ચાલુ નાણાકીય વર્ષના અંત સુધીમાં દેશનું એક્સપોર્ટ $860 બિલિયનને વટાવી શકે છે. આ આંકડો એવા સમયે આવ્યો છે જ્યારે ભારત અને યુનાઇટેડ સ્ટેટ્સ વચ્ચેના વેપાર કરારનો ડ્રાફ્ટ હમણાં જ બહાર પાડવામાં આવ્યો છે અને યુરોપ સાથેના વેપાર કરાર હેઠળ વેપાર શરૂ થવામાં થોડો સમય લાગશે. વધુમાં, બ્રિટન સાથેનો વેપાર કરાર નવા નાણાકીય વર્ષની શરૂઆતમાં એપ્રિલમાં શરૂ થશે.
તાજેતરના મહિનાઓમાં ભારતે 50 ટકા સુધીના યુએસ ટેરિફનો સામનો કરવો પડ્યો છે અને ગ્લોબલ સપ્લાય ચેઈન નોંધપાત્ર રીતે ખોરવાઈ ગઈ છે. આ હોવા છતાં દેશના નિકાસ ક્ષેત્રે નોંધપાત્ર રીતે સારું પ્રદર્શન કર્યું છે. જો નાણાકીય વર્ષના અંત સુધીમાં ભારતની નિકાસ $860 બિલિયનને વટાવી જાય તો તે વિશ્વના સૌથી મોટા નિકાસકાર ચીન માટે એક મહત્વપૂર્ણ પડકાર ઉભો કરશે, જેણે એક જ વર્ષમાં $1 ટ્રિલિયનનો રેકોર્ડ નિકાસ હાંસલ કર્યો છે.
સરકારે જાહેર કર્યા આંકડા
મળતી માહિતી મુજબ જાન્યુઆરીમાં વેપારી માલની નિકાસ 36.56 અરબ ડોલર રહી ગઈ છે. જે ડિસેમ્બરમાં $38.51 અરબ ડોલર હતી. ત્યારે આયાત વધીને $71.24 બિલિયન થઈ, જે સોના અને ચાંદીની નિકાસમાં વધારો દર્શાવે છે. વાણિજ્ય સચિવ રાજેશ અગ્રવાલે જણાવ્યું હતું કે આ નાણાકીય વર્ષના એપ્રિલ-જાન્યુઆરી દરમિયાન ભારતની નિકાસ 2.22 ટકા વધીને $366.63 બિલિયન થઈ છે. તેમણે એમ પણ જણાવ્યું હતું કે સમગ્ર નાણાકીય વર્ષ માટે માલ અને સેવાઓની નિકાસ $860 બિલિયનથી વધુ થઈ શકે છે.
સોમવારે જાહેર કરાયેલા સરકારી નિકાસ અને આયાતના આંકડા મુજબ ભારતની વેપાર ખાધ જાન્યુઆરીમાં વધીને $34.68 બિલિયન થઈ ગઈ જે ડિસેમ્બરમાં $25.04 બિલિયન હતી. સોના અને ચાંદીની આયાતમાં તીવ્ર વધારો મુખ્ય કારણ હતું.
અમેરિકાએ ટેરિફ ઘટાડવાની જાહેરાત કરી
જાન્યુઆરીના વેપારના આંકડા પણ દર્શાવે છે કે આ મહિનોએ છેલ્લો મહિનો હતો, જેમાં અમેરિકા દ્વારા ભારતીય નિકાસ પર લાદવામાં આવેલા ભારે ટેરિફથી અસર થઈ હતી. યુએસ પ્રમુખ ડોનાલ્ડ ટ્રમ્પે આ મહિનાની શરૂઆતમાં જાહેરાત કરી હતી કે તેઓ ભારતીય માલ પરના ટેરિફ 50 ટકાથી ઘટાડીને 18 ટકા કરશે, જેનાથી નિકાસકારો અને નીતિ ઘડવૈયાઓને રાહત મળશે. કરાર હેઠળ ભારત રશિયા પાસેથી તેલ ખરીદી ઘટાડવા સંમત થયું છે અને યુએસ માલની વાર્ષિક આયાત બમણીથી વધુ કરવાની યોજના ધરાવે છે.
EU સાથે વેપાર કરાર
આ આંકડા ટ્રમ્પ દ્વારા લાદવામાં આવેલા 50 ટકા ટેરિફની અંતિમ અસર દર્શાવે છે, જેના કારણે અસરકારક દર 25 ટકા થઈ ગયો છે અને માર્ચમાં ભારત અને અમેરિકા વચ્ચે પ્રસ્તાવિત વેપાર કરાર પર હસ્તાક્ષર થયા પછી તે વધુ ઘટીને 18 ટકા થવાની ધારણા છે. બંને દેશો હાલમાં એક વચગાળાના માળખા પર આધારિત કરાર પર વાટાઘાટો કરી રહ્યા છે. ભારતે તાજેતરમાં યુરોપિયન યુનિયન સાથે વેપાર કરાર પર પણ હસ્તાક્ષર કર્યા છે, જે આગામી વર્ષમાં અમલમાં આવવાની અપેક્ષા છે, જે નિકાસને વેગ આપવા માટે વધુ તકો દર્શાવે છે.
આ પણ વાંચો : AI Summit India 2026: AI મામલે મોસ્ટ પાવરફુલ દેશ કયો? અમેરિકા કે ચીન ? જાણો ભારત કયા સ્થાને ?
