ઈરાન પ્રત્યેના પોતાના કટ્ટર વલણમાં ફેરફાર કરીને ડોનાલ્ડ ટ્રમ્પે સોમવારે જાહેરાત કરી કે તેઓ ઈરાની ઊર્જા સ્થળો પરના હુમલાઓને પાંચ દિવસ માટે મુલતવી રાખશે. આ પહેલા તેમણે હોર્મુઝ સ્ટ્રેટ અંગે ઈરાનને 48 કલાકનું અલ્ટીમેટમ આપ્યું હતું. ટ્રમ્પના વલણમાં આ ફેરફારની સીધી અસર માત્ર યુએસ અને એશિયન બજારો પર જ નહીં પરંતુ ક્રૂડ ઓઇલના વધતા ભાવોને પણ રાહત આપનારી સાબિત થઇ છે.
ડોનાલ્ડ ટ્રમ્પે આપ્યુ નિવેદન અને ઘટ્યા ક્રૂડ ઓઇલના ભાવ
ઈરાન પર 5 દિવસનો હુમલો નહીં" નીતિની જાહેરાત પછી ક્રૂડ ઓઇલના ભાવમાં અચાનક 10 ટકાથી વધુનો ઘટાડો જોવા મળ્યો છે. આ સમાચાર વૈશ્વિક સમુદાય માટે રાહત સમાન છે. જો કે, મંગળવારે આ અહેવાલ લખાઈ રહ્યો હતો ત્યાં સુધીમાં, ટ્રમ્પની જાહેરાતના જવાબમાં ઈરાન દ્વારા જાહેર કરાયેલા નિવેદનોને કારણે ક્રૂડ ઓઇલના ભાવ ફરી એકવાર વધઘટમાં જોવા મળ્યા હતા.
ટ્રમ્પે અચાનક આ નિવેદન કેમ આપ્યું?
ગયા રવિવાર સુધી યુએસ રાષ્ટ્રપતિએ ઈરાન પ્રત્યે સતત કડક વલણ જાળવી રાખ્યું હતું. તેમણે ઈરાનને હોર્મુઝ સ્ટ્રેટ ફરીથી ખોલવા માટે 48 કલાકનું અલ્ટીમેટમ આપ્યું હતું, જેમાં કહેવામાં આવ્યું હતું કે જો ઈરાન ધમકીઓ આપ્યા વિના સ્ટ્રેટ ફરીથી ખોલવામાં નિષ્ફળ જાય, તો અમેરિકા ઈરાની ઉર્જા સ્થળો પર હુમલા કરશે. જોકે ટ્રમ્પે હવે ઈરાનના પાવર પ્લાન્ટ પર આયોજિત હુમલાઓને પાંચ દિવસ માટે મુલતવી રાખ્યા છે. આ નિર્ણય પાછળનું કારણ સમજાવતા તેમણે જણાવ્યું હતું કે મધ્ય પૂર્વમાં ઉકેલ લાવવા અંગે બંને દેશો વચ્ચે ચર્ચા થઈ રહી છે.
શેરબજારોથી ક્રૂડ ઓઈલ સુધી અસર
- ટ્રમ્પની આ એક જ જાહેરાત પછી યુએસ શેરબજારોમાં અચાનક અને જોરદાર તેજી જોવા મળી, જ્યારે GIFT નિફ્ટીમાં પણ 900 પોઈન્ટનો ઉછાળો જોવા મળ્યો. દરમિયાન, સૌથી નોંધપાત્ર અસર ક્રૂડ ઓઈલના ભાવમાં જોવા મળી હતી.
- આંતરરાષ્ટ્રીય બજારમાં રાતોરાત ભાવ 10 ટકાથી વધુ ઘટીને $100 પ્રતિ બેરલથી નીચે આવી ગયા. આ મહિનાની શરૂઆતમાં, મધ્ય પૂર્વમાં સંઘર્ષને કારણે તેલના ભાવમાં ભારે ઉછાળો આવ્યો હતો. લગભગ 40 ટકાથી વધુનો વધારો થયો હતો.
- જોકે ટ્રમ્પ દ્વારા હુમલાઓ અટકાવવાની જાહેરાત અને બંને પક્ષો વચ્ચેની વાતચીત સકારાત્મક દિશામાં આગળ વધી રહી હોવાના સૂચનના પ્રતિભાવમાં ઈરાને એક નિવેદન બહાર પાડીને આ દાવાઓને "ખોટા સમાચાર" ગણાવ્યા. આ પછી તેલના ભાવમાં નજીવો વધારો પણ નોંધવામાં આવ્યો છે. તેમ છતાં, બ્રેન્ટ ક્રૂડ $101 પ્રતિ બેરલ પર રહ્યું છે, જ્યારે WTI ક્રૂડ $91 પ્રતિ બેરલ પર છે.
ભારતીય શેરબજાર માટે સકારાત્મક સંદેશ
ક્રૂડના ભાવમાં અચાનક અને નોંધપાત્ર ઘટાડો વિશ્વ માટે રાહત તરીકે જોવામાં આવે છે. કારણ કે ચાલુ સંઘર્ષ વચ્ચે સતત વધતી કિંમતોએ ફુગાવાનું જોખમ વધાર્યું હતું, જેના કારણે પાકિસ્તાન, બાંગ્લાદેશ અને શ્રીલંકાથી લઈને યુનાઇટેડ કિંગડમ સુધીના દેશોમાં ઇંધણના ખર્ચમાં તીવ્ર વધારો થયો હતો.
બીજી બાજુ ક્રૂડના ભાવમાં ઘટાડાની સીધી અસર ભારતીય શેરબજાર પર થવાની ધારણા છે. જાપાન, દક્ષિણ કોરિયા અને હોંગકોંગ સહિત વિવિધ એશિયન બજારોમાં તેજીના વલણો પહેલાથી જ જોવા મળી રહ્યા છે - જે ભારતીય શેરબજાર માટે સકારાત્મક સંકેત તરીકે સેવા આપે છે.