મહેન્દ્ર સિંહ ધોનીએ IPLમાંથી નિવૃત્તિ જાહેર કર્યા બાદ સોશિયલ મીડિયા પર એક ભાવુક વીડિયો શેર કર્યો છે. આ વીડિયોએ ઇન્સ્ટાગ્રામ પર લોકપ્રિયતાના અનેક રેકોર્ડ બનાવ્યા છે. ધોનીના આ વીડિયોને અત્યાર સુધીમાં 11.6 કરોડથી વધુ વખત જોવામાં આવ્યો છે, જ્યારે 1.2 કરોડથી વધુ લાઇક્સ મળી છે. એટલું જ નહીં, 10 લાખથી વધુ લોકોએ કોમેન્ટ કરીને પોતાના પ્રિય ક્રિકેટરને વિદાય સંદેશ આપ્યા છે.ધોનીએ આ વીડિયો સાથે એવું કેપ્શન લખ્યું છે, જેણે 2020માં આંતરરાષ્ટ્રીય ક્રિકેટમાંથી નિવૃત્તિ લેતી વખતે શેર કરેલી પોસ્ટની યાદ તાજી કરી દીધી છે. આ વખતે ધોનીએ સ્વીકાર્યું છે કે ચાહકોએ તેમને ખોટા સાબિત કર્યા છે.
ઇન્સ્ટાગ્રામ પર ધોનીના વીડિયોનો ધમાકો
ધોનીના નિવૃત્તિ વીડિયોને ચાહકો તરફથી જબરદસ્ત પ્રતિસાદ મળી રહ્યો છે. ઇન્સ્ટાગ્રામ પર શેર કરવામાં આવેલા આ વીડિયોને 11.6 કરોડથી વધુ વ્યૂઝ મળ્યા છે. સાથે જ 1.2 કરોડથી વધુ લાઇક્સ અને 10 લાખથી વધુ કોમેન્ટ્સ આવી છે.આ ઉપરાંત ચાહકોએ આ વીડિયોને 13 લાખથી વધુ વખત શેર કર્યો છે. આ આંકડા દર્શાવે છે કે ધોનીની લોકપ્રિયતા માત્ર ક્રિકેટના મેદાન પૂરતી મર્યાદિત નથી. નિવૃત્તિ બાદ પણ તેમના માટે ચાહકોનો પ્રેમ એટલો જ મજબૂત છે.
વીડિયોમાં દેખાઈ ધોનીની યાદગાર સફર
ધોનીએ શેર કરેલા આ વીડિયોમાં તેમની ક્રિકેટ કારકિર્દીની અનેક યાદગાર પળોનો સમાવેશ કરવામાં આવ્યો છે. ભારતીય ટીમની વાદળી જર્સીથી લઈને ચેન્નાઈ સુપર કિંગ્સની પીળી જર્સી સુધીની તેમની સફર આ વીડિયોમાં જોવા મળે છે.વીડિયોમાં ધોની IPLની ટ્રોફી ઊંચકતા, મેદાનમાં ચાહકોનું અભિવાદન સ્વીકારતા અને સાથી ખેલાડીઓ સાથે ઉજવણી કરતા જોવા મળે છે. વિરાટ કોહલી અને રવિન્દ્ર જાડેજા સાથેની તેમની કેટલીક યાદગાર પળો પણ વીડિયોમાં સામેલ છે.આ વીડિયોના બેકગ્રાઉન્ડમાં 1976માં આવેલી ફિલ્મ 'કભી-કભી'નું જાણીતું ગીત 'મૈં હર એક પલ કા શાયર હૂં' સાંભળવા મળે છે. આ ગીતે વીડિયોને વધુ ભાવુક બનાવી દીધો છે.
https://www.instagram.com/reel/Df1-VeCPfcS/?utm_source=ig_web_copy_link&avpt=NTc4MTIwNjQ2YQ==
ધોનીએ કેમ લખ્યું- ચાહકોએ મને ખોટો સાબિત કર્યો?
ધોનીના વીડિયો કરતાં પણ વધારે ચર્ચા તેના કેપ્શનની થઈ રહી છે. તેમણે લખ્યું હતું કે, "ચાહકોએ મને ખોટો સાબિત કર્યો છે. આ વાત સ્વીકારવા માટે આ ગીતથી વધુ સારું બીજું કોઈ ગીત હોઈ શકે નહીં. કદાચ આ ગીતનાં બે વર્ઝન એટલા માટે જ બનાવવામાં આવ્યાં હતાં કે હું પહેલાં ભૂલ કરું અને પછી તેને સ્વીકારી શકું.ધોનીના આ શબ્દોનો સંબંધ તેમની આંતરરાષ્ટ્રીય ક્રિકેટમાંથી નિવૃત્તિ સાથે છે. 15 ઓગસ્ટ 2020ના રોજ તેમણે આંતરરાષ્ટ્રીય ક્રિકેટને અલવિદા કહ્યું હતું. તે સમયે તેમણે 'મૈં પલ દો પલ કા શાયર હૂં' ગીત સાથે પોતાની નિવૃત્તિની જાહેરાત કરી હતી.તે સમયે ધોનીએ જાણે એવું દર્શાવ્યું હતું કે તેમનો સમય માત્ર થોડા સમય પૂરતો હતો. જોકે, આંતરરાષ્ટ્રીય ક્રિકેટમાંથી નિવૃત્તિ બાદ પણ IPLમાં ચાહકોએ તેમના પર જે પ્રેમ વરસાવ્યો તેનાથી તેમને સમજાયું કે તેમની લોકપ્રિયતા માત્ર થોડા સમય પૂરતી નથી.
'પલ દો પલ'થી 'હર એક પલ' સુધીની સફર
2020માં ધોનીએ 'મૈં પલ દો પલ કા શાયર હૂં' ગીત પસંદ કર્યું હતું, જ્યારે IPLમાંથી નિવૃત્તિ બાદ તેમણે આ જ ગીતનું બીજું વર્ઝન પસંદ કર્યું છે. આ વખતે ગીતના શબ્દો છે 'મૈં હર એક પલ કા શાયર હૂં'.આ ગીત અને તેમના કેપ્શન દ્વારા ધોનીએ ચાહકો સાથેના સંબંધની લાગણી વ્યક્ત કરી છે. ક્રિકેટના મેદાન પર ભલે હવે ધોની ખેલાડી તરીકે જોવા નહીં મળે, પરંતુ તેમના ચાહકોનો પ્રેમ અને તેમની યાદગાર કારકિર્દી હંમેશાં ચર્ચામાં રહેશે.
આ પણ વાંચો - MS Dhoni માટે રોહિતનો પ્રેમ છલકાયો, નિવૃત્તિ પર લખી દિલની વાત!