આંતરરાષ્ટ્રીય T20 ક્રિકેટમાં અફઘાનિસ્તાનના સ્ટાર સ્પિનર રાશિદ ખાને મોટો ઇતિહાસ રચ્યો છે. 29 ઓક્ટોબરના રોજ ઝિમ્બાબ્વે સામે રમાયેલી બીજી T20 મેચમાં રાશિદે પોતાની 200 વિકેટ પૂરી કરી હતી. આ સાથે તે T20 આંતરરાષ્ટ્રીય ક્રિકેટમાં 200 વિકેટનો આંકડો પાર કરનાર દુનિયાનો પ્રથમ બોલર બની ગયો છે. ખાસ વાત એ છે કે, તેણે માત્ર 120 મેચમાં આ ઐતિહાસિક સિદ્ધિ મેળવી છે. આ મેચમાં રાશિદે બોલિંગની સાથે બેટિંગમાં પણ શાનદાર પ્રદર્શન કરીને ચાહકોનું ધ્યાન ખેંચ્યું હતું.
120મી મેચમાં 200 વિકેટનો ઐતિહાસિક રેકોર્ડ
અફઘાનિસ્તાન અને ઝિમ્બાબ્વે વચ્ચે 3 મેચની T20 શ્રેણીની બીજી મેચ શારજાહના મેદાન પર રમાઈ હતી. આ મેચમાં અફઘાનિસ્તાને પ્રથમ બેટિંગ કરતાં 20 ઓવરમાં 7 વિકેટ ગુમાવીને 221 રન બનાવ્યા હતા.જવાબમાં ઝિમ્બાબ્વેની ટીમ જ્યારે બેટિંગ કરવા ઉતરી ત્યારે અફઘાનિસ્તાનના કેપ્ટન રાશિદ ખાને બોલિંગમાં કમાલ કરી હતી. ઇનિંગની 9મી ઓવરના ત્રીજા બોલ પર તેણે તડિવાનાશે મારુમાનીને આઉટ કર્યો હતો. આ વિકેટ સાથે જ રાશિદે પોતાની T20 આંતરરાષ્ટ્રીય કારકિર્દીની 200મી વિકેટ પૂરી કરી હતી.રાશિદે આ સિદ્ધિ માત્ર 120 મેચમાં મેળવી છે. તેની બોલિંગની સરેરાશ પણ માત્ર 13.99 રહી છે. આ આંકડા તેની શાનદાર બોલિંગ ક્ષમતાનો પરિચય આપે છે.
