ગત સપ્તાહ દરમિયાન ભારતીય શેરબજારમાં નોંધપાત્ર તેજી જોવા મળી હતી. સેન્સેક્સ 2,034.87 અંક અથવા 2.67 ટકા વધ્યો હતો, જ્યારે નિફ્ટીમાં 616.15 અંક એટલે કે 2.59 ટકાનો ઉછાળો નોંધાયો હતો. આ તેજીના કારણે સેન્સેક્સની ટોપ-10 સૌથી મૂલ્યવાન કંપનીઓમાંથી 9 કંપનીઓના કુલ માર્કેટ કેપમાં ₹2,51,228.75 કરોડનો વધારો થયો હતો. જોકે, હિંદુસ્તાન યુનિલિવર એકમાત્ર એવી કંપની રહી જેના માર્કેટ કેપમાં ઘટાડો નોંધાયો.

LICના માર્કેટ કેપમાં પણ નોંધપાત્ર વૃદ્ધિ

બજાજ ફાઈનાન્સને સૌથી વધુ લાભ મળ્યો હતો. કંપનીના માર્કેટ કેપમાં ₹80,345.97 કરોડનો વધારો થતાં તે ₹7,10,817.51 કરોડ પર પહોંચ્યો હતો. ભારતી એરટેલના માર્કેટ કેપમાં ₹44,959.50 કરોડનો વધારો થયો હતો. ઉપરાંત ટાટા કન્સલ્ટન્સી સર્વિસિસ (TCS), રિલાયન્સ ઈન્ડસ્ટ્રીઝ, લાર્સન એન્ડ ટુબ્રો (L&T), સ્ટેટ બેન્ક ઓફ ઈન્ડિયા (SBI), HDFC બેન્ક, ICICI બેન્ક અને LICના માર્કેટ કેપમાં પણ નોંધપાત્ર વૃદ્ધિ નોંધાઈ હતી.

રિલાયન્સ ઈન્ડસ્ટ્રીઝ પ્રથમ ક્રમે

બીજી તરફ હિંદુસ્તાન યુનિલિવરના માર્કેટ કેપમાં ₹10,326.46 કરોડનો ઘટાડો થતાં તે ₹4,93,602.13 કરોડ પર આવી ગયો હતો. માર્કેટ કેપના આધારે રિલાયન્સ ઈન્ડસ્ટ્રીઝ દેશની સૌથી મૂલ્યવાન કંપની તરીકે પ્રથમ સ્થાને યથાવત રહી હતી. તેના પછી ભારતી એરટેલ, HDFC બેન્ક, ICICI બેન્ક, SBI, TCS, બજાજ ફાઈનાન્સ, L&T, LIC અને હિંદુસ્તાન યુનિલિવરનો ક્રમ રહ્યો હતો.

આગામી સપ્તાહે પ્રાથમિક બજાર પણ સક્રિય રહેશે. 5 ઓગસ્ટે મણિપાલ હેલ્થ એન્ટરપ્રાઈઝિસના શેર NSE અને BSE પર લિસ્ટ થવાની શક્યતા છે, જ્યારે 6 ઓગસ્ટે જુનિપર ગ્રીન એનર્જી અને MV ઈલેક્ટ્રોસિસ્ટમ્સના શેર પણ બજારમાં લિસ્ટ થવાની અપેક્ષા છે.

આ પણ વાંચો : RBIનો મોટો નિર્ણય, 1 ઓક્ટોબરથી તમામ બેંક FD પર મળશે સમાન વ્યાજ દર

ડિસ્કલેમર: શેરબજારમાં કે મ્યુચ્યુઅલ ફંડમાં રોકાણ કરતા પહેલા તમારા ફાઈનાન્શિયલ એડવાઈઝરની સલાહ અવશ્ય લો.