ભારતીય પુરુષ ક્રિકેટ ટીમના મુખ્ય પસંદગીકાર (Chief Selector) તરીકે અજિત અગરકરનો કાર્યકાળ મંગળવારે ઔપચારિક રીતે પૂર્ણ થઈ ગયો છે. 2023માં આ પદ સંભાળનાર અગરકરે પોતાના કાર્યકાળના વિસ્તરણની માંગ કરી ન હતી. તેમના રાજીનામા બાદ સમગ્ર ક્રિકેટ જગતમાંથી વિદાય સંદેશાઓ આવી રહ્યા છે, જેમાં ટીમ ઈન્ડિયાના હેડ કોચ ગૌતમ ગંભીરે સોશિયલ મીડિયા પર એક અત્યંત ભાવનાત્મક નોટ શેર કરી અગરકરના નિર્ણયો અને યોગદાનને બિરદાવ્યા છે.
ગૌતમ ગંભીરનો ખાસ સંદેશ અને 3 ICC ટ્રોફીનો ઉલ્લેખ
ગૌતમ ગંભીરે અગરકર સાથે કામ કરવાના અનુભવને યાદ કરતા લખ્યું, "પ્રિય અજિત ભાઈ, તમારી સાથે કામ કરવું મારા માટે ખૂબ જ સન્માનની વાત રહી છે. તમે જીતેલી ત્રણ ICC ટ્રોફી એ બાબતનો પુરાવો છે કે તમારા માટે હંમેશા 'ટીમ પહેલા' હતી. મારે કહેવું જ જોઇએ કે ઇતિહાસ તમારી સાથે વધુ ઉદાર રહેશે. ભવિષ્ય માટે મારી હાર્દિક શુભેચ્છાઓ." ગંભીરે સ્પષ્ટ કર્યું કે પસંદગીકારનું કામ લોકપ્રિય નિર્ણયો લેવાનું નથી, પરંતુ ટીમ માટે સાચા અને મજબૂત નિર્ણયો લેવાનું હોય છે.
સફળતાઓથી ભરેલો રહ્યો અજિત અગરકરનો કાર્યકાળ
અજિત અગરકરના કાર્યકાળ દરમિયાન ભારતીય ટીમે ઈન્ટરનેશનલ ક્રિકેટમાં શાનદાર પ્રદર્શન કર્યું હતું. ટીમ ઈન્ડિયા 2023ના ODI વર્લ્ડ કપની ફાઈનલમાં પહોંચી હતી, જ્યારે 2024 T20 વર્લ્ડ કપ, 2025 ચેમ્પિયન્સ ટ્રોફી અને 2026 T20 વર્લ્ડ કપ એમ સળંગ ત્રણ મોટી ICC ટ્રોફી પોતાના નામે કરી હતી. જોકે, તેમના કાર્યકાળમાં કેટલીક પસંદગીઓ અને ભવિષ્યની યોજનાઓને લઈને વિવાદો અને ચર્ચાઓ પણ થઈ હતી, છતાં પરિણામોએ તેમની ક્ષમતા સાબિત કરી બતાવી હતી.
અજિત અગરકર બાદ કોણ, BCCIએ મંગાવી અરજીઓ
BCCIએ મંગાવી અરજીઓ, પ્રજ્ઞાન ઓઝા વચગાળાના મુખ્ય પસંદગીકારઅગરકરનો કાર્યકાળ પૂરો થતાં જ BCCIએ પુરુષ પસંદગી સમિતિમાં ખાલી પડેલા ચીફ સિલેક્ટરના પદ માટે નવી અરજીઓ મંગાવવાની પ્રક્રિયા શરૂ કરી દીધી છે. હાલના તબક્કે પૂર્વ સ્પિનર પ્રજ્ઞાન ઓઝા વચગાળાના મુખ્ય પસંદગીકાર (Interim Chief Selector) તરીકેની જવાબદારી સંભાળી રહ્યા છે. હવે અગરકરની જગ્યાએ ભારતીય ક્રિકેટના આ મહત્વના પદ પર કોની પસંદગી થાય છે તેના પર સૌની નજર ટકેલી છે.