દેશમાં આજે સોના-ચાંદી બંને કિમતી ધાતુમાં ભાવ વધારો જોવા મળ્યો હતો. અમદાવાદમાં સોનાના ભાવમાં રૂ.700નો વધારો થયો હતો. જ્યારે ચાંદીના ભાવમાં રૂ.2,500નો વધારો થયો હતો.

આ સાથે ચાંદી ઓલ ટાઈમ હાઈ ભાવ સપાટી જોવા મળી છે. ચાંદીના ભાવ રૂ.1,10,000 સુધી પહોંચ્યા છે. જ્યારે દિલ્હી સહિતના કેટલાક શહેરોમાં ચાંદીનો ભાવ રૂ.1,11,000 પ્રતિ કિલોગ્રામ નોંધાયા હોવાના અહેવાલ છે. શુક્રવારે ભારતમાં ચાંદીના ભાવ સર્વકાલીન ઉચ્ચતમ સ્તરે પહોંચી ગયા હતા. દેશના અમુક ભાગમાં હાજર બજારમાં પ્રતિ કિલોગ્રામ રૂ.1.11 લાખનો આંકડો પાર થયો હતો. વૈશ્વિક વેપાર તણાવમાં વધારો અને યુએસ ફેડરલ રિઝર્વ તરફ્થી ઘટાડાની અપેક્ષાઓ વચ્ચે વેપારીઓએ સલામત ખરીદી વધારી હતી. તેના કારણે આ વધારો નોંધાયો હોવાનું માનવામાં આવે છે. મલ્ટી કોમોડિટી એક્સચેન્જ (MCX) પર ચાંદીના વાયદાના ભાવ શરૂઆતના કારોબારમાં પ્રતિ કિલોગ્રામ રૂ.1.10 લાખને પાર કરી ગયા હતા. જ્યારે ફિઝિકલ સ્પોટ માર્કેટમાં ચાંદીનો ભાવ પ્રતિ ગ્રામ રૂ.111 અથવા રૂ.1,11,000ના સ્તરે ટ્રેડ થઈ રહ્યો હતો. જે ભારતમાં અત્યાર સુધીનો સૌથી વધુ ભાવ છે.

અમદાવાદની બજારમાં ચાંદી ચોરસાનો ભાવ રૂ.1,10,000 નોંધાયો હતો. આ સૌથી ટોચની રેકર્ડબ્રેક સપાટી છે. અગાઉ 3, જુલાઈએ રૂ.1,08,000 ઓલ ટાઈમ હાઈ સપાટી નોંધાઈ હતી. ત્યારબાદ આ બીજી વખત ચાંદીના ભાવે નવી સપાટી બનાવી છે. 999 સોનાનો ભાવ રૂ.1,00,500 અને 995 સોનાનો ભાવ રૂ.1,00,200 રહ્યો હતો. હોલમાર્ક દાગીનાનો ભાવ રૂ.98,490 રહ્યો હતો. સોનામાં એકંદરે રૂ.700નો વધારો નોંધાયો છે. આ વર્ષે, એટલે કે 1 જાન્યુઆરીથી અત્યાર સુધીમાં 24 કેરેટ સોનાના 10 ગ્રામનો ભાવ રૂ.76,162થી વધીને રૂ.20,882 થઈ ગયો છે. જ્યારે ચાંદીનો ભાવ રૂ.86,017 પ્રતિ કિલોથી વધીને 1,10,000 થઈ ગયો છે. જ્યારે ગયા વર્ષે 2024માં સોનું રૂ.12,810 મોંઘુ થયું હતું. યુએસ ટેરિફ્ને કારણે રાજકીય તણાવ પ્રવર્તી રહ્યો છે. જે સોનાના ભાવમાં તેજીને ટેકો આપી રહ્યો છે. આ કારણોસર જ સોનાની માગ વધી રહી છે. આવા સંજોગોમાં આ વર્ષે સોનું પ્રતિ 10 ગ્રામ 1 લાખ 3 હજાર રૂપિયા સુધી પહોંચી શકે છે. ચાંદી આ વર્ષે 1 લાખ 30 હજાર રૂપિયા સુધી પહોંચી શકે છે.