- હવે કંપનીમાં જેક માનો હિસ્સો ઘટીને 6.2%
- હાલમાં તેના બોર્ડ ઓફ ડિરેક્ટર્સમાં આઠ લોકો
- જાયન્ટ કંપનીનું બળજબરીથી પુનર્ગઠન થયું હતું
ચીની ઈ-કોમર્સ જાયન્ટ અલીબાબાનાં સંલગ્ન એન્ટ ગ્રૂપે શનિવારે જણાવ્યું હતું કે તેના સ્થાપક જેક મા હવે ચીનની ફિનટેક જાયન્ટને નિયંત્રિત કરશે નહીં. એવું માનવામાં આવે છે કે બે વર્ષ પહેલા શેરબજારમાં પ્રવેશ્યા પછી તરત જ શરૂ કરવામાં આવેલી નિયમનકારી કાર્યવાહીને કારણે આ પગલું લેવામાં આવ્યું છે. જણાવી દઈએ કે એન્ટ ગ્રુપનો 37 અબજ ડોલરનો આઈપીઓ 2020માં છેલ્લી ઘડીએ રદ કરવામાં આવ્યો હતો. તે પછી, જાયન્ટ કંપનીનું બળજબરીથી પુનર્ગઠન કરવામાં આવ્યું હતું. ત્યારથી એવી અટકળો ચાલી રહી છે કે ચીની અબજોપતિ જેક મા નિયંત્રણ છોડી દેશે.
જો કે, કેટલાક વિશ્લેષકોએ કહ્યું છે કે માનું નિયંત્રણ છોડવાથી કંપની માટે IPOનો માર્ગ મોકળો થઇ શકે છે. આ ફેરફારને કારણે IPOમાં વધુ વિલંબ થવાની શક્યતા છે. ચીનના સ્થાનિક શેરબજારમાં, નિયંત્રણમાં ફેરફાર પછી કંપનીઓને સૂચિબદ્ધ કરવા માટે ત્રણ વર્ષ રાહ જોવી પડે છે. શાંઘાઈમાં નાસ્ડેક-સ્ટાઈલ માર્કેટમાં લિસ્ટિંગ માટે કંપનીઓએ બે વર્ષ અને હોંગકોંગમાં એક વર્ષ રાહ જોવી પડશે.
2020માં એક્સ્ચેન્જો સાથે ફાઇલ કરાયેલ એન્ટના IPO પ્રોસ્પેક્ટસ અનુસાર, જેક મા ઇ-કોમર્સ જાયન્ટ અલીબાબા ગ્રુપ હોલ્ડિંગ લિમિટેડની પેટાકંપની એન્ટમાં માત્ર 10% હિસ્સો ધરાવે છે, પરંતુ તે સંબંધિત સંસ્થાઓ દ્વારા કંપનીની માલિકી ધરાવે છે. એન્ટે હવે કહ્યું છે કે મા અને તેના અન્ય નવ મુખ્ય શેરધારકો એક સાથે તેમના મતદાન અધિકારોનો ઉપયોગ ન કરવા સંમત થયા છે. તેઓ હવે મુક્તપણે મતદાન કરશે. જો કે, એવું પણ કહેવામાં આવ્યું છે કે આનાથી એન્ટમાં શેરધારકોના આર્થિક હિતમાં કોઈ ફેરફાર થશે નહીં.
જેક મા પાસે અગાઉ એન્ટમાં 50%થી વધુ મતદાન અધિકારો હતા, પરંતુ આ ફેરફારથી તેમનો હિસ્સો ઘટીને 6.2% થઈ જશે. એન્ટે એમ પણ કહ્યું કે તે તેના બોર્ડમાં પાંચમા સ્વતંત્ર ડિરેક્ટરને સામેલ કરશે જેથી સ્વતંત્ર ડિરેક્ટર્સમાં કંપનીના બોર્ડમાં બહુમતીનો સમાવેશ થાય. હાલમાં તેના બોર્ડ ઓફ ડિરેક્ટર્સમાં આઠ લોકોનો સમાવેશ થાય છે.
