ભારતીય રિઝર્વ બેન્ક (Reserve Bank of India)એ બુધવારે ટ્રેડ રિસીવેબલ્સ ડિસ્કાઉન્ટિંગ સિસ્ટમ (TReDS) પ્લેટફોર્મ પર માઈક્રો, સ્મોલ અને મિડિયમ એન્ટરપ્રાઈઝિસ (MSMEs) માટે ઑનબોર્ડિંગ પ્રક્રિયા સરળ બનાવવા મહત્વપૂર્ણ પ્રસ્તાવ રજૂ કર્યો છે. આ પગલાનો મુખ્ય હેતુ નાના ઉદ્યોગોને ઝડપી રીતે વર્કિંગ કેપિટલ ઉપલબ્ધ કરાવવાનો છે.
ઈનવોઈસ માર્ટ જેવા મુખ્ય પ્લેટફોર્મ કાર્યરત
TReDS એક ડિજિટલ પ્લેટફોર્મ છે, જે MSMEsને તેમના ટ્રેડ રિસીવેબલ્સ (ઈન્વોઈસ) ડિસ્કાઉન્ટ કરવા સક્ષમ બનાવે છે. તેના દ્વારા તેઓ બેન્કો અને નોન-બેન્કિંગ ફાઈનાન્સિયલ કંપનીઓ પાસેથી કોઈપણ ગેરંટી વગર તરત જ નાણાં મેળવી શકે છે. હાલમાં ભારતમાં Receivables Exchange of India Ltd, M1xchange અને ઈનવોઈસ માર્ટ જેવા મુખ્ય પ્લેટફોર્મ કાર્યરત છે.
નાના ઉદ્યોગોને પ્લેટફોર્મમાં જોડાવું વધુ સરળ બનશે
RBIના ગવર્નર સંજય મલ્હોત્રાએ મોનેટરી પોલિસી જાહેરાત દરમિયાન જણાવ્યું હતું કે MSMEs માટે 'ઈઝ ઓફ ડુઈંગ બિઝનેસ' વધારવા માટે TReDS પર ઑનબોર્ડિંગ વખતે જરૂરી ‘ડ્યૂ ડિલિજન્સ’ પ્રક્રિયા દૂર કરવાની યોજના છે. આથી નાના ઉદ્યોગોને પ્લેટફોર્મમાં જોડાવું વધુ સરળ બનશે. TReDS ફ્રેમવર્ક પ્રથમ વખત 2014માં રજૂ થયું હતું, જ્યારે 2023માં તેમાં ઈન્શ્યોરન્સ કંપનીઓને પણ સામેલ કરવામાં આવી હતી. છતાં ડિજિટલાઈઝેશનની અછત અને બજારમાં વિખરાવ જેવી સમસ્યાઓને કારણે આ પ્લેટફોર્મનો ઉપયોગ અપેક્ષિત સ્તરે વધ્યો નથી.
આ દરમિયાન કેન્દ્રીય બજેટમાં નાણાપ્રધાન નિર્મલા સીતારમણે CPSEs દ્વારા MSMEs પાસેથી થતી ખરીદી માટે TReDSને ડિફૉલ્ટ ટ્રાન્ઝેક્શન સેટલમેન્ટ પ્લેટફોર્મ બનાવવાનો પ્રસ્તાવ મૂક્યો હતો. આ પગલું અન્ય કોર્પોરેટ્સ માટે પણ માર્ગદર્શક બનશે અને MSMEs માટે નાણાંકીય ઉપલબ્ધતા વધારવામાં મદદરૂપ થશે.
આ પણ વાંચો : RBI: વેસ્ટ એશિયા સંકટની દેશ પર પડશે ગંભીર અસર, આરબીઆઈના ગવર્નર સંજય મલ્હોત્રાની ચેતવણી
