ભારત અને પાકિસ્તાન વચ્ચેની ક્રિકેટ મેચ હોય ત્યારે દરેક નિર્ણય પર ખેલાડીઓ, ચાહકો અને નિષ્ણાતોની નજર રહે છે. ખાસ કરીને LBW, કેચ કે બેટને અડેલા બોલ જેવા નિર્ણયો મેચનું પાસું પલટી શકે છે. પરંતુ 22 નવેમ્બરે દોહામાં રમાઈ રહેલી ભારત A અને પાકિસ્તાન A વચ્ચેની રાઇઝિંગ સ્ટાર્સ એશિયા કપની મેચમાં એક મોટી સુવિધા જ ઉપલબ્ધ નથી. આ ટુર્નામેન્ટમાં DRS રાખવામાં આવ્યું નથી. એટલે અમ્પાયરનો કોઈ નિર્ણય ખોટો લાગ્યો હોય તો પણ ખેલાડીઓ તેને પડકારી શકશે નહીં. આ પાછળ ખર્ચ અને મેદાન પર જરૂરી ટેકનિકલ વ્યવસ્થા ઊભી કરવાની મર્યાદા મુખ્ય કારણ છે.
DRS વગર મેચ રમાવાથી શું થશે?
DRS એટલે ડિસિઝન રિવ્યૂ સિસ્ટમ. આ ટેકનોલોજીની મદદથી બેટિંગ કરતી કે બોલિંગ કરતી ટીમ મેદાન પરના અમ્પાયરના કેટલાક નિર્ણયો સામે અપીલ કરી શકે છે. તેમાં LBW, કેચ પાછળનો નિર્ણય અને બેટને અડેલા બોલ જેવી બાબતોની તપાસ થાય છે. પરંતુ રાઇઝિંગ સ્ટાર્સ એશિયા કપ 2026માં આ સુવિધા ઉપલબ્ધ નથી. એટલે અમ્પાયર કોઈ બેટરને LBW આપે અથવા કેચ પાછળ આઉટ જાહેર કરે તો ખેલાડીઓ DRS લઈને નિર્ણયની ફરી તપાસ કરાવી શકશે નહીં. મેદાન પરના અમ્પાયરનો નિર્ણય જ અંતિમ ગણાશે.
DRS કેમ રાખવામાં આવ્યું નથી?
આ પાછળનું મુખ્ય કારણ ખર્ચ અને ટેકનિકલ વ્યવસ્થાની મર્યાદા છે. DRS માટે હોક-આઇ બોલ ટ્રેકિંગ, અલ્ટ્રાએજ અને હાઇ-સ્પીડ કેમેરા જેવી મોંઘી ટેકનોલોજીની જરૂર પડે છે. આ ઉપરાંત તેને ચલાવવા માટે નિષ્ણાત ટેકનિકલ કર્મચારીઓની પણ જરૂર હોય છે. આ ટુર્નામેન્ટની મેચો દોહાનાં બે મેદાનો પર રમાઈ રહી છે. બંને સ્થળે DRSની સંપૂર્ણ વ્યવસ્થા ઊભી કરવી અને તેનું સંચાલન કરવું આયોજકો માટે ખર્ચાળ બની શકે છે. તેથી ટુર્નામેન્ટમાં સાદી પ્રસારણ વ્યવસ્થા રાખવામાં આવી છે.
ભારત-પાકિસ્તાનની મેચમાં નિર્ણયનું મહત્ત્વ
ભારત A અને પાકિસ્તાન A વચ્ચેની મેચમાં DRS ન હોવાની બાબત ખાસ ચર્ચામાં છે. બંને ટીમો વચ્ચેની હરીફાઈમાં નાનામાં નાનો નિર્ણય પણ મોટો ફરક પાડી શકે છે. LBWની અપીલ હોય કે કેચ અંગેનો વિવાદ, ખેલાડીઓ પાસે હવે મેદાન પરના અમ્પાયરના નિર્ણયને પડકારવાનો વિકલ્પ નથી. જોકે, રનઆઉટ, સ્ટમ્પિંગ અને બાઉન્ડ્રી જેવા સ્પષ્ટ લાઇન સંબંધિત નિર્ણયો માટે ટીવી રિપ્લેનો ઉપયોગ થઈ શકે છે. પરંતુ DRS દ્વારા મળતી બોલ ટ્રેકિંગ અને અલ્ટ્રાએજ જેવી સંપૂર્ણ તપાસની સુવિધા આ ટુર્નામેન્ટમાં નથી.
ટુર્નામેન્ટમાં કેટલી ટીમો ભાગ લઈ રહી છે?
રાઇઝિંગ સ્ટાર્સ એશિયા કપ 2026માં કુલ આઠ ટીમો ભાગ લઈ રહી છે. તેમને બે ગ્રૂપમાં વહેંચવામાં આવી છે. દરેક ગ્રૂપમાંથી ટોચની બે ટીમ સેમિફાઇનલમાં પહોંચશે. આ ટુર્નામેન્ટ 19થી 29 નવેમ્બર દરમિયાન રમાઈ રહી છે.
ભારત Aએ પોતાની પ્રથમ મેચમાં નેપાળ Aને 306 રનથી હરાવી હતી. બીજી તરફ પાકિસ્તાન Aએ યુએઈને 61 રનથી હરાવીને ટુર્નામેન્ટની શરૂઆત કરી હતી. બંને ટીમો વચ્ચેની આ મેચ ગ્રૂપ B માટે મહત્ત્વની છે.
આ પણ વાંચો: IND A VS PAK A: મેચમાં ગરમાયું વાતાવરણ, હર્ષિત રાણા અને શમિલ હુસૈન વચ્ચે મેદાન પર બબાલ