ઈંગ્લેન્ડે પાકિસ્તાનમાં રમાનારી વનડે ટ્રાઈ-સિરીઝ માટે પોતાની 16 સભ્યોની ટીમ જાહેર કરી છે. ટીમમાં સૌથી વધુ ચર્ચા મેસન ક્રેનની વાપસીની થઈ રહી છે. લેગ સ્પિનર મેસન ક્રેન લગભગ 8 વર્ષ બાદ ઈંગ્લેન્ડની આંતરરાષ્ટ્રીય ટીમમાં પાછો ફર્યો છે. આ ટ્રાઈ-સિરીઝમાં ઈંગ્લેન્ડ ઉપરાંત પાકિસ્તાન અને શ્રીલંકા ભાગ લેશે.
8 વર્ષ બાદ મેસન ક્રેનની વાપસી
29 વર્ષીય મેસન ક્રેને જાન્યુઆરી 2018માં ઓસ્ટ્રેલિયા સામે સિડની ટેસ્ટમાં ઈંગ્લેન્ડ માટે છેલ્લી આંતરરાષ્ટ્રીય મેચ રમી હતી. તે ટેસ્ટમાં તેને માત્ર એક જ વખત ઈંગ્લેન્ડ તરફથી રમવાની તક મળી હતી. આ ઉપરાંત તે 2017માં ઈંગ્લેન્ડ માટે 2 ટી20 મેચ પણ રમી ચૂક્યો છે. હવે લગભગ 8 વર્ષ બાદ તેને ફરીથી આંતરરાષ્ટ્રીય ટીમમાં સ્થાન મળ્યું છે. ખાસ વાત એ છે કે ક્રેને હજુ સુધી ઈંગ્લેન્ડ માટે એક પણ વનડે મેચ રમી નથી. ગ્લેમોર્ગન માટે સ્થાનિક ક્રિકેટમાં તેના સતત સારા પ્રદર્શનને ધ્યાનમાં રાખીને પસંદગીકારોએ તેને તક આપી છે.
આદિલ રાશિદ અને સેમ કરન પરત ફર્યા
ઈંગ્લેન્ડની ટીમમાં અનુભવી લેગ સ્પિનર આદિલ રાશિદ અને ઓલરાઉન્ડર સેમ કરનની પણ વાપસી થઈ છે. બંને ખેલાડીઓ ઈજાના કારણે શ્રીલંકા સામેની તાજેતરની વનડે સિરીઝમાં રમી શક્યા નહોતા. આદિલ રાશિદ હાથની ઈજામાંથી સાજો થયા બાદ ટીમમાં પાછો આવ્યો છે, જ્યારે સેમ કરન ગ્રોઈન ઈજામાંથી સાજો થઈને ટીમમાં સામેલ થયો છે. બીજી તરફ ઝડપી બોલર જોફ્રા આર્ચરને વ્યસ્ત સિઝન બાદ વર્કલોડ મેનેજમેન્ટ હેઠળ આરામ આપવામાં આવ્યો છે.
જોશ બટલર પણ ટીમમાં નહીં હોય
ઈંગ્લેન્ડના અનુભવી વિકેટકીપર-બેટર જોશ બટલર પણ પાકિસ્તાન પ્રવાસ પર નહીં જાય. શ્રીલંકા સામેની બીજી વનડે દરમિયાન તેને હેમસ્ટ્રિંગ ઈજા થઈ હતી. આ ઈજાના કારણે તે ટ્રાઈ-સિરીઝમાંથી બહાર છે. બટલરની ગેરહાજરીમાં જોર્ડન કોક્સને ફરીથી વિકેટકીપર તરીકે મહત્વની જવાબદારી મળી શકે છે. કોક્સે શ્રીલંકા સામેની તાજેતરની વનડે સિરીઝમાં પણ તક મળ્યા બાદ 76 રનની ઈનિંગ રમી હતી.
ઈંગ્લેન્ડની 16 સભ્યોની ટીમ
હેરી બ્રુક (કેપ્ટન), ગસ એટકિન્સન, સોની બેકર, ટોમ બેન્ટન, જેમ્સ કોલ્સ, જોર્ડન કોક્સ, મેસન ક્રેન, હેનરી ક્રૂકોમ્બ, સેમ કરન, લિયમ ડોસન, બેન ડકેટ, વિલ જેક્સ, જેમી ઓવર્ટન, આદિલ રાશિદ, જો રૂટ અને જોશ ટોંગ.
પાકિસ્તાનમાં ક્યારે રમાશે ટ્રાઈ-સિરીઝ
ઈંગ્લેન્ડ, પાકિસ્તાન અને શ્રીલંકા વચ્ચેની ટ્રાઈ-સિરીઝ 18 ઓક્ટોબરથી શરૂ થશે. પ્રથમ મેચમાં પાકિસ્તાન અને શ્રીલંકા આમને-સામને હશે. ઈંગ્લેન્ડ 20 ઓક્ટોબરે પાકિસ્તાન સામે પોતાની પ્રથમ મેચ રમશે. ગ્રુપ સ્ટેજમાં ત્રણેય ટીમો એકબીજા સામે 2-2 મેચ રમશે. ત્યારબાદ ટોચની 2 ટીમો વચ્ચે 31 ઓક્ટોબરે લાહોરના ગદ્દાફી સ્ટેડિયમમાં ફાઇનલ રમાશે. આ ટૂર્નામેન્ટ 2027 વનડે વર્લ્ડ કપની તૈયારી માટે પણ મહત્વપૂર્ણ માનવામાં આવી રહી છે.
આ પણ વાંચો: Asian Games: શ્રીલંકાને 124 રને હરાવી ભારત ફાઇનલમાં, પાકિસ્તાન સામે થશે ગોલ્ડ મેડલ મેચ
