અફઘાનિસ્તાનની ક્રિકેટ ટીમે આંતરરાષ્ટ્રીય ક્રિકેટમાં વધુ એક મોટી સિદ્ધિ પોતાના નામે કરી છે. યુનાઇટેડ આરબ અમીરાતમાં રમાયેલી ટ્રાય-સિરીઝમાં શાનદાર વિજય મેળવ્યા બાદ અફઘાનિસ્તાનની ટીમે ICC મેન્સ ODI ટીમ રેન્કિંગમાં લાંબી છલાંગ લગાવી છે. શાનદાર પ્રદર્શનના જોરે અફઘાનિસ્તાને પૂર્વ વર્લ્ડ ચેમ્પિયન ઈંગ્લેન્ડની ટીમને પાછળ છોડીને સાતમું સ્થાન હાંસલ કરી લીધું છે, જ્યારે ખરાબ પ્રદર્શનના કારણે ઈંગ્લેન્ડની ટીમ આઠમા સ્થાને સરકી ગઈ છે.
ટ્રાય-સિરીઝના ફાઇનલમાં ઝિમ્બાબ્વેને આપી માત
શારજાહ ખાતે રમાયેલા આ ટ્રાય-સિરીઝના રોમાંચક ફાઇનલ મુકાબલામાં અફઘાનિસ્તાને શિસ્તબદ્ધ બોલિંગ અને બેટિંગનું ઉત્કૃષ્ટ પ્રદર્શન કર્યું હતું. અફઘાનિસ્તાનના ઘાતક બોલરોએ શાનદાર પ્રદર્શન કરતા ઝિમ્બાબ્વેની ટીમને માત્ર 169 રનમાં જ સમેટાઈ દીધી હતી. અફઘાનિસ્તાન તરફથી સ્ટાર સ્પિનર રાશિદ ખાને સૌથી વધુ 3 વિકેટ ઝડપી હતી, જ્યારે ફઝલહક ફારૂકી, મોહમ્મદ નબી અને બિલાલ સામીએ 2-2 વિકેટ મેળવીને વિપક્ષી બેટિંગ લાઇન-અપની કમર ભાંગી નાખી હતી.
ઇબ્રાહિમ ઝાદરાનની અણનમ ઇનિંગ
ઝિમ્બાબ્વે દ્વારા આપવામાં આવેલા 170 રનના લક્ષ્યાંકનો પીછો કરવા ઉતરેલી અફઘાનિસ્તાનની ટીમ માટે ઓપનર ઇબ્રાહિમ ઝાદરાને શાનદાર બેટિંગ કરી હતી. ઝાદરાને અણનમ 70 રનની સંયમિત અને વિજયી ઇનિંગ રમીને ટીમને આસાનીથી વિજય અપાવ્યો હતો. આ શાનદાર જીત અને સમગ્ર સિરીઝમાં સતત શ્રેષ્ઠ પ્રદર્શન કરવા બદલ રાશિદ ખાનને 'પ્લેયર ઓફ ધ સિરીઝ' જાહેર કરવામાં આવ્યા હતા, કેમ કે તેણે સમગ્ર ટૂર્નામેન્ટમાં કુલ 11 વિકેટ ઝડપી હતી.
રેન્કિંગમાં મોટો ફેરફાર અને ટોચની ટીમો
આ વિજય સાથે અફઘાનિસ્તાનના હવે 31 મેચોમાં 2926 પોઈન્ટ્સ અને 94 રેટિંગ થઈ ગઈ છે, જેનાથી તે છઠ્ઠા સ્થાને રહેલા શ્રીલંકાની બરાબર નજીક પહોંચી ગયું છે. બીજી તરફ, પાકિસ્તાન અને શ્રીલંકા સામે સતત હારનો સામનો કરનાર ઈંગ્લેન્ડની ટીમ 36 મેચોમાં 93 રેટિંગ સાથે આઠમા સ્થાને સરકી ગઈ છે. ICC ODI રેન્કિંગમાં હાલમાં ભારત 115 રેટિંગ સાથે પ્રથમ સ્થાને યથાવત છે, જ્યારે ન્યૂઝીલેન્ડ બીજા અને દક્ષિણ આફ્રિકા ત્રીજા સ્થાને છે.
આ પણ વાંચો: IND VS NZ: માત્ર 27 રન બનાવીને પણ અભિષેક શર્માએ રચ્યો ઇતિહાસ!
