એશિયન ગેમ્સ 2026માં પાકિસ્તાન ક્રિકેટ ટીમના અભિયાનની શરૂઆત પહેલાં જ ટીમને મોટો ઝટકો લાગ્યો છે. પાકિસ્તાનનો ડાબોડી ઝડપી બોલર સલમાન મિર્ઝા ઈજાના કારણે સમગ્ર ટૂર્નામેન્ટમાંથી બહાર થઈ ગયો છે. તેની જગ્યાએ પાકિસ્તાન ક્રિકેટ બોર્ડે ઝડપી બોલર મોહમ્મદ વસીમ જુનિયરને ટીમમાં સામેલ કર્યો છે.પાકિસ્તાન ક્રિકેટ બોર્ડના જણાવ્યા અનુસાર સલમાન મિર્ઝાના ડાબા હાથના અંગૂઠામાં ફ્રેક્ચર થયું છે. ઈજાના કારણે તે એશિયન ગેમ્સમાં પાકિસ્તાનનું પ્રતિનિધિત્વ કરી શકશે નહીં.તેના સ્થાને સામેલ કરવામાં આવેલા મોહમ્મદ વસીમ જુનિયરનો આંતરરાષ્ટ્રીય ક્રિકેટમાં સારો અનુભવ છે. તે પાકિસ્તાન માટે અત્યાર સુધી 34 T20I મેચ રમી ચૂક્યો છે.
28 સપ્ટેમ્બરે પાકિસ્તાનની પ્રથમ મેચ
એશિયન ગેમ્સ 2026માં પુરુષોની ક્રિકેટ સ્પર્ધા 24 સપ્ટેમ્બરથી જાપાનના આઇચી પ્રાંતના કોરોજી એથ્લેટિક પાર્કમાં શરૂ થવાની છે. મેડલ માટેના મુકાબલા 3 ઓક્ટોબરે રમાશે.આ ટૂર્નામેન્ટમાં પાકિસ્તાનની ટીમની કેપ્ટનશિપ સાહિબઝાદા ફરહાન કરશે. પાકિસ્તાન પોતાની પ્રથમ ક્વાર્ટર ફાઇનલ મેચ 28 સપ્ટેમ્બરે એક ક્વોલિફાઇંગ ટીમ સામે રમશે.
પાકિસ્તાનની ટીમનું ટ્રેનિંગ કેમ્પ શરૂ
એશિયન ગેમ્સની પુરુષોની ક્રિકેટ સ્પર્ધામાં કુલ 10 ટીમો ભાગ લઈ રહી છે. ભારત, પાકિસ્તાન, શ્રીલંકા, બાંગ્લાદેશ, અફઘાનિસ્તાન અને યજમાન જાપાનને સીધી એન્ટ્રી આપવામાં આવી છે. જ્યારે નેપાળ, મલેશિયા, હોંગકોંગ અને ઓમાન ક્વોલિફાઇંગ મેચો દ્વારા ટૂર્નામેન્ટમાં પહોંચ્યા છે.દરમિયાન પાકિસ્તાન ક્રિકેટ ટીમ રવિવારે કરાચીમાં એકઠી થઈ હતી. ટીમનું ટ્રેનિંગ કેમ્પ 21 સપ્ટેમ્બરથી 24 સપ્ટેમ્બર સુધી હનીફ મોહમ્મદ હાઇ-પરફોર્મન્સ સેન્ટરમાં યોજાશે. આ કેમ્પ પૂર્ણ થયા બાદ પાકિસ્તાનની ટીમ 24 સપ્ટેમ્બરની રાત્રે જાપાન માટે રવાના થશે.
એશિયન ગેમ્સ માટે પાકિસ્તાનની ટીમ
પાકિસ્તાનની ટીમમાં સાહિબઝાદા ફરહાનને કેપ્ટન અને અબ્દુલ સમદને વાઇસ કેપ્ટનની જવાબદારી સોંપવામાં આવી છે.
પાકિસ્તાનનો સ્ક્વોડ:
સાહિબઝાદા ફરહાન કેપ્ટન, અબ્દુલ સમદ વાઇસ કેપ્ટન, અબરાર અહેમદ, અહેમદ દાનિયાલ, આકિફ જાવેદ, અલી રઝા, અરાફાત મિનહાસ, હૈદર અલી, હસન નવાઝ, મજ સદાકત, મોહમ્મદ વસીમ જુનિયર, સાદ મસૂદ, સઈમ અયૂબ, સુફિયાન મુકીમ અને ઉસ્માન ખાન વિકેટકીપર.
પાકિસ્તાનની મહિલા ટીમ પાસે બ્રોન્ઝ જીતવાની તક
એશિયન ગેમ્સમાં પાકિસ્તાનની મહિલા ક્રિકેટ ટીમને 20 સપ્ટેમ્બરે રમાયેલી સેમિફાઇનલમાં હારનો સામનો કરવો પડ્યો હતો. શ્રીલંકાએ પાકિસ્તાનને 8 વિકેટે હરાવીને ફાઇનલમાં સ્થાન મેળવ્યું હતું.હવે શ્રીલંકાની મહિલા ટીમ ગોલ્ડ મેડલ માટે ભારત સામે ટકરાશે. બીજી તરફ પાકિસ્તાનની મહિલા ટીમ પાસે બ્રોન્ઝ મેડલ જીતવાની તક રહેશે. બ્રોન્ઝ મેડલ માટે પાકિસ્તાનનો મુકાબલો બાંગ્લાદેશ સામે થશે.
આ પણ વાંચો - CPL 2026 Final: 21 વર્ષના માઝ સદાકતની તોફાની સદી, ફાઇનલમાં રચ્યો ઇતિહાસ
