નવા વર્ષ 2026 ની શરૂઆત થઇ રહી છે. જો તમે નવા વર્ષમાં કાર ખરીદવાનો પ્લાન કરી રહ્યા હોવ તો તમારુ બજેટ અત્યારથી જ થોડુ વધારી દેજો. કારણ કે હાલના ભાવ પ્રમાણે જો તમે વિચારશો તો તમારી વધારે પૈસા એડ કરવા પડી શકે છે. કારણ કે 2026થી વાહનોના ભાવમાં વધારો થઇ શકે તેવો ઓટો કંપનીઓએ સંકેત આપ્યો છે.
ઘણી મોટી ઓટો કંપનીઓએ સંકેત આપ્યો છે કે જાન્યુઆરી 2026 થી વાહનોના ભાવમાં વધારો થઈ શકે છે. આની સીધી અસર એવા ગ્રાહકો પર પડશે જેઓ નવી કાર અથવા બાઇક ખરીદવાની રાહ જોઈ રહ્યા છે. કંપનીઓ કહે છે કે વધતા ખર્ચને કારણે ભાવમાં વધારો કરવો જરૂરી બન્યો છે નહીં તો નફો મેળવવા માટે મુશ્કેલી પડી શકે છે.
કેમ વધી શકે છે ભાવ?
તાજેતરના મહિનાઓમાં કાર ઉત્પાદનમાં વપરાતા કાચા માલ, જેમ કે તાંબુ, એલ્યુમિનિયમ અને ચોક્કસ ધાતુઓના ભાવમાં તીવ્ર વધારો થયો છે. આ ધાતુઓનો ઉપયોગ કાર એન્જિન, ઇલેક્ટ્રોનિક સિસ્ટમ અને અન્ય આવશ્યક ઘટકોમાં થાય છે. આ ધાતુઓમાંથી મોટાભાગની ધાતુઓ આયાત કરવામાં આવે છે. આથી જ્યારે ડોલર વધુ મોંઘો થાય છે ત્યારે કંપનીઓનો ખર્ચ વધુ વધે છે. તાજેતરમાં, ડોલર સામે રૂપિયો વધુ નબળો પડ્યો છે, જેના કારણે આયાત વધુ મોંઘી થઈ છે.
કિંમતોમાં કેટલો વધારો થઈ શકે છે?
બજારના નિષ્ણાતો માને છે કે કંપનીઓ સામાન્ય રીતે વર્ષની શરૂઆતમાં ભાવમાં સુધારો કરે છે. આ વખતે પણ કેટલીક કારના ભાવ લગભગ બે થી ત્રણ ટકા વધી શકે છે. જોક બજારમાં આટલી બધી બ્રાન્ડ્સ હોવાથી, કંપનીઓ માટે ભાવમાં નોંધપાત્ર વધારો કરવો સરળ રહેશે નહીં. જોકે સારી માંગ અને મજબૂત બુકિંગને કારણે, કંપનીઓને વિશ્વાસ છે કે ગ્રાહકો ભાવ વધારા પછી પણ કાર ખરીદવાનું ચાલુ રાખશે.
કઈ કંપનીઓએ આ જાહેરાત કરી છે?
કેટલીક કંપનીઓએ પહેલાથી જ સ્પષ્ટ કરી દીધું છે કે તેઓ જાન્યુઆરીથી નવી કિંમતો લાગુ કરશે. JSW MG મોટર ઇન્ડિયાએ જણાવ્યું છે કે તેના તમામ મોડેલમાં લગભગ બે ટકા મોંઘા થશે. મર્સિડીઝ-બેન્ઝ ઇન્ડિયાએ પણ તેના તમામ મોડેલો પર ભાવ વધારાની જાહેરાત કરી છે. BMW Motorrad ઇન્ડિયાએ જણાવ્યું છે કે તે તેની મોટરસાઇકલના ભાવમાં નોંધપાત્ર વધારો કરશે. વધુમાં ઇલેક્ટ્રિક સ્કૂટર ઉત્પાદક એથર એનર્જી પણ તેના તમામ મોડેલોના ભાવમાં વધારો કરવાની યોજના બનાવી રહી છે.
ટુ-વ્હીલર અને ઇલેક્ટ્રિક વાહનોના પણ વધશે ભાવ !
માત્ર કાર જ નહીં, પરંતુ બાઇક અને ઇલેક્ટ્રિક સ્કૂટર પણ વધુ મોંઘા થઈ શકે છે. ઇલેક્ટ્રોનિક ભાગોના વધતા ખર્ચ અને વિદેશી વિનિમયમાં વધઘટ થવુ તેના મુખ્ય કારણો છે. આગામી સમયમાં વધુ કંપનીઓ પણ ભાવ વધારવાનો નિર્ણય લઈ શકે છે. તેથી જો તમે વાહન ખરીદવાનું વિચારી રહ્યા છો તો સમયસર નિર્ણય લેવો ફાયદાકારક બની શકે છે.
