વૈશ્વિક બજારોમાં નબળા વલણને પ્રતિબિંબિત કરતા ગુરુવારે ભારતીય શેરબજારોમાં પણ ઘટાડો જોવા મળી રહ્યો છે. ક્રૂડ ઓઇલના ભાવમાં તીવ્ર ઉછાળો અને ડોલર સામે રૂપિયાના અવમૂલ્યનથી બજારના સેન્ટિમેન્ટ પર નકારાત્મક અસર પડી છે.
શેરબજાર લાલ નિશાને બંધ
બપોરે 3.30 કલાકે સેન્સેક્સ અને નિફ્ટી બંને લાલ નિશાનમાં જ બંધ થયા. સેન્સેક્સ 582 પોઇન્ટના ઘટાડા સાથે 76,913 અંકે બંધ થયો. જ્યારે નિફ્ટી 180.30 પોઇન્ટના ઘટાડા સાથે 23,997.55 અંકે બંધ થયો. મહત્વનું છે કે ઓટો, મેટલ અને બેંકિંગ શેરોમાં વેચાણ દબાણે બજારને નીચે ખેંચી લીધું છે. ઈરાન અને યુનાઇટેડ સ્ટેટ્સ વચ્ચેની વાટાઘાટો તૂટી ગયા બાદ વૈશ્વિક બજારોમાં અનિશ્ચિતતા વધુ તીવ્ર બની છે. જોકે, આઇટી શેરોમાં ખરીદીની પ્રવૃત્તિએ બજારને થોડો ટેકો આપ્યો છે.
વૈશ્વિક બજારોમાં શું છે સ્થિતિ ?
ગુરુવારે સવારે મોટાભાગના એશિયન બજારોમાં ઘટાડો જોવા મળ્યો. આ વલણ વોલ સ્ટ્રીટ પર રાતોરાત ચાલ સાથે સુસંગત હતું. નિક્કી 2.25 અને હેંગ સેંગ અનુક્રમે 1.24 ટકા અને 0.71 ટકા ઘટ્યા હતા, જ્યારે કોસ્પી 0.01 ટકાના નજીવા વધારા સાથે બંધ થયા હતા.
ગુરુવારે સવારે યુએસ સ્ટોક ફ્યુચર્સ મિશ્ર રહ્યા. S&P 500 ફ્યુચર્સ 0.36 ટકા વધ્યા હતા, જ્યારે ડાઉ જોન્સ ફ્યુચર્સ ૦.૩૯ ટકા ઘટ્યા હતા. પાછલા સત્રમાં, S&P 500 અને ડાઉ જોન્સ ઇન્ડસ્ટ્રિયલ એવરેજ અનુક્રમે 0.04 ટકા અને 0.57 ટકા ઘટીને બંધ થયા હતા. તેનાથી વિપરીત, નાસ્ડેક કમ્પોઝિટ 0.04 ટકાના વધારા સાથે બંધ થયા હતા. યુએસ ફેડરલ ઓપન માર્કેટ કમિટીએ 8-4 મતથી ફેડરલ ફંડ રેટ 3.5-3.75 ટકાની રેન્જમાં સ્થિર રાખવાનો નિર્ણય લીધો છે.
