પાકિસ્તાન અને શ્રીલંકા વચ્ચે રમાઈ રહેલી ટેસ્ટ સિરીઝની બીજી મેચના સ્થળમાં મોટો ફેરફાર કરવામાં આવ્યો છે. અગાઉ આ મેચ લાહોરના ગદ્દાફી સ્ટેડિયમમાં રમાવાની હતી, પરંતુ હવે ત્યાં આ મુકાબલો યોજાશે નહીં. પાકિસ્તાન ક્રિકેટ બોર્ડે અચાનક નિર્ણય લેતા બીજી ટેસ્ટને લાહોરથી રાવલપિંડી ખસેડી છે. આ નિર્ણય પાછળનું મુખ્ય કારણ લાહોરમાં વધતું સ્મોગ અને હવામાનની સ્થિતિ હોવાનું જણાવવામાં આવ્યું છે.
લાહોરના બદલે હવે રાવલપિંડીમાં રમાશે બીજી ટેસ્ટ
પાકિસ્તાન અને શ્રીલંકા વચ્ચે 9 નવેમ્બરથી ટેસ્ટ સિરીઝનો પ્રારંભ થયો છે. બંને ટીમો વચ્ચે પ્રથમ ટેસ્ટ રાવલપિંડીના પિન્ડી ક્રિકેટ સ્ટેડિયમમાં રમાઈ રહી છે. અગાઉના કાર્યક્રમ પ્રમાણે બીજી ટેસ્ટ 17થી 21 નવેમ્બર દરમિયાન લાહોરના ગદ્દાફી સ્ટેડિયમમાં રમાવાની હતી.જોકે, હવે પાકિસ્તાન ક્રિકેટ બોર્ડે આ કાર્યક્રમમાં ફેરફાર કર્યો છે. બીજી ટેસ્ટ પણ રાવલપિંડીના પિન્ડી ક્રિકેટ સ્ટેડિયમમાં રમાશે. એટલે કે બંને ટીમો સિરીઝની બંને ટેસ્ટ એક જ મેદાન પર રમશે.
સ્મોગ અને હવામાનના કારણે PCBનો નિર્ણય
પાકિસ્તાન ક્રિકેટ બોર્ડે સ્થળ બદલવા પાછળનું કારણ સ્પષ્ટ કરતાં લાહોરની હવામાનની સ્થિતિ અને વધતા સ્મોગનો ઉલ્લેખ કર્યો છે.લાહોરમાં પ્રદૂષણનું પ્રમાણ વધવાને કારણે હવાની ગુણવત્તા પર અસર થઈ રહી છે. આવી સ્થિતિમાં ખેલાડીઓના સ્વાસ્થ્ય અને મેચના આયોજનને ધ્યાનમાં રાખીને PCBએ બીજી ટેસ્ટનું સ્થળ બદલવાનો નિર્ણય લીધો છે.આ નિર્ણયથી સ્પષ્ટ થાય છે કે પ્રદૂષણની સમસ્યા હવે ક્રિકેટ જેવી મોટી આંતરરાષ્ટ્રીય રમતના આયોજનને પણ અસર કરી રહી છે.
બંને ટીમોને લાહોર જવાની જરૂર નહીં પડે
બીજી ટેસ્ટનું સ્થળ બદલાયા બાદ પાકિસ્તાન અને શ્રીલંકાની ટીમોને હવે લાહોર જવાની જરૂર નહીં પડે. બંને ટીમો રાવલપિંડીમાં જ રોકાઈને આગામી ટેસ્ટની તૈયારી કરી શકશે.આ નિર્ણયથી ટીમોના પ્રવાસ અને રહેવાની વ્યવસ્થામાં પણ ફેરફાર થશે. પ્રથમ ટેસ્ટ પૂર્ણ થયા બાદ બંને ટીમો એ જ શહેરમાં રહીને બીજી ટેસ્ટ માટે મેદાનમાં ઉતરશે.
શ્રીલંકાના ભારત પ્રવાસમાં પણ પ્રદૂષણના કારણે ફેરફાર
રસપ્રદ વાત એ છે કે શ્રીલંકાના આગામી ભારત પ્રવાસના કાર્યક્રમમાં પણ પ્રદૂષણને કારણે ફેરફાર કરવામાં આવ્યો છે.ડિસેમ્બરમાં શ્રીલંકાની ટીમ ભારતના પ્રવાસે આવવાની છે. ભારત અને શ્રીલંકા વચ્ચેની વનડે સિરીઝની પ્રથમ મેચ અગાઉ 13 ડિસેમ્બરે દિલ્હીમાં રમાવાની હતી. જોકે, દિલ્હીમાં પ્રદૂષણની સ્થિતિને ધ્યાનમાં રાખીને આ મેચ હવે વિશાખાપટ્ટનમ ખસેડવામાં આવી છે.આમ, પાકિસ્તાન અને ભારત બંને દેશોમાં પ્રદૂષણને કારણે આંતરરાષ્ટ્રીય ક્રિકેટ મેચોના આયોજનમાં ફેરફાર જોવા મળ્યો છે. હવે જોવાનું એ રહેશે કે રાવલપિંડીમાં યોજાનારી બીજી ટેસ્ટમાં બંને ટીમો કેવું પ્રદર્શન કરે છે.
આ પણ વાંચો - IND vs NZ Test : ભારતને ટક્કર આપવા ન્યૂઝીલેન્ડનો માસ્ટર પ્લાન! લાથમના નેતૃત્વમાં 14 ખેલાડીઓની ટીમ જાહેર
