દેશની ડિજિટલ પેમેન્ટ કંપની PhonePeએ હવે ભારતની બહાર પણ પોતાનો કારોબાર વિસ્તારવાની તૈયારી કરી લીધી છે. આ પગલાથી કંપની માટે નવા દેશમાં સ્થાનિક સ્તરે પેમેન્ટ સેવાઓ શરૂ કરવાનો રસ્તો ખુલી શકે છે. UAEમાં કંપનીને પેમેન્ટ સંબંધિત 2 લાઇસન્સ માટે મંજૂરી મળી છે. એટલે ભારતીયો દુબઈ જેવા મોટા શહેરોમાં પણ UPIનો ઉપયોગ કરી શકશે.
PhonePeને UAEની સેન્ટ્રલ બેંક તરફથી 2 પેમેન્ટ લાઇસન્સ માટે પ્રિન્સિપલ મંજૂરી મળી છે. હવે કંપનીએ ત્યાં પોતાનો કારોબાર શરૂ કરતા પહેલાં આગળની જરૂરી મંજૂરી મેળવવી પડશે.
PhonePeને જે 2 લાઇસન્સ માટે પ્રારંભિક મંજૂરી મળી છે, તેમાં રિટેલ પેમેન્ટ સર્વિસ અને કાર્ડ સ્કીમ્સ તથા સ્ટોર્ડ વેલ્યૂ ફેસિલિટીઝનો સમાવેશ થાય છે. આ મંજૂરીથી કંપની UAEમાં રિટેલ પેમેન્ટ સેવાઓ, કાર્ડ સંબંધિત સુવિધાઓ અને સ્ટોર્ડ વેલ્યૂ આધારિત પેમેન્ટ પ્રોડક્ટ્સ શરૂ કરવાની દિશામાં આગળ વધી શકશે.
સ્ટોર્ડ વેલ્યૂ ફેસિલિટીઝ હેઠળ વૉલેટ જેવી ડિજિટલ પેમેન્ટ સુવિધાઓ ઉપલબ્ધ કરાવવાની શક્યતા છે. જ્યારે રિટેલ પેમેન્ટ સર્વિસ અને કાર્ડ સ્કીમ્સ સાથે જોડાયેલા લાઇસન્સ દ્વારા કંપની વેપારીઓ માટે પેમેન્ટ અને અન્ય સ્થાનિક પેમેન્ટ સેવાઓ સાથે પણ જોડાઈ શકે છે.
હાલમાં PhonePeને મળેલી મંજૂરી પ્રારંભિક સ્તરની છે. UAEમાં સંપૂર્ણ રીતે લાઇસન્સ પ્રાપ્ત સ્થાનિક કારોબાર શરૂ કરવા માટે કંપનીએ આગળની નિયમનકારી પ્રક્રિયા પૂર્ણ કરવી પડશે. અંતિમ મંજૂરી મળ્યા બાદ PhonePe સ્થાનિક બેંકો, લાઇસન્સ પ્રાપ્ત પેમેન્ટ સર્વિસ પ્રોવાઇડર્સ અને ટેક્નોલોજી કંપનીઓ સાથે ભાગીદારી કરવાની દિશામાં આગળ વધી શકે છે.
PhonePe UAEની સ્થાનિક ડિજિટલ પેમેન્ટ સિસ્ટમ Aani અને Jaywan સાથે કામ કરવાની શક્યતાઓ શોધી રહી છે. Aani UAEનું સ્થાનિક ઇન્સ્ટન્ટ પેમેન્ટ પ્લેટફોર્મ છે, જ્યારે Jaywan દેશના રાષ્ટ્રીય કાર્ડ પેમેન્ટ નેટવર્ક સાથે જોડાયેલું છે. સ્થાનિક પેમેન્ટ માળખા સાથે જોડાણથી PhonePeને UAEના ડિજિટલ પેમેન્ટ બજારમાં પોતાની સેવાઓ વિકસાવવામાં મદદ મળી શકે છે.
UAEમાં સ્થાનિક કારોબાર શરૂ કરવો PhonePe માટે મહત્વનું પગલું છે, કારણ કે આ પહેલો એવો વિદેશી દેશ છે જ્યાં કંપની સ્થાનિક રીતે લાઇસન્સ પ્રાપ્ત કારોબાર સ્થાપવાની દિશામાં આગળ વધી રહી છે. PhonePeની શરૂઆત 2016માં થઈ હતી અને ભારતમાં તેનો મુખ્ય કારોબાર ડિજિટલ પેમેન્ટ, બિલ પેમેન્ટ, રિચાર્જ અને અન્ય સેવાઓ સાથે જોડાયેલો છે.
UAEમાં કંપનીની હાલની હાજરી ભારતીય પ્રવાસીઓ દ્વારા કરવામાં આવતા UPI પેમેન્ટ સાથે પણ જોડાયેલી રહી છે. નવી મંજૂરી બાદ કંપનીનો ઉદ્દેશ UAEના સ્થાનિક ગ્રાહકો અને વેપારીઓ માટે પણ પેમેન્ટ સેવાઓનો વિસ્તાર કરવાનો છે.