ટાટા ગ્રુપની જ્વેલરી બ્રાન્ડ તનિષ્કે સોનાના વધતા ભાવ અને ખરીદીના જથ્થામાં ઘટાડા વચ્ચે પણ સારો દેખાવ કર્યો છે. ટાઇટન કંપનીના નાણાકીય વર્ષ 2026-27ના બીજા ક્વાર્ટરનાં પરિણામો મુજબ, તનિષ્ક, મિયા અને ઝોયાની સંયુક્ત આવક વાર્ષિક ધોરણે 20% વધીને ₹14,935 કરોડ થઈ છે. ટાઇટનના સમગ્ર ભારતીય જ્વેલરી બિઝનેસની આવક 21% વધીને ₹16,343 કરોડ રહી છે. જ્યારે કેરેટલેનની આવક 31% વધીને ₹1,408 કરોડ થઈ છે. કંપનીના જ્વેલરી બિઝનેસમાં તનિષ્ક મુખ્ય બ્રાન્ડ તરીકે મહત્વનું સ્થાન ધરાવે છે.
સોનું મોંઘું છતાં ગ્રાહકોનો ખર્ચ વધ્યો
આ ક્વાર્ટરમાં સોનાના ભાવમાં વધારો થયો હતો. તેના કારણે ભારતમાં જ્વેલરીની ખરીદીના જથ્થામાં લગભગ 20% ઘટાડો નોંધાયો હતો. તેમ છતાં ગ્રાહકોએ જ્વેલરી પાછળ કરેલો કુલ ખર્ચ 16% વધ્યો હતો. એટલે કે ગ્રાહકો ઓછા વજનની જ્વેલરી ખરીદતા હોવા છતાં વધુ કિંમત ચૂકવી રહ્યા હતા. આ સ્થિતિમાં હીરા જડિત જ્વેલરી ટાઇટન માટે મોટો આધાર બની. આ કેટેગરીના વેચાણમાં 30%થી વધુ વૃદ્ધિ નોંધાઈ છે. બીજી તરફ, ઓછા નફાવાળા સોનાના સિક્કાના વેચાણમાં ઘટાડો થયો હતો. હીરા જડિત જ્વેલરીની વધતી માંગને કારણે કંપનીને વધુ સારા પ્રોડક્ટ મિક્સનો ફાયદો મળ્યો.
તનિષ્કે ભારતમાં 7 નવા સ્ટોર ખોલ્યા
સપ્ટેમ્બર ક્વાર્ટર દરમિયાન ટાઇટને ભારતમાં 42 નવા જ્વેલરી સ્ટોર ઉમેર્યા હતા. તેમાં તનિષ્કના 7, મિયાના 18 અને કેરેટલેનના 13 સ્ટોરનો સમાવેશ થાય છે. તનિષ્કે વિદેશમાં પણ પોતાનું વિસ્તરણ ચાલુ રાખ્યું છે. કંપનીએ અમેરિકાના લોસ એન્જલસમાં નવો તનિષ્ક સ્ટોર શરૂ કર્યો છે. ટાઇટનના આંતરરાષ્ટ્રીય જ્વેલરી બિઝનેસની આવક બમણાથી વધુ થઈને ₹1,152 કરોડ રહી હતી. તેમાં તનિષ્ક, મિયા અને કેરેટલેનના આંતરરાષ્ટ્રીય બિઝનેસની સંયુક્ત આવક 41% વધીને ₹788 કરોડ થઈ હતી. ખાસ કરીને ઉત્તર અમેરિકામાં તનિષ્કની માંગ સારી રહી હોવાનું કંપનીએ જણાવ્યું છે.
ટાઇટનનો નફો ₹2,393 કરોડ, પણ એક વખતના ફાયદાનો મોટો ફાળો
ટાઇટન કંપનીનો સપ્ટેમ્બર ક્વાર્ટરનો ચોખ્ખો નફો ગયા વર્ષના ₹1,120 કરોડની સરખામણીએ વધીને ₹2,393 કરોડ થયો છે. આ બજારના ₹1,473 કરોડના સરેરાશ અંદાજ કરતાં પણ ઘણો વધારે છે. જોકે, આ નફામાં નાણાકીય જવાબદારીના પુનર્મૂલ્યાંકનથી મળેલા ₹671 કરોડના એક વખતના હિસાબી ફાયદાનો સમાવેશ થાય છે. આ એક વખતનો ફાયદો બાદ કરવામાં આવે તો પણ કંપનીનો નફો 54% વધીને ₹1,722 કરોડ રહ્યો છે. કંપનીની પ્રોડક્ટ્સ અને સેવાઓની આવક 23.5% વધીને ₹20,337 કરોડ થઈ છે.
ઘડિયાળ અને આઇવેર બિઝનેસમાં પણ વૃદ્ધિ
ટાઇટનના ઘડિયાળના બિઝનેસની આવક 27% વધીને ₹1,881 કરોડ થઈ છે. પ્રીમિયમ એનાલોગ ઘડિયાળોની માંગમાં 30%થી વધુ વૃદ્ધિ થઈ હતી, જ્યારે સ્માર્ટવોચના વેચાણમાં પણ ફરી વધારો નોંધાયો છે. કંપનીના આઇવેર બિઝનેસની આવક 28% વધીને ₹281 કરોડ થઈ છે. સ્કિન, ઇર્થ અને તાનેરા જેવા ઉભરતા બિઝનેસની આવકમાં પણ 21% વૃદ્ધિ નોંધાઈ છે. ટાઇટનના મેનેજિંગ ડિરેક્ટર અજય ચાવલાના જણાવ્યા અનુસાર, તહેવારોની ખરીદીનો સમય આગળના ક્વાર્ટરમાં ખસ્યો હોવા છતાં મોટા ભાગના સમયગાળા દરમિયાન ગ્રાહકોની માંગ મજબૂત રહી હતી.
આ પણ વાંચો: Blinkit Ambulance: બ્લિંકિટ એમ્બ્યુલન્સ હવે દરેક માટે ફ્રી નહીં, દિપીન્દર ગોયલે કરી જાહેરાત- હવે લાગશે ચાર્જ!
