવા AI અને ડેટા એનાલિટિક્સની મદદ લેવાનું શરૂ કર્યું છે. ખોટો રિફંડ ક્લેઈમ કરનારને બની શકે છે કે ક્લેઈમ બાદ રિફંડના નામે થોડીક રકમ મળી જાય. પરંતુ ત્યાર બાદ તેને થઈ શકે છે મોટુ નુકસાન.

ખોટા IT રિફંડ ક્લેઈમ પર વસુલાશે 5 ઘણી રકમ

જો તમે ખોટો ટેક્સ રિફંડ ક્લેઈમ કર્યો તો AI અને ડેટા એનાલિટીક્સની મદદથી ઈનકમ ટેક્સ વિભાગ તમને પકડી શકે છે. અને આવી ઘટનામાં ટેક્સપેયર્સ પાસેથી રિફંડની રકમ તો વસુલાશે પરંતુ તેની સાથે સાથે વ્યાજ અને દંડ પણ વસુલવામાં આવશે. અને તેની રકમ રિફંડની રકમ કરતા 5 ગણી વધારે પણ હોઈ શકે છે. એટલું જ નહીં ટેક્સપેયરે કાયદાકીય કાર્યવાહીનો પણ સામનો કરવો પડી શકે છે.

ખોટા ક્લેઈમ પર કાર્યવાહી

ખોટા ઈનકમ ટેક્સ રિફંડ ક્લેઈમમાં જો તમે પકડાઈ જાવ તો તમારી પાસે ડિટેઈલ સ્ક્રૂટીની કરવામાં આવશે. અને તમને ટેક્સ ડિમાન્ડ નોટિસ મોકલવામાં આવશે. સેક્શન 270A અંતર્ગત ખોટા રિપોર્ટ પર થયેલી આવક પર 200% સુધી દંડની જોગવાઈ છે. સાથે જ સેક્શન 276C અને 277 અંતર્ગત જો ટેક્સ ચોરી 25 લાખ રૂપિયાથી વધુ છે તો 6 મહિનાથી 7 વર્ષ સુધીની જેલ અને દંડની ભરપાઈ કરવી પડી શકે છે. નાના કેસમાં ત્રણ મહિનાથી 2 વર્ષ સુધી જેલ અને દંડની જોગવાઈ છે.

જો ખોટો ક્લેઈમ થઈ ગયો તો શું કરવું?

જો તમે તમારી ITRમાં કોઈ ખોટી કપાતનો ક્લેઈમ કરી દીધો છે તો તમે તેને સુધારી શકો છો. FY 2024-25 માટે રિવાઈઝ્ડ ITR 31 ડિસેમ્બર 2025 સુધી ફાઈલ કરી શકાય છે. જો ગયા વર્ષોમાં ખોટો ક્લેઈમ કર્યો હોય તો અપડેટેડ રિટર્ન (ITR-U) ફાઈલ કરી શકાય છે. ITR-U એસેસમેન્ટ યરના અંતથી 4 વર્ષની અંદર ફાઈલ કરી શકાય છે.