ભારત સામે રમાનારી આગામી પાંચ મેચની T20 આંતરરાષ્ટ્રીય સીરિઝ માટે ઇંગ્લેન્ડ ક્રિકેટ બોર્ડે તેમની 17 સભ્યોની મજબૂત ટીમની જાહેરાત કરી દીધી છે. આ રોમાંચક સીરિઝમાં સ્ટાર બેટ્સમેન હેરી બ્રુક ઇંગ્લેન્ડની ટીમનું નેતૃત્વ કરતો જોવા મળશે. ન્યૂઝીલેન્ડ સામેની બીજી ટેસ્ટ મેચ માટે ભલે બ્રુકની પસંદગી ન થઈ હોય, પરંતુ ફરી એક વાર ઇંગ્લેન્ડ ક્રિકેટમાં બોર્ડે તેના પર સંપૂર્ણ ભરોસો મૂક્યો છે.
22 વર્ષીય જેમ્સ કોલ્સને ટીમમાં મળ્યું સ્થાન
આ ટીમની સૌથી મોટી ખાસિયત 22 વર્ષીય યુવા ઓલરાઉન્ડર જેમ્સ કોલ્સની પસંદગી છે. સસેક્સ તરફથી રમતા આ ખેલાડીએ સ્થાનિક ક્રિકેટમાં પોતાના શાનદાર પ્રદર્શનના જોરે રાષ્ટ્રીય ટીમમાં જગ્યા બનાવી છે. તાજેતરમાં જ તેણે કાઉન્ટી ચેમ્પિયનશિપમાં ગ્લેમોર્ગન સામે અણનમ 224 રનની મેરેથોન ઇનિંગ રમીને સનસનાટી મચાવી દીધી હતી, જે તેના ફર્સ્ટ-ક્લાસ કરિયરનો સર્વશ્રેષ્ઠ સ્કોર છે. આ ઉપરાંત ગયા વર્ષના T20 બ્લાસ્ટમાં પણ તેણે બેટ અને બોલ બંને વડે ધમાકેદાર પ્રદર્શન કર્યું હતું.
