મહિલાઓ માટે રોકાણની મોટી તક! પોસ્ટ ઓફિસની આ યોજનાઓથી બનાવો મજબૂત ભવિષ્ય

મહિલાઓને જીવનના અલગ-અલગ તબક્કાઓ માટે આર્થિક સુરક્ષા ઊભી કરવામાં પોસ્ટ ઓફિસની ઘણી યોજનાઓ મદદ કરી શકે છે. આ યોજનામાં રોકાણ કરવા માટે દીકરીના ભણતર, નિવૃત્તિનું આયોજન, ઇમરજન્સી ફંડ તૈયાર કરવું અથવા નિવૃત્તિ બાદ નિયમિત આવક મેળવવા સહિત ઘણા હેતુ હોઈ શકે છે. મ્યુચ્યુઅલ ફંડ અને શેરબજાર સાથે જોડાયેલા રોકાણમાં મળતું વળતર બજારની સ્થિતિ પ્રમાણે બદલાતું રહે છે. બીજી તરફ, ઘણા રોકાણકારો પોતાની કેટલીક રકમ એવા વિકલ્પોમાં રાખવા માંગે છે, જેના પર બજારના ઉતાર-ચઢાવની સીધી અસર ન થાય. આવા રોકાણકારો માટે પોસ્ટ ઓફિસની નાની બચત યોજનાઓ ઉપયોગી બની શકે છે.

પોસ્ટ ઓફિસની મોટાભાગની યોજનાઓમાં મહિલાઓ માટે અલગ વ્યાજદર હોતો નથી. જોકે, મહિલાઓ પોતાની જરૂરિયાત અને નાણાકીય લક્ષ્ય પ્રમાણે અલગ-અલગ યોજનાઓ પસંદ કરી શકે છે. સુકન્યા સમૃદ્ધિ યોજના SSY ખાસ કરીને દીકરી માટે છે, જ્યારે પબ્લિક પ્રોવિડન્ટ ફંડ PPF, મન્થલી ઇન્કમ સ્કીમ MIS, રિકરિંગ ડિપોઝિટ RD, ટાઇમ ડિપોઝિટ TD અને નેશનલ સેવિંગ્સ સર્ટિફિકેટ NSC જેવી યોજનાઓમાં પાત્ર મહિલાઓ અને પુરુષો બંને રોકાણ કરી શકે છે. હાલમાં સુકન્યા સમૃદ્ધિ યોજના પર 8.2%, PPF પર 7.1%, પોસ્ટ ઓફિસ MIS પર 7.4%, 5 વર્ષની RD પર 6.7%, 5 વર્ષની TD પર 7.5% અને NSC પર 7.7% વ્યાજ મળી રહ્યું છે. સરકાર આ વ્યાજદરોની સમયાંતરે સમીક્ષા કરે છે. કઈ યોજના કઈ જરૂરિયાત માટે વધુ યોગ્ય બની શકે છે, તે સરળ રીતે સમજીએ.

સુકન્યા સમૃદ્ધિ યોજના

સુકન્યા સમૃદ્ધિ યોજના હાલમાં વધુ વ્યાજ આપતી નાની બચત યોજનાઓમાં સામેલ છે. તેમાં 8.2% વ્યાજ મળે છે. 10 વર્ષની ઉંમર પહેલાં દીકરીના નામે માતા-પિતા અથવા વાલી SSY ખાતું ખોલાવી શકે છે. તેમાં એક નાણાકીય વર્ષમાં ઓછામાં ઓછા 250 રૂપિયા અને વધુમાં વધુ 1.5 લાખ રૂપિયા જમા કરી શકાય છે.આ ખાતું ખોલ્યાની તારીખથી 21 વર્ષ બાદ મેચ્યોર થાય છે. આ યોજનાનો મુખ્ય હેતુ દીકરીના ભણતર અને ભવિષ્યની અન્ય જરૂરિયાતો માટે લાંબા સમય સુધી ફંડ તૈયાર કરવાનો છે. નક્કી કરેલી શરતો હેઠળ ઉચ્ચ શિક્ષણ માટે જમા રકમમાંથી 50% સુધી રકમ ઉપાડી શકાય છે.

પબ્લિક પ્રોવિડન્ટ ફંડ

PPF પર હાલમાં 7.1% વ્યાજ મળી રહ્યું છે. તેમાં એક નાણાકીય વર્ષમાં ઓછામાં ઓછા 500 રૂપિયા જમા કરવા પડે છે, જ્યારે વધુમાં વધુ 1.5 લાખ રૂપિયા સુધી રોકાણ કરી શકાય છે. તેની મેચ્યોરિટી અવધિ 15 વર્ષની છે. ત્યારબાદ તેને 5-5 વર્ષના સમયગાળા માટે આગળ વધારી શકાય છે.યોજનાની શરતો મુજબ તેમાં લોન લેવાની અને કેટલીક રકમ ઉપાડવાની સુવિધા પણ મળે છે. સરકાર દ્વારા સમર્થિત PPF એવી મહિલાઓ માટે ઉપયોગી બની શકે છે, જેઓ નિવૃત્તિ જેવા લાંબા ગાળાના લક્ષ્ય માટે બચત કરવા માંગે છે. PPFમાં ટેક્સ સંબંધિત લાભ પણ મળે છે.

