આજે માર્કેટની નજર 'જિયો પ્લેટફોર્મ્સ' (Jio Platforms) ના લિસ્ટિંગ પર પણ રહી. જોકે સંકેતો ભારતીય શેરબજારમાં નબળી શરૂઆત તરફ ઈશારો કરી રહ્યા છે. 'ગિફ્ટ નિફ્ટી' (GIFT Nifty) માં જોવા મળેલો ઘટાડો સૂચવે છે કે સેન્સેક્સ અને નિફ્ટી પર શરૂઆતમાં દબાણ રહી શકે છે. તેમ છતાં એશિયાઈ બજારોમાં જોવા મળેલો ઉછાળો અને અમેરિકી શેરબજારમાં સતત બીજા સત્રમાં થયેલી વૃદ્ધિ રોકાણકારોને થોડી રાહત આપી શકે છે.
શેરબજારમાં ઘટાડો
સવારે 9.30 કલાકે સેન્સેક્સ અને નિફ્ટી બંને લાલ નિશાને ખૂલ્યા. સેન્સેક્સ 773.23 પોઇન્ટના ઘટાડા સાથે 72,825.44 અંકે ખૂલ્યો જ્યારે નિફ્ટી 197.10 પોઇન્ટના ઘટડા સાથે 22,552.65 અંકે ખૂલ્યો.
રોકાણકારોના લાખો કરોડ સ્વાહા
માત્ર એક મિનિટમાં રોકાણકારોને 2 લાખ કરોડ રૂપિયાનું નુકસાન થયું છે. BSE પર લિસ્ટેડ કંપનીઓનું માર્કેટ કેપિટલાઇઝેશન 459 લાખ કરોડ રૂપિયાથી ઘટીને 457 લાખ કરોડ રૂપિયા થઈ ગયું છે. આ પહેલાં, 30 શેર ધરાવતો BSE સેન્સેક્સ 345 પોઈન્ટના ઘટાડા સાથે 73,253 પર ખુલ્યો હતો, જ્યારે 50 શેર ધરાવતો NSE બેન્ચમાર્ક સૂચકાંક 'નિફ્ટી' બુધવારે 71 પોઈન્ટના ઘટાડા સાથે 22,678 પર શરૂ થયો હતો.
IT શેરોમાં મોટો ઘટાડો
શેરબજારમાં આવેલા કડાકામાં IT કંપનીઓના શેરોએ મુખ્ય ભૂમિકા ભજવી છે. ટ્રેડિંગની શરૂઆતથી જ IT શેરોમાં ભારે ઘટાડો જોવા મળ્યો હતો. ઇન્ફોસિસ (-4.50%), ટેક મહિન્દ્રા (-3.50%), TCS (-3%) અને HCL ટેક (-2.50%) ના શેરો નોંધપાત્ર નુકસાન સાથે ટ્રેડ થઈ રહ્યા હતા. આ ઉપરાંત, અન્ય લાર્જ-કેપ શેરો—જેમાં ITC (-2.20%), બજાજ ફિનસર્વ (-2%) અને ICICI બેંક (-1.70%) નો સમાવેશ થાય છે—તેમાં પણ ઘટાડો નોંધાયો હતો. Infosys, TCS, HCL Tech, Tech Mahindra જેવા તમામ શેર્સમાં ઘટાડો નોંધાયો છે.
માર્કેટમાં ઘટાડાનું કારણ શું ?
1) કાચા તેલના ભાવમાં વધારો
વિશ્વના સૌથી મોટા તેલ નિકાસકાર દેશ, સાઉદી અરેબિયામાં એક રિફાઇનરી પર થયેલા હુમલા બાદ, કાચા તેલના ભાવ 1.6% વધીને પ્રતિ બેરલ $115.7 પર પહોંચી ગયા છે. આ ઘટનાએ ઊર્જા પુરવઠામાં વિક્ષેપ અને ફુગાવામાં વધારો થવાની શક્યતા અંગેની ચિંતાઓને ફરી જીવંત કરી દીધી છે.
2) FOMCના નિર્ણયની રાહ
એવી વ્યાપક અપેક્ષા છે કે યુએસ ફેડરલ રિઝર્વ (ફેડ) આજે વ્યાજ દરોમાં કોઈ ફેરફાર કરશે નહીં. જોકે, ફેડનું નિવેદન—ખાસ કરીને તેલના વધતા ભાવને કારણે સર્જાતા ફુગાવાના દબાણ અને ભવિષ્યની નાણાકીય નીતિ (મોનેટરી પોલિસી) અંગેના તેમના દૃષ્ટિકોણ—વૈશ્વિક બજારો માટે અત્યંત મહત્વપૂર્ણ સાબિત થશે.
3) ટેકનિકલ પરિબળો
વિશ્લેષકોનું માનવું છે કે બજારમાં ફરીથી તેજીનો માહોલ (bullish trend) જોવા મળે તે માટે, નિફ્ટી ઇન્ડેક્સે 22,700ના સ્તરની ઉપર ટ્રેડ કરવું જરૂરી છે.
4) IT શેરોમાં વેચવાલી
IT શેરોમાં 2.3%નો ઘટાડો જોવા મળ્યો છે, જે તમામ ક્ષેત્રોમાં સૌથી મોટો ઘટાડો છે. આ કંપનીઓ તેમની આવકનો મોટો હિસ્સો યુનાઇટેડ સ્ટેટ્સમાંથી મેળવે છે. તેમાં પણ ખાસ કરીને ઇન્ફોસિસ (Infosys) અને HCL ટેક (HCL Tech)માં સૌથી વધુ ઘટાડો નોંધાયો છે, જેમાં અનુક્રમે 4.6% અને 3.2%નો ઘટાડો જોવા મળ્યો છે.
