ભારતીય ક્રિકેટના દિગ્ગજ અને પૂર્વ કેપ્ટન એમએસ ધોનીએ હૈદરાબાદના જ્યુબિલી હિલ્સમાં 7Padel MS Dhoni સ્પોર્ટ્સ અને વેલનેસ ફેસિલિટીનું ઉદ્ઘાટન કર્યું છે. ધોની સાથે પેડેલપાર્ક ઈન્ડિયાના કો-ફાઉન્ડર્સ નિખિલ સચદેવ, જિગર દોશી અને પ્રતિક દોશી પણ આ કાર્યક્રમમાં હાજર રહ્યા હતા. 15,000 ચોરસ ફૂટમાં બનેલી આ ઇન્ડોર સુવિધામાં પેડેલ, ફિટનેસ, રિકવરી અને વેલનેસને એક જ જગ્યાએ જોડવામાં આવ્યા છે.
3 પેડેલ કોર્ટથી લઈને જિમ સુધી
7Padelમાં કુલ 3 પેડેલ કોર્ટ બનાવવામાં આવ્યા છે. આ ઉપરાંત સંપૂર્ણ રીતે સજ્જ જિમ પણ છે. ખેલાડીઓ માટે રિકવરી સ્યુટમાં સોના, આઈસ બાથ અને ઇન્ફ્રારેડ રૂમની સુવિધા રાખવામાં આવી છે. આ સિવાય યોગા, પિલાટીસ અને બીજી એક્ટિવિટી માટે અલગ સ્ટુડિયો પણ બનાવવામાં આવ્યો છે. એટલે અહીં માત્ર પેડેલ રમવાની જ સુવિધા નથી, પરંતુ રમત પછી શરીરની રિકવરી અને ફિટનેસ પર પણ ધ્યાન આપવામાં આવ્યું છે.
કેફે અને દર્શકો માટે ગેલેરી પણ
આ સુવિધામાં એક કેફે પણ છે, જ્યાં ખેલાડીઓ અને મુલાકાતીઓ સમય પસાર કરી શકે છે. કોર્ટ પાસે દર્શકો માટે અલગ વ્યુઇંગ ગેલેરી બનાવવામાં આવી છે. 7Padelમાં સાધનો ભાડે લેવાની સુવિધા, સર્ટિફાઈડ કોચિંગ અને સ્થાનિક ટુર્નામેન્ટ પણ યોજવામાં આવશે. ખાસ વાત એ છે કે અહીં શરૂઆત કરનારા ખેલાડીઓથી લઈને અનુભવી ખેલાડીઓ સુધી બધા માટે જગ્યા રાખવામાં આવી છે.
રમત ઊભી કરવા શોર્ટકટ નથી
ઉદ્ઘાટન દરમિયાન એમએસ ધોનીએ ભારતમાં પેડેલના વિકાસ વિશે વાત કરી. તેમણે કહ્યું કે કોઈ પણ રમતને મોટી બનાવવા માટે કોઈ શોર્ટકટ નથી. સારી કોર્ટ બનાવવી, ખેલાડીઓની જરૂરિયાતનું ધ્યાન રાખવું અને દરેક વ્યક્તિ માટે રમતના દરવાજા ખુલ્લા રાખવા જરૂરી છે. ધોનીના જણાવ્યા પ્રમાણે શહેરે-શહેરે આવી સુવિધાઓ ઊભી થશે તો પેડેલ ભારતમાં ગ્રાસરૂટ લેવલથી આગળ વધશે. તેમણે હૈદરાબાદને પેડેલ માટે એક નવું પ્રકરણ ગણાવ્યું અને કહ્યું કે આ શરૂઆત છે, અંત નથી.
ભારતમાં ઝડપથી વધી રહ્યો છે પેડેલનો ક્રેઝ
પેડેલ ભારતમાં ઝડપથી લોકપ્રિય થઈ રહ્યો છે. પેડેલપાર્ક ઈન્ડિયાના જણાવ્યા પ્રમાણે દેશમાં 1.25 લાખથી વધુ એક્ટિવ પેડેલ ખેલાડીઓ છે અને કંપનીએ અત્યાર સુધીમાં 320થી વધુ કોર્ટ બનાવ્યા છે. 7Padel હાલમાં મુંબઈ, પુણે, બેંગલુરુ, ચેન્નાઈ અને દિલ્હીમાં 50થી વધુ માલિકીના અથવા મેનેજ કરાયેલા કોર્ટ ચલાવે છે. આ નેટવર્ક સાથે 55,000થી વધુ ખેલાડીઓ જોડાયેલા હોવાનું કંપનીનું કહેવું છે. કંપનીનું લક્ષ્ય 2027ના અંત સુધીમાં દેશમાં 500થી વધુ પેડેલ કોર્ટ બનાવવાનું છે.
આગળ બીજા શહેરોમાં પણ વિસ્તરણ
હૈદરાબાદ બાદ 7Padelનું વિસ્તરણ અન્ય શહેરોમાં પણ કરવાની યોજના છે. કોચી, કોઈમ્બતૂર, ચેન્નાઈ, જયપુર, મુંબઈ અને દિલ્હી-NCRમાં નવી સુવિધાઓ શરૂ કરવાની તૈયારી ચાલી રહી છે. હૈદરાબાદની જ્યુબિલી હિલ્સ સુવિધા સાથે ધોની અને પેડેલપાર્ક ઈન્ડિયાએ રમતને માત્ર કોર્ટ સુધી સીમિત ન રાખીને ફિટનેસ અને સોશિયલ એક્ટિવિટી સાથે જોડવાનો પ્રયાસ કર્યો છે. ભારતમાં પેડેલનો વધતો ક્રેઝ જોતા ધોનીનું આ ક્ષેત્રમાં રોકાણ રમતની લોકપ્રિયતાને વધુ વેગ આપી શકે છે.
આ પણ વાંચો: માનવતાના આધારે ઈમરાન ખાન સાથે જે થઈ રહ્યું છે તે યોગ્ય નથી- રવિ શાસ્ત્રી
