JIOના IPO દરેક જગ્યાએ મજબૂત છાપ છોડી રહ્યો છે. બજારમાં પ્રવેશતા પહેલા જ કંપનીના આ IPOએ ત્રણ રેકોર્ડ સ્થાપિત કર્યા છે અને સાથે સાથે ચલણ બજારમાં પણ હલચલ મચાવી દીધી છે. વિદેશી રોકાણકારોએ Jioના IPOમાં મોટા પાયે રોકાણ કર્યું છે. બુધવારે રૂપિયો 48 પૈસા મજબૂત થઈને યુએસ ડોલર સામે 94.43ના સ્તરે પહોંચ્યો હતો, જે છેલ્લા છ અઠવાડિયાનો ઉચ્ચતમ સ્તર છે. રિલાયન્સ ઇન્ડસ્ટ્રીઝના એક એકમ 'જિયો પ્લેટફોર્મ્સ'ના ઇનિશિયલ પબ્લિક ઓફરિંગ (IPO) સાથે સંકળાયેલા વિદેશી મૂડીના પ્રવાહને કારણે તેમજ ડોલરની માંગને નિયંત્રિત કરવા માટે રિઝર્વ બેંક ઓફ ઇન્ડિયા (RBI) દ્વારા કરવામાં આવેલી દરમિયાનગીરીને લીધે સ્થાનિક ચલણને ટેકો મળ્યો હતો. જોકે, ફોરેક્સ ટ્રેડરોએ જણાવ્યું હતું કે સ્થાનિક શેરબજારોમાં નબળાઈ અને ક્રૂડ ઓઈલના ઊંચા ભાવને કારણે રૂપિયા પર દબાણ યથાવત રહ્યું હતું.
ઇન્ટરબેંક ફોરેન એક્સચેન્જ માર્કેટમાં, રૂપિયો ડોલર સામે 94.78 ના સ્તરે ખૂલ્યો હતો. ટ્રેડિંગ સત્ર દરમિયાન તે ડોલર સામે 94.41ના ઉચ્ચતમ અને 94.82ના નિમ્નતમ સ્તર સુધી પહોંચ્યો હતો. અંતે તે 94.43 પર બંધ થયો, જે તેના અગાઉના બંધ ભાવની સરખામણીમાં 48 પૈસાનો વધારો દર્શાવે છે.
છેલ્લી વખત ભારતીય ચલણ 4 સપ્ટેમ્બરના રોજ આ સ્તરની નજીક બંધ થયું હતું. સોમવારે, રૂપિયો બે પૈસા ઘટીને યુએસ ડોલર સામે ૯૪.૯૧ના સ્તરે બંધ થયો હતો. મંગળવારે 'દશેરા'ના તહેવારને કારણે ફોરેક્સ બજારો બંધ રહ્યા હતા. એક રિસર્ચ એનાલિસ્ટે જણાવ્યું હતું કે, "IPO સંબંધિત વિદેશી મૂડીના પ્રવાહ અને યુએસ ડોલરમાં સાપેક્ષ નબળાઈને કારણે રૂપિયો છ અઠવાડિયાની ઊંચી સપાટીએ પહોંચ્યો હતો. જોકે, સ્થાનિક બજારોમાં નબળાઈ અને ક્રૂડ ઓઈલના ઊંચા ભાવને કારણે રૂપિયાના વધારા પર મર્યાદા આવી હતી."
તેમણે વધુમાં ઉમેર્યું કે ડોલરમાં એકંદરે નબળાઈ અને યુએસ બોન્ડ યીલ્ડમાં ઘટાડો રૂપિયા માટે સકારાત્મક દૃષ્ટિકોણ જાળવી રાખવામાં મદદરૂપ થઈ શકે છે. ચૌધરીએ કહ્યું, "ડોલર સામે રૂપિયાનો સ્પોટ એક્સચેન્જ રેટ 94.20 થી 94.80ની રેન્જમાં રહેવાની અપેક્ષા છે."
ઉલ્લેખનીય છે કે, જિયો પ્લેટફોર્મ્સનો 30213 કરોડ રૂપિયાનો ઇનિશિયલ પબ્લિક ઓફરિંગ (IPO) બુધવારે સબસ્ક્રિપ્શન માટે ખૂલ્યો હતો. આ IPO 23 ઓક્ટોબરે બંધ થશે. શેર દીઠ ₹1,065 થી ₹1,119 ની પ્રાઇસ રેન્જ ધરાવતો આ ઇશ્યૂ ખુલ્યાના માત્ર 100 મિનિટમાં સંપૂર્ણપણે સબસ્ક્રાઇબ થઈ ગયો હતો. આ સાથે, તે અત્યાર સુધીનો સૌથી ઝડપથી સબસ્ક્રાઇબ થયેલો IPO બની ગયો છે.
ડોલર ઇન્ડેક્સ—જે છ મુખ્ય વૈશ્વિક ચલણો સામે યુએસ ડોલરનું મૂલ્ય માપે છે—તે 0.07 ટકા વધીને 101.59 પર પહોંચ્યો છે. સ્થાનિક શેરબજારમાં, સેન્સેક્સ 143.21 પોઈન્ટ ઘટીને 73,709.69 પર બંધ થયો, જ્યારે નિફ્ટી 77.60 પોઈન્ટના ઘટાડા સાથે 22,811.35 પર બંધ રહી. ફ્યુચર્સ ટ્રેડિંગમાં, આંતરરાષ્ટ્રીય બેન્ચમાર્ક ગણાતા બ્રેન્ટ ક્રૂડ ઓઈલના ભાવમાં 1.99 ટકાનો વધારો થયો અને તે પ્રતિ બેરલ $110.96 પર પહોંચ્યો. શેરબજારના ડેટા અનુસાર, સોમવારે વિદેશી સંસ્થાકીય રોકાણકારો (FIIs) એ ₹1,148.64 કરોડના મૂલ્યના શેરનું ચોખ્ખું વેચાણ કર્યું હતું.
આ પણ વાંચો: Delhi: મહિલાઓ પ્રત્યે તેમની માનસિકતા શું છે... સ્મૃતિ ઈરાનીએ રાહુલ ગાંધી પર કર્યા પ્રહાર
