ભારતમાં સોનું ગીરવે મૂકવાનો નિર્ણય હંમેશા લાગણીશીલ અને મજબૂરી સાથે જોડાયેલો માનવામાં આવતો હતો. ભૂતકાળમાં લોકો ત્યારે જ ઘરેણાં બેંક કે શાહુકાર પાસે મુકતા જ્યારે ઘરમાં કોઈ ગંભીર બીમારી કે મોટી આર્થિક કટોકટી આવી પડે. પરંતુ હવે આ ચિત્ર ઝડપથી બદલાઈ રહ્યું છે. એક્સપિરિયન ઈન્ડિયાના મનીષ જૈનના જણાવ્યા મુજબ, ગોલ્ડ લોન હવે માત્ર "મુશ્કેલ સમય"નો સાથી નથી રહી, પરંતુ બજારમાં તેની માંગમાં 80 થી 85 ટકાનો જંગી ઉછાળો આવ્યો છે. આજના યુવાનો અને મધ્યમ વર્ગ 20 વર્ષની લાંબી હોમ લોનમાં ફસાવાને બદલે ટૂંકા ગાળાની નાણાકીય જરૂરિયાતો પૂરી કરવા માટે ગોલ્ડ લોનને એક સ્માર્ટ વિકલ્પ ગણે છે.
નાના શહેરોથી લઈને મહાનગરો સુધી ગોલ્ડ લોનનો વધતો ક્રેઝ
એક સમય હતો જ્યારે ગોલ્ડ લોન માત્ર મધ્યમ વયના કે નીચલા-મધ્યમ વર્ગ પૂરતી સીમિત ગણાતી હતી, પરંતુ આજે સ્થિતિ તદ્દન અલગ છે. નાના શહેરોથી લઈને મોટા મહાનગરો સુધી, દરેક વર્ગના લોકો પોતાની તિજોરીમાં પડેલા સોનાનો યોગ્ય ઉપયોગ કરી રહ્યા છે. ઘર કે પ્રોપર્ટી ગીરવે મૂકવાની પ્રક્રિયા ખૂબ લાંબી અને અટપટી હોય છે, જ્યારે તેની તુલનામાં સોના સામે લોન મેળવવી અત્યંત સરળ અને સુરક્ષિત છે. સારી કમાણી કરતા યુવાનો પણ હવે સમજી ગયા છે કે નિષ્ક્રિય પડેલા સોનાનો ઉપયોગ તાત્કાલિક ફાઇનાન્શિયલ પ્લાનિંગ માટે કરવો વધુ ડહાપણભર્યું છે.
RBIના કડક નિયમો અને ફિનટેક કંપનીઓનું બદલાયેલું વલણ
ગોલ્ડ લોનના ટ્રેન્ડમાં આવેલા આ અચાનક ફેરફાર પાછળ બજારના નિયમો પણ મુખ્ય કારણ છે. તાજેતરમાં સુધી ઘણી ફિનટેક કંપનીઓ 30 થી 40 ટકાના ઊંચા વ્યાજ દરે પર્સનલ (અસુરક્ષિત) લોન આપતી હતી. પરંતુ રિઝર્વ બેંક ઓફ ઇન્ડિયા (RBI) એ અસુરક્ષિત લોન અને ડિજિટલ લેન્ડિંગ પર નિયમો કડક બનાવતા જ આખું બજાર સુરક્ષિત લોન (Secured Loans) તરફ વળ્યું છે. બેંકો અને ફિનટેક કંપનીઓ માટે પણ ગોલ્ડ લોન સૌથી સુરક્ષિત વિકલ્પ બની ગઈ છે, કારણ કે તેમાં નાણાં ડૂબવાનું જોખમ નહિવત હોય છે.
ટોપ-અપ લોનના ફંદાથી બચવું જરૂરી
સોના સામે લોન મેળવવી જેટલી આસાન છે, તેમાં ચોક્કસ જોખમ પણ રહેલું છે. ઘણા ગ્રાહકો પોતાના સોના પર વારંવાર 'ટોપ-અપ લોન' લેવાની ભૂલ કરે છે. મૂળ દેવું ચૂકવવાને બદલે લોનને રોલ ઓવર કરતા રહેવાથી ગ્રાહક કાયમ માટે દેવાદાર બની જાય છે. ગ્રાહકોએ એ વાત સમજવી ખૂબ જરૂરી છે કે લોનનો સાચો અને શ્રેષ્ઠ ઉપયોગ સમયસર તેની ભરપાઈ કરીને પોતાનું સોનું સુરક્ષિત પાછું મેળવવામાં જ છે.
EMI ના સાચા ગણિત અને યોગ્ય નાણાકીય આયોજનનું મહત્વ
લોન લેતી વખતે ઘણીવાર યુવાનો પોતાની ચુકવણી ક્ષમતાની ખોટી ગણતરી કરી બેસે છે. સારા પગારના આધારે મોટી EMI સ્વીકારી લેવાથી ભવિષ્યમાં ઘરગથ્થુ ખર્ચ કે મેડિકલ ઈમરજન્સી માટે બચત કરવી મુશ્કેલ બની જાય છે. માત્ર સારો ક્રેડિટ સ્કોર હોવાનો અર્થ એ નથી કે ક્ષમતાથી વધુ લોન લેવી. આજકાલ ક્રેડિટ રિપોર્ટિંગ સિસ્ટમ ખૂબ મજબૂત બની હોવાથી ધિરાણકર્તા કંપનીઓ ગ્રાહકના જૂના દેવાની માહિતી તુરંત મેળવી લે છે. તેથી યોગ્ય નાણાકીય આયોજન સાથે જ ગોલ્ડ લોનનો સાચો લાભ મેળવી શકાય છે.
આ પણ વાંચો : Gold Silver Price Today: સોનું અને ચાંદી સસ્તું મળે છે આજે? જાણો 10 ગ્રામનો લેટેસ્ટ રેટ
