નવમી સપ્ટેમ્બરના રોજ એક પરિપત્ર જાહેર કરી ઉત્પાદકો અને આયાતકારો માટે માલ અને સેવા કર (જીએસટી)ના દરમાં ઘટાડા અનુસાર ન વેચાયેલા સ્ટોકના મહત્તમ છૂટક ભાવ (એમઆરપી)માં સુધારો કરવાનું ફરજિયાત કરવામાં આવ્યું હતું, હવે આ પરિપત્રની સમીક્ષા કરવામાં આવી રહી છે. બિઝનેસ જગતનું કહેવું છે કે, જીએસટીના ઘટાડા મુજબ, કિંમતોમાં સંપૂર્ણ ઘટાડો કરવાનું કામ મુશ્કેલ બની શકે છે. કેમ કે, તેમણે તેમની પાસે જે સ્ટોક પડયો છે, તેની પર વધુ ઈનપુટ ટેક્સ ચૂકવ્યો હશે. જેની માટે તેમને રિફંડ કરવામાં આવશે નહીં.
એક સરકારી અધિકારીના જણાવ્યા અનુસાર, બિઝનેસ જગતે કેન્દ્રીય નાણાં મંત્રાલય અને ગ્રાહક બાબતોના વિભાગ સમક્ષ આ મામલે પોતાની ચિંતા વ્યક્ત કરી છે. જેથી સંબંધિત વિભાગે વિતરકો અને ડીલરો માટે ઈનપુટ ટેક્સ ક્રેડિટ (આઈટીસી)ના મુદ્દાને કેવી રીતે ઉકેલવો તે અંગે વિચારણા હાથ ધરી છે. સૂત્રોના જણાવ્યા અનુસાર, સરકાર 31 ડિસેમ્બર સુધી આ ખર્ચને સુધારેલા ભાવ સાથે સમાયોજિત કરવાનું વિચારી શકે છે. વધુમાં સરકાર એ મામલે સ્પષ્ટતા કરી શકે છે કે, આ પરિપત્ર નાના પેકેટમાં વેચાતાં શેમ્પૂ અને સોસ જેવી વસ્તુઓ પર કેવી રીતે લાગુ થઈ શકે છે, જેની કિંમત રૂ.1 અને રૂ.5 છે. કેમ કે, આવી વસ્તુઓના મામલે મૂલ્ય સંશોધન કરવાનું કામ કપરું છે, અને તેવી વસ્તુઓ પર કેવી રીતે અમલ કરવો જે પહેલાથી જ ડિસ્કાઉન્ટ કિંમતે વેચાઈ ચૂકી છે, તેમજ જ્યાં સ્તર કરતાં અસરકારક કિંમત ઓછી છે, ત્યાં પણ આ પરિપત્રનો અમલ કેવી રીતે કરવો તે અંગે પણ ખુલાસો કરવામાં આવી શકે છે.
