ટાટા સન્સને પોતાની વાર્ષિક સામાન્ય સભા (AGM) યોજવા માટે રજિસ્ટ્રાર ઑફ કંપનીઝ (ROC) તરફથી ત્રણ મહિનાની વધારાની મુદત મળી છે. 18 ઑગસ્ટે યોજાનારી AGM માટે જરૂરી કોરમ પૂર્ણ ન થતાં બેઠક મુલતવી રાખવી પડી હતી. ટાટા સન્સના ઈતિહાસમાં આ પહેલીવાર છે જ્યારે AGM મુલતવી પડ્યા બાદ કંપનીએ તેને યોજવા માટે વધારાનો સમય માગ્યો છે.
અગાઉ કોરમ પૂર્ણ થઈ શક્યો નહોતો
AGM માટે જરૂરી કોરમ ન મળવાનું મુખ્ય કારણ સર રતન ટાટા ટ્રસ્ટ (SRTT) પર લાગેલા પ્રતિબંધો હોવાનું માનવામાં આવે છે. SRTT અને સર દોરાબજી ટાટા ટ્રસ્ટ (SDTT) મળીને ટાટા સન્સમાં બહુમતી હિસ્સો ધરાવે છે. જોકે, મહારાષ્ટ્ર ચેરિટી કમિશનરે તપાસ પૂર્ણ ન થાય ત્યાં સુધી SRTTને બેઠક યોજવા અને નિર્ણયો લેવા પર પ્રતિબંધ મૂક્યો છે. પરિણામે બંને ટ્રસ્ટ દ્વારા સંયુક્ત રીતે નિયુક્ત સભ્યો AGMમાં હાજર રહી શક્યા નહોતા અને કોરમ પૂર્ણ થઈ શક્યો નહોતો.
આગામી ચેરમેનની પસંદગી માટે સિલેક્શન કમિટી રચવાની માગ
ચેરિટી કમિશનર SRTT પરના પ્રતિબંધો વહેલી તકે હટાવે તો ટાટા સન્સ ત્રણ મહિનાની સમયમર્યાદા પૂરી થાય તે પહેલાં પણ AGM યોજી શકે છે. SRTTના ટ્રસ્ટીઓની રચના અને મહારાષ્ટ્ર પબ્લિક ટ્રસ્ટ્સ ઍક્ટ હેઠળના કથિત નિયમભંગ અંગે તપાસ ચાલી રહી છે. આ દરમિયાન ટાટા ટ્રસ્ટે AGMમાં ભાગ લેવાની મંજૂરી તેમજ ટાટા સન્સના આગામી ચેરમેનની પસંદગી માટે સિલેક્શન કમિટી રચવાની માગ કરી છે. વર્તમાન ચેરમેન એન. ચંદ્રશેખરનનો કાર્યકાળ ફેબ્રુઆરી 2027માં પૂર્ણ થવાનો છે અને તેઓ ફરી ચેરમેન બનવાની દાવેદારી નહીં કરે તેમ જણાવી ચૂક્યા છે.
ચંદ્રશેખરન AGMમાં રોટેશન હેઠળ ડિરેક્ટર પદેથી નિવૃત્ત થવાના હતા. જોકે, AGM કાયદેસર રીતે યોજાઈ ન હોવાથી તેમની પુનઃનિયુક્તિ અંગેનો નિર્ણય હજુ બાકી છે. કાનૂની નિષ્ણાતોનું માનવું છે કે માન્ય AGMમાં નિર્ણય ન થાય ત્યાં સુધી ચેરમેન પદે તાત્કાલિક ખાલી જગ્યા ઊભી થવાની શક્યતા નથી.
આ પણ વાંચો : Budget 2027ની તૈયારી શરૂ, સરકારી ખર્ચ પર નિયંત્રણ અને બિન-કર આવક વધારવા પર ભાર
