મધ્ય પૂર્વમાં અમેરિકા અને ઈરાન વચ્ચે વધતા જતા યુદ્ધના તણાવને પગલે વૈશ્વિક ઉર્જા બજારમાં અનિશ્ચિતતાનો માહોલ છે. જોકે, ભારત સરકારે દેશના કરોડો ગ્રાહકોને આશ્વાસન આપતા સ્પષ્ટ કર્યું છે કે ભારતમાં રાંધણ ગેસ (LPG)નો પુરવઠો પ્રભાવિત થશે નહીં. સ્થાનિક જરૂરિયાતોને પહોંચી વળવા માટે સરકારે તમામ તેલ રિફાઇનરીઓને ઉત્પાદન વધારવા અને પુરવઠો સુનિશ્ચિત કરવા કડક સૂચના આપી છે.
સરકારનો રિફાઇનરીઓને ખાસ આદેશ
ગુરુવારે જારી કરાયેલા સરકારી આદેશ મુજબ રિફાઇનરીઓને LPGનું ઉત્પાદન મહત્તમ સ્તરે લઈ જવા જણાવાયું છે. રિફાઇનરીઓને સૂચના અપાઈ છે કે તેઓ તૈયાર થયેલો LPG સ્ટોક માત્ર ત્રણ સરકારી કંપનીઓ—ઈન્ડિયન ઓઈલ (IOCL), ભારત પેટ્રોલિયમ (BPCL) અને હિન્દુસ્તાન પેટ્રોલિયમ (HPCL)ને જ વેચે. પ્રોપેન અને બ્યુટેન જેવા વાયુઓનો ઉપયોગ પેટ્રોકેમિકલ ઉદ્યોગોમાં કરવાને બદલે માત્ર LPG બનાવવા માટે કરવા આદેશ અપાયો છે, જેથી સામાન્ય નાગરિકોને રાંધણ ગેસની અછત ન પડે.
ભારત પાસે પર્યાપ્ત સ્ટોક અને વૈકલ્પિક વ્યવસ્થા
સરકારી સૂત્રોના જણાવ્યા મુજબ ભારત હાલમાં ઉર્જાના મામલે સુરક્ષિત સ્થિતિમાં છે. જો 'સ્ટ્રેટ ઓફ હોર્મુઝ' (સમુદ્રી માર્ગ) દ્વારા સપ્લાયમાં અવરોધ આવે, તો પણ દેશ પાસે પર્યાપ્ત સ્ટોક ઉપલબ્ધ છે. ભારત વર્ષ 2022થી રશિયા પાસેથી ક્રૂડ ઓઈલની આયાત વધારી રહ્યું છે. ફેબ્રુઆરીમાં રશિયા પાસેથી આયાત વધીને કુલ આયાતના 20% સુધી પહોંચી ગઈ છે, જે પ્રતિદિન 10.4 લાખ બેરલ છે. સરકાર દ્વારા સ્પષ્ટતા કરવામાં આવી છે કે MRPL રિફાઇનરી બંધ થવાના સમાચાર ખોટા છે. તમામ રિફાઇનરીઓ સામાન્ય રીતે કાર્યરત છે અને તેમની પાસે પૂરતો કાચો માલ ઉપલબ્ધ છે.
શા માટે આ નિર્ણય લેવો પડ્યો?
પશ્ચિમ એશિયામાં યુદ્ધ જેવી સ્થિતિને કારણે તેલ અને ગેસના પરિવહન માટે વપરાતા દરિયાઈ માર્ગો જોખમમાં છે. ખાસ કરીને સ્ટ્રેટ ઓફ હોર્મુઝ દ્વારા વિશ્વનો મોટો હિસ્સો તેલ સપ્લાય મેળવે છે. ભારત કોઈ પણ કટોકટીમાં આત્મનિર્ભર રહે તે હેતુથી પેટ્રોકેમિકલ ઉત્પાદનોને બદલે એલપીજીના ડોમેસ્ટિક સપ્લાય પર ભાર મૂકવામાં આવ્યો છે.
નોંધ: ગ્રાહકોએ ગભરાવાની જરૂર નથી. સરકારના આ આગોતરા આયોજનને કારણે દેશના દરેક ઘરમાં રાંધણ ગેસનો અવિરત પુરવઠો ચાલુ રહેશે.
વધુ સમાચાર વાંચવા માટે ક્લિક કરો
