ભારતીય ક્રિકેટ ટીમના પૂર્વ વિસ્ફોટક ઓપનર વીરેન્દ્ર સેહવાગના દીકરા આર્યવીર સેહવાગે પોતાની શાનદાર બેટિંગથી ક્રિકેટપ્રેમીઓનું ધ્યાન ખેંચ્યું છે. વિનુ માંકડ ટ્રોફીની એલિટ મેચમાં દિલ્હી અંડર-19 ટીમના કેપ્ટન આર્યવીરે ચંડીગઢ અંડર-19 સામે 173 રનની ધમાકેદાર ઇનિંગ્સ રમી હતી. તેની આ ઇનિંગ્સના આધારે દિલ્હીની ટીમે 50 ઓવરમાં 6 વિકેટ ગુમાવીને 289 રન બનાવ્યા હતા.
આર્યવીરે 143 બોલમાં ફટકાર્યા 173 રન
ચંડીગઢ સામેની મેચમાં દિલ્હી અંડર-19ની શરૂઆત સારી રહી હતી. આર્યવીર સેહવાગ અને આર્યન બગ્ગાએ પ્રથમ વિકેટ માટે 98 રનની ભાગીદારી કરી હતી. આર્યન બગ્ગા 39 બોલમાં 47 રન બનાવીને આઉટ થયો હતો.બીજી તરફ, આર્યવીરે પોતાની આક્રમક બેટિંગ ચાલુ રાખી હતી. તેણે માત્ર 143 બોલમાં 173 રન બનાવ્યા હતા. તેની ઇનિંગ્સમાં 19 ચોગ્ગા અને 8 છગ્ગાનો સમાવેશ થાય છે. આ રીતે તેણે કુલ 27 બાઉન્ડરી ફટકારીને માત્ર ચોગ્ગા-છગ્ગાથી જ 124 રન બનાવ્યા હતા.આર્યવીરની બેટિંગમાં આક્રમકતા અને લાંબી ઇનિંગ્સ રમવાની ક્ષમતા જોવા મળી હતી. તેના પ્રદર્શનથી દિલ્હી અંડર-19 ટીમને મોટો સ્કોર ઊભો કરવામાં મદદ મળી હતી.
દિલ્હીનો અન્ય બેટરો મોટો સ્કોર કરવામાં નિષ્ફળ
આર્યવીર સિવાય દિલ્હીના અન્ય બેટરો મોટી ઇનિંગ્સ રમવામાં સફળ રહ્યા નહોતા. શ્રીહન આહુજાએ 3 રન બનાવ્યા હતા, જ્યારે વિકેટકીપર અભિરાજ ગગન સિંહે 18 રનનું યોગદાન આપ્યું હતું. ઉદય ચાવલા 7 રન બનાવીને આઉટ થયો હતો.ઇનિંગ્સના અંતિમ તબક્કામાં શાંતનુ યાદવે અણનમ 27 રન બનાવ્યા હતા, જ્યારે ઓમે અણનમ 8 રનનું યોગદાન આપ્યું હતું. યથાર્થ સિંહ ચૌહાણ પોતાનું ખાતું ખોલ્યા વિના રનઆઉટ થયો હતો.આ રીતે દિલ્હીની ટીમે નિર્ધારિત 50 ઓવરમાં 6 વિકેટે 289 રન બનાવ્યા હતા. ટીમ માટે આર્યવીરની ઇનિંગ્સ સૌથી મહત્ત્વપૂર્ણ રહી હતી.
ચંડીગઢના બોલરોને આર્યવીરે પડકાર આપ્યો
ચંડીગઢ અંડર-19 તરફથી રૂપેશ યાદવે સૌથી વધુ 2 વિકેટ ઝડપી હતી. તેણે 10 ઓવરમાં 42 રન આપ્યા હતા અને 2 ઓવર મેઇડન ફેંકી હતી.તેના સિવાય શ્રેષ્ઠ દુગ્ગલ, ગગનપ્રીત સિંહ અને અભય સિંહે 1-1 વિકેટ મેળવી હતી. જોકે, આર્યવીરની આક્રમક બેટિંગને રોકવામાં બોલરોને મુશ્કેલી પડી હતી.
સેહવાગના દીકરાની બેટિંગ પર ચાહકોની નજર
વીરેન્દ્ર સેહવાગ પોતાની આક્રમક બેટિંગ માટે જાણીતા રહ્યા છે. હવે તેમના દીકરા આર્યવીરે પણ યુવા ક્રિકેટમાં શાનદાર ઇનિંગ્સ રમીને ચર્ચા જગાવી છે. દિલ્હી અંડર-19 ટીમની કેપ્ટનશિપની જવાબદારી સંભાળતા આર્યવીર માટે આ પ્રદર્શન મહત્ત્વપૂર્ણ છે.જોકે, યુવા ક્રિકેટમાં એક મોટી ઇનિંગ્સ બાદ સતત સારો દેખાવ જાળવવો પણ એટલો જ જરૂરી છે. આર્યવીર આગામી મેચોમાં કેવું પ્રદર્શન કરે છે તેના પર ક્રિકેટપ્રેમીઓની નજર રહેશે.
આ પણ વાંચો- IND vs WI 5th T20 : ભારતની 7 વર્ષની બાદશાહત પર સંકટ! શું વેસ્ટ ઇન્ડિઝ રચશે ઇતિહાસ?
