ભારતીય ટીમના અનુભવી બેટ્સમેન કેએલ રાહુલે ન્યૂઝીલેન્ડ સામેની પ્રથમ ટેસ્ટ મેચમાં શાનદાર બેટિંગ કરીને ઇતિહાસ રચ્યો છે.વેલિંગ્ટનના બેસિન રિઝર્વ મેદાન પર રમાઈ રહેલી આ મેચમાં રાહુલે બીજા દિવસની રમત પૂરી થઈ ત્યારે અણનમ 52 રન બનાવ્યા હતા.જોકે આ અડધી સદી સાથે જ તેણે એવી સિદ્ધિ મેળવી છે,જે ભારતના પૂર્વ વિસ્ફોટક ઓપનર વીરેન્દ્ર સેહવાગ પણ પોતાની કારકિર્દીમાં મેળવી શક્યા નહોતા.રાહુલ હવે SENA દેશોની ધરતી પર ટેસ્ટ ક્રિકેટમાં અડધી સદી ફટકારનારા ભારતના પ્રથમ ઓપનર બન્યા છે. આ સાથે તેની પાસે ત્રીજા દિવસે વધુ એક મોટો રેકોર્ડ બનાવવાની તક પણ રહેશે.
SENA દેશોમાં અડધી સદી ફટકારનાર પ્રથમ ભારતીય ઓપનર
ન્યૂઝીલેન્ડ સામેની પ્રથમ ટેસ્ટમાં 50 રનનો આંકડો પાર કરવાની સાથે જ કેએલ રાહુલે ખાસ સિદ્ધિ મેળવી છે.તેણે ઓસ્ટ્રેલિયા,ઇંગ્લેન્ડ અને દક્ષિણ આફ્રિકાની ધરતી પર અગાઉ સદી ફટકારી હતી.હવે ન્યૂઝીલેન્ડ સામે પણ અડધી સદી ફટકારીને તેણે ચારેય SENA દેશોમાં ટેસ્ટ ક્રિકેટમાં 50થી વધુ રન બનાવવાનો રેકોર્ડ પોતાના નામે કર્યો છે.SENA દેશોમાં દક્ષિણ આફ્રિકા,ઇંગ્લેન્ડ,ન્યૂઝીલેન્ડ અને ઓસ્ટ્રેલિયાનો સમાવેશ થાય છે.આ ચારેય દેશોમાં ટેસ્ટ ક્રિકેટ રમવી ભારતીય બેટ્સમેનો માટે પડકારજનક માનવામાં આવે છે.અહીંની પીચ પર ઝડપી બોલરોને સ્વિંગ અને ઉછાળનો ફાયદો મળે છે.આવી પરિસ્થિતિમાં રાહુલે સતત સારા પ્રદર્શનથી પોતાની ક્ષમતા સાબિત કરી છે.