પોસ્ટ ઓફિસ MIS

જો કોઈ વ્યક્તિ પાસે પહેલેથી એકસાથે મોટી રકમ હોય અને તેમાંથી નિયમિત આવક મેળવવા માંગતી હોય, તો પોસ્ટ ઓફિસ મન્થલી ઇન્કમ સ્કીમ એટલે કે MIS એક વિકલ્પ બની શકે છે.MIS પર હાલમાં વાર્ષિક 7.4% વ્યાજ મળે છે અને વ્યાજ દર મહિને આપવામાં આવે છે. તેમાં સિંગલ ખાતામાં વધુમાં વધુ 9 લાખ રૂપિયા અને જોઇન્ટ ખાતામાં વધુમાં વધુ 15 લાખ રૂપિયા રોકાણ કરી શકાય છે.ઉદાહરણ તરીકે, જો કોઈ મહિલા 9 લાખ રૂપિયા રોકાણ કરે અને વ્યાજદર 7.4% હોય, તો એક વર્ષમાં આશરે 66,600 રૂપિયા વ્યાજ મળશે. એટલે દર મહિને આશરે 5,550 રૂપિયાની આવક થઈ શકે છે.

પોસ્ટ ઓફિસ RD

દરેક વ્યક્તિ પાસે એકસાથે લાખો રૂપિયા રોકાણ કરવા માટે હોતા નથી. એવી મહિલાઓ જે દર મહિને થોડી-થોડી રકમ જમા કરવા માંગે છે, તેમના માટે પોસ્ટ ઓફિસ રિકરિંગ ડિપોઝિટ એટલે કે RD એક વિકલ્પ બની શકે છે.5 વર્ષની RD પર હાલમાં 6.7% વ્યાજ મળે છે. તેમાં માત્ર 100 રૂપિયા દર મહિને જમા કરીને શરૂઆત કરી શકાય છે. ત્યારબાદ 10 રૂપિયાના ગુણાંકમાં રકમ જમા કરી શકાય છે. તેમાં વધુમાં વધુ રોકાણની કોઈ મર્યાદા નથી.ઉદાહરણ તરીકે, કોઈ મહિલા પોતાના બજેટ પ્રમાણે દર મહિને 1,000 રૂપિયા, 5,000 રૂપિયા અથવા 10,000 રૂપિયા જમા કરી શકે છે. તેમાં એકસાથે મોટી રકમ જમા કરવાની જરૂર પડતી નથી.

પોસ્ટ ઓફિસ ટાઇમ ડિપોઝિટ

પોસ્ટ ઓફિસ ટાઇમ ડિપોઝિટ એટલે કે TD અમુક અંશે બેંક FDની જેમ કામ કરે છે. તેમાં રોકાણકાર પોતાની જરૂરિયાત પ્રમાણે સમયગાળો પસંદ કરી શકે છે.5 વર્ષની પોસ્ટ ઓફિસ ટાઇમ ડિપોઝિટ પર હાલમાં 7.5% વ્યાજ મળે છે. તેમાં ઓછામાં ઓછા 1,000 રૂપિયાથી રોકાણ શરૂ કરી શકાય છે અને ત્યારબાદ 100 રૂપિયાના ગુણાંકમાં રકમ જમા કરી શકાય છે. તેમાં વધુમાં વધુ રોકાણની કોઈ મર્યાદા નથી.આ યોજના એવી મહિલાઓ માટે ઉપયોગી બની શકે છે, જેમની પાસે એકસાથે મોટી રકમ છે અને તેમને અંદાજ છે કે ભવિષ્યમાં ક્યારે પૈસાની જરૂર પડી શકે છે.

નેશનલ સેવિંગ્સ સર્ટિફિકેટ

નેશનલ સેવિંગ્સ સર્ટિફિકેટ એટલે કે NSC પર હાલમાં 7.7% વ્યાજ મળી રહ્યું છે. તેની મેચ્યોરિટી અવધિ 5 વર્ષની છે. તેમાં ઓછામાં ઓછા 1,000 રૂપિયા રોકાણ કરી શકાય છે અને વધુમાં વધુ રોકાણની કોઈ મર્યાદા નથીMISથી અલગ, NSCનો મુખ્ય હેતુ દર મહિને આવક આપવાનો નથી. આ યોજના એવા લોકો માટે વધુ યોગ્ય બની શકે છે, જેઓ પોતાની રકમ મેચ્યોરિટી સુધી રોકાણમાં રાખી શકે છે.