ડિજિટલ પેમેન્ટ, ઓનલાઈન શોપિંગ કે બિલ પેમેન્ટ કરવા પર મળતું કેશબેક આજકાલ સામાન્ય થઈ ગયું છે. લોકો તેને બોનસ અથવા બચતનો સરળ રસ્તો માને છે. પરંતુ હવે ઈન્કમટેક્સ વિભાગ પણ આવા વ્યવહારો પર નજર રાખી રહ્યું છે. જો તમને મોટી રકમનું કેશબેક મળ્યું હોય અને તમે તેને આવકવેરા રિટર્નમાં દર્શાવ્યું ન હોય તો નોટિસ મળવાની શક્યતા છે.

કેશબેક ક્યારે કરપાત્ર આવક ગણાશે?

ઈન્કમટેક્સના નિયમો મુજબ કેશબેકને "અન્ય સ્ત્રોતોમાંથી આવક" તરીકે ગણવામાં આવે છે, ખાસ કરીને જ્યારે રકમ મોટી હોય. આંતરરાષ્ટ્રીય ફ્લાઇટ ટિકિટ, લક્ઝરી હોટેલ બુકિંગ, મોંઘા મોબાઈલ અથવા ગેજેટ્સ જેવી મોંઘી ખરીદી પર મળેલા કેશબેક ટેક્સના દાયરામાં આવી શકે છે. જો કોઈ વ્યક્તિ વારંવાર કેશબેક મેળવવા માટે મોટી રકમનો વ્યવહાર કરે છે તો વિભાગ તેને આવક તરીકે પણ ગણી શકે છે. તમારા એકાઉન્ટમાં સતત મોટી રકમનું કેશબેક મળવું પણ શંકાનું કારણ બની શકે છે. એક અહેવાલ મુજબ, 2016માં એક ખાનગી કંપનીમાં કામ કરતા એક વ્યક્તિને ઈન્કમટેક્સ વિભાગ તરફથી નોટિસ મળી ત્યારે તે ચોંકી ગયો. તેનું કારણ ડેબિટ કાર્ડ ટ્રાન્ઝેક્શન પર મળેલું ₹2,500નું કેશબેક હતું. રોહિતે તેને કરપાત્ર આવક ગણી ન હતી અને રિટર્નમાં તેનો ઉલ્લેખ કર્યો ન હતો. પરંતુ વિભાગે તેને "અન્ય સ્ત્રોતોમાંથી આવક" ગણી નોટિસ મોકલી. આના પરથી તમે સમજી શકો છો કે એક નાની ભૂલ પણ નોટિસનું કારણ બની શકે છે.

ટેક્સની નોટિસથી આ રીતે બચવું?

  • દરેક કેશબેક અને રોકડ વ્યવહારનો રેકોર્ડ રાખો.
  • જો રકમ મોટી હોય તો તેને તમારા ITR માં સામેલ કરો.
  • સમયસર આવકવેરા રિટર્ન ફાઈલ કરો.
  • વારંવાર મોટી રકમ જમા કરાવવાનું ટાળો.

શું નાના કેશબેક પર પણ ટેક્સ લાગે છે?

જો કેશબેક 50, 100 અથવા 500 રૂપિયા જેવી નાની રકમનું હોય અને તે સામાન્ય ખરીદી અથવા ડિજિટલ ચુકવણી પર મળે છે તો તેને સામાન્ય રીતે કરપાત્ર ગણવામાં આવતું નથી. આવા કેશબેકને પ્રોત્સાહન અથવા ડિસ્કાઉન્ટ તરીકે જોવામાં આવે છે. પરંતુ મોટા અને વારંવાર મળતા કેશબેક વિશે સાવચેત રહેવું મહત્વપૂર્ણ છે, કારણ કે તેને આવકનો એક ભાગ ગણી શકાય.