ભારતીય મહિલા ક્રિકેટ ટીમે ઝિમ્બાબ્વે સામેની ત્રણ મેચની T20 સિરીઝમાં 3-0થી ક્લીન સ્વીપ કર્યું છે. રાયપુરમાં રમાયેલી ત્રીજી અને છેલ્લી મેચમાં ભારતે ઝિમ્બાબ્વેને 92 રનથી હરાવ્યું હતું. ભારતે પહેલાં બેટિંગ કરતાં 20 ઓવરમાં 7 વિકેટે 216 રન બનાવ્યા હતા. હરમનપ્રીત કૌરે 41 બોલમાં અણનમ 91 રન ફટકાર્યા, જ્યારે શેફાલી વર્માએ 37 બોલમાં 69 રન બનાવ્યા હતા. જવાબમાં ઝિમ્બાબ્વેની ટીમ 20 ઓવરમાં 7 વિકેટે 124 રન જ બનાવી શકી હતી. ભારત તરફથી નંદની શર્માએ 3 વિકેટ લઈને જીતમાં મહત્વનું યોગદાન આપ્યું.

હરમનપ્રીત કૌરે 41 બોલમાં ફટકાર્યા 91 રન

ભારતે પહેલાં બેટિંગ કરતાં આક્રમક શરૂઆત કરી હતી. શેફાલી વર્મા અને અનુષ્કા શર્માએ પ્રથમ વિકેટ માટે 32 બોલમાં 54 રનની ભાગીદારી કરી હતી. અનુષ્કાએ 20 બોલમાં 28 રન બનાવ્યા હતા, જ્યારે શેફાલીએ 37 બોલમાં 69 રનની ધમાકેદાર ઇનિંગ રમી હતી. તેની ઇનિંગમાં 6 ચોગ્ગા અને 5 છગ્ગા સામેલ હતા. શેફાલી આઉટ થયા બાદ હરમનપ્રીત કૌરે મોરચો સંભાળ્યો હતો. તેણે માત્ર 41 બોલમાં અણનમ 91 રન ફટકાર્યા હતા. તેની ઇનિંગમાં 10 ચોગ્ગા અને 5 છગ્ગા સામેલ હતા. હરમનપ્રીતની આક્રમક બેટિંગના કારણે ભારતે છેલ્લી 5 ઓવરમાં 62 રન બનાવ્યા હતા અને સ્કોર 216 સુધી પહોંચાડ્યો હતો.

નંદની શર્માની શાનદાર બોલિંગ

217 રનના લક્ષ્યનો પીછો કરવા ઉતરેલી ઝિમ્બાબ્વેની ટીમ ભારતીય બોલિંગ સામે સંઘર્ષ કરતી જોવા મળી હતી. શાર્ને મેયર્સે 49 બોલમાં 60 રન બનાવીને લડત આપવાનો પ્રયાસ કર્યો હતો, પરંતુ તેને બીજા બેટ્સમેનોનો પૂરતો સાથ મળ્યો નહોતો. ભારત તરફથી નંદની શર્માએ 18 રન આપીને 3 વિકેટ લીધી હતી. ક્રાંતિ ગૌડ, દીપ્તિ શર્મા, અરુન્ધતી રેડ્ડી અને નિકી પ્રસાદે પણ વિકેટ મેળવી હતી. ઝિમ્બાબ્વેની ટીમ 20 ઓવરમાં 7 વિકેટે 124 રન જ બનાવી શકી હતી અને ભારતે 92 રનથી મેચ જીતી લીધી હતી.

ભારતે 3-0થી સિરીઝ જીતી

ભારતીય ટીમે આ જીત સાથે ત્રણ મેચની T20 સિરીઝમાં ઝિમ્બાબ્વેનો 3-0થી સફાયો કર્યો છે. આ જીત સાથે ભારતની સતત T20 આંતરરાષ્ટ્રીય મેચ જીતવાની સંખ્યા 11 થઈ ગઈ છે. ઘરઆંગણે રનના તફાવતથી ભારતની આ સૌથી મોટી T20 આંતરરાષ્ટ્રીય જીત પણ બની છે. હવે ભારત અને ઝિમ્બાબ્વે વચ્ચે ત્રણ મેચની વનડે સિરીઝ રમાશે. તેની પ્રથમ મેચ 23 ઓક્ટોબરે વડોદરામાં રમાશે.

આ પણ વાંચો: Bhuvneshwar Kumarના નિશાના પર 2 મોટા રેકોર્ડ, ન્યૂઝીલેન્ડ સામે રેકોર્ડ તોડવાની તક!