ન્યુઝીલેન્ડની ધરતી પર ભારતીય બેટ્સમેન દેવદત્ત પડિક્કલે પોતાના ક્લાસ અને ધૈર્યનું અદભુત પ્રદર્શન કરીને ક્રિકેટ જગતમાં સનસનાટી મચાવી દીધી છે. લિંકનના બર્ટ સટક્લિફ ઓવલ મેદાન પર ચાલી રહેલી બિનસત્તાવાર ટેસ્ટ મેચમાં ઇન્ડિયા એ મુશ્કેલ પરિસ્થિતિમાં મુકાઈ હતી, પરંતુ પડિક્કલની શાનદાર બેટિંગે મેચનું પાસું પલટી નાખ્યું. તેણે માત્ર સદી જ નથી ફટકારી, પરંતુ 150થી વધુ રન બનાવીને રેડ બોલ ક્રિકેટમાં પોતાની સર્વશ્રેષ્ઠ ઇનિંગ્સ રમી છે.
છગ્ગા સાથે સદી પૂરી, 12મી ફર્સ્ટ ક્લાસ સેન્ચુરી
મેચના ત્રીજા દિવસે પડિક્કલે પોતાની ઇનિંગ્સ 56 રનથી આગળ ધપાવી હતી. કિવી બોલરો સામે આક્રમક વલણ અપનાવતાં તેણે માત્ર 128 બોલમાં સિક્સર ફટકારીને પોતાની સદી પૂર્ણ કરી હતી. પડિક્કલની ફર્સ્ટ ક્લાસ કરિયરની આ 12મી સદી છે. આ મોટી ઇનિંગ્સ સાથે તેણે ઇન્ડિયા એ તરફથી ફર્સ્ટ ક્લાસ ક્રિકેટમાં પોતાના 1000 રન પણ પૂરા કરી લીધા છે. ઇન્ડિયા એ માટે અત્યાર સુધી રમેલી 16 મેચોમાં આ તેની ત્રીજી સદી બની ગઈ છે.
સાઈ સુદર્શન સાથે 215 રનની તારણહાર ભાગીદારી
પ્રથમ ઇનિંગ્સમાં માત્ર 113 રનમાં સમેટાઈ ગયેલી ભારતીય ટીમ ન્યૂઝીલેન્ડ સામે 204 રનથી પાછળ હતી. બીજી ઇનિંગ્સની શરૂઆતમાં પણ પરિસ્થિતિ ગંભીર બની ગઈ હતી, જ્યારે યશસ્વી જયસ્વાલ (5) અને કે.એલ. રાહુલ (5) સસ્તામાં આઉટ થઈ ગયા હતા. માત્ર 10 રનમાં બે ટોપ ઓર્ડર વિકેટ ગુમાવ્યા બાદ ટીમ દબાણમાં આવી ગઈ હતી.
રાષ્ટ્રીય ટીમમાં વાપસી માટે દાવેદારી મજબૂત
ઓસ્ટ્રેલિયા એ સામેના પાછલા પ્રવાસમાં પડિક્કલનું ફોર્મ ચિંતાનો વિષય બન્યું હતું, જ્યાં પુડુચેરીમાં રમાયેલી ત્રણ વન-ડે મેચોમાં તે માત્ર 3 રન બનાવી શક્યો હતો. જોકે, ઓગસ્ટમાં શ્રીલંકાના પ્રવાસમાં તેણે ત્રણ સદી ફટકારી હતી. હવે ન્યૂઝીલેન્ડની ઝડપી અને ઉછાળવાળી પિચો પર રમેલી આ 150 રનની ઇનિંગ્સે ફરી સાબિત કરી દીધું છે કે ટેકનિક અને ધીરજની બાબતમાં તે રાષ્ટ્રીય ટીમ માટે એક મજબૂત વિકલ્પ છે.
આ પણ વાંચો - જ્યાં દોડ્યા હતા પાન સિંહ તોમર અને રેલવેએ જીત્યો હતો રણજી ખિતાબ: Karnail Singh Stadiumના ભવિષ્ય પર સવાલ
