ભારતીય ક્રિકેટર અર્શદીપ સિંહ અને અભિનેત્રી-મોડેલ સમરીન કૌર ફરી એકવાર ચર્ચામાં છે. જોકે, આ વખતે ચર્ચાનું કારણ ક્રિકેટનું મેદાન નહીં, પરંતુ સોશિયલ મીડિયા પર તેમના સંબંધોને લઈને થઈ રહેલી ટ્રોલિંગ છે. અર્શદીપ સાથેના સંબંધને લઈને સમરીન પર પૈસા અને પ્રસિદ્ધિ માટે ક્રિકેટરને ડેટ કરવાનો આરોપ લગાવવામાં આવી રહ્યો હતો. સતત થતી આવી ટિપ્પણીઓથી કંટાળીને સમરીને ઇન્સ્ટાગ્રામ સ્ટોરી દ્વારા ટ્રોલર્સને જવાબ આપ્યો છે. અર્શદીપે પણ તેની પોસ્ટ શેર કરીને ખુલ્લેઆમ સમર્થન આપ્યું છે.
“17 વર્ષની ઉંમરથી કામ કરું છું, કોઈના પૈસાની જરૂર નથી”
સમરીને પોતાની પોસ્ટમાં સોશિયલ મીડિયા પર લોકોના બેવડા વલણ પર સવાલ ઉઠાવ્યા હતા. તેના કહેવા પ્રમાણે, જો કોઈ મહિલા પોતાના સંબંધને ખાનગી રાખે તો લોકો કહે છે કે તેને પોતાના પાર્ટનર પર ગર્વ નથી. જ્યારે તે ખુલ્લેઆમ પ્રેમ વ્યક્ત કરે તો તેના પર પ્રસિદ્ધિ મેળવવાનો આરોપ મૂકવામાં આવે છે. પૈસા અને પ્રસિદ્ધિ માટે અર્શદીપ સાથે સંબંધ રાખવાના આરોપોનો જવાબ આપતાં સમરીને કહ્યું કે તે 17 વર્ષની ઉંમરથી કામ કરી રહી છે. તે પોતાની આર્થિક અને વ્યાવસાયિક જવાબદારીઓ જાતે સંભાળે છે. તેણે વધુમાં જણાવ્યું કે તે અત્યાર સુધી 20થી વધુ દેશોમાં પ્રવાસ કરી ચૂકી છે અને સંબંધ હોય કે ન હોય, પોતાની રીતે ખુશહાલ જીવન જીવી રહી છે. સમરીને કહ્યું કે ભગવાને તેને નાનપણથી જ પોતાની મુસાફરી અને જીવનશૈલીનો ખર્ચ ઉઠાવી શકે તેવી ક્ષમતા આપી છે, જેના માટે તે આભારી છે. તેને એવો જીવનસાથી મળ્યો છે જેને તે ખરેખર પ્રેમ કરે છે અને આ સંબંધ વિશે કોઈને ખુલાસો આપવાની તેને જરૂર નથી.
“મને જે પોસ્ટ કરવું હશે તે કરીશ, પસંદ ન હોય તો પેજ છોડી દો”
સમરીને સ્પષ્ટ કર્યું કે તે પોતાના વિશે, અર્શદીપ વિશે અને તેમના સંબંધો વિશે સોશિયલ મીડિયા પર પોસ્ટ કરતી રહેશે, કારણ કે તે તેની પોતાની જિંદગી છે. જો કોઈને તેની પોસ્ટ્સ પસંદ ન હોય તો તેઓ તેનું પેજ છોડી શકે છે. તેણે ખાસ કરીને મહિલાઓ દ્વારા બીજી મહિલાઓને નીચી દેખાડવાની માનસિકતા સામે નારાજગી વ્યક્ત કરી હતી. સમરીનના જણાવ્યા પ્રમાણે, બિનજરૂરી ટિપ્પણીઓ, ધારણાઓ અને નકારાત્મકતાથી તે કંટાળી ગઈ છે. તેણે કહ્યું કે તે અને તેની ટીમ આવા લોકોને બ્લોક કરી રહ્યાં છે. તેની પ્રોફાઇલ કોઈની અંગત નારાજગી કે નફરત વ્યક્ત કરવાનું સ્થળ નથી.
અર્શદીપે પણ આપ્યો સાથ, ટ્રોલર્સને કહ્યું – થોડો બ્રેક લો
સમરીનની પોસ્ટ પર અર્શદીપ સિંહે પણ પ્રતિક્રિયા આપી હતી. તેણે સમરીનની ઇન્સ્ટાગ્રામ સ્ટોરી શેર કરીને લખ્યું કે તેને સમરીન પર ગર્વ છે અને તે ખૂબ મજબૂત છે. અર્શદીપે ટ્રોલર્સને સંદેશ આપતાં કહ્યું કે તેમના સંબંધમાં શું કરવું જોઈએ અને શું નહીં તેની વધુ પડતી ચિંતા કરતા લોકોએ થોડો બ્રેક લેવો જોઈએ. તેણે 'જીવો અને જીવવા દો'નો સંદેશ આપ્યો અને લોકોને ઇન્ટરનેટને વધુ સારી જગ્યા બનાવવા, પ્રેમ ફેલાવવા અને એકબીજા પ્રત્યે દયાળુ રહેવાની અપીલ કરી. અર્શદીપે સમરીનને સમજદાર અને પ્રેમાળ વ્યક્તિ ગણાવી હતી. સાથે જ બંનેને પ્રેમ અને સમર્થન આપનારા ચાહકોનો આભાર માન્યો હતો.
IPL 2026 દરમિયાન શરૂ થઈ હતી ચર્ચા
અર્શદીપ અને સમરીનના સંબંધોની ચર્ચા IPL 2026 દરમિયાન શરૂ થઈ હતી. બંનેને ધર્મશાળામાં સાથે જોવામાં આવ્યા બાદ તેમના ડેટિંગની અટકળો તેજ બની હતી. ત્યારબાદ જુલાઈ 2026માં બંનેએ સોશિયલ મીડિયા પર પોતાના સંબંધની પુષ્ટિ કરી હતી. સંબંધ જાહેર થયા બાદથી બંનેને સોશિયલ મીડિયા પર મિશ્ર પ્રતિક્રિયાઓ મળી રહી છે. સમરીન અર્શદીપ સાથે પ્રવાસ કરતી હોવા અંગે પણ કેટલાક લોકો ટિપ્પણીઓ કરતા હતા. હવે બંનેએ આ નકારાત્મક ટિપ્પણીઓ સામે પોતાનું વલણ સ્પષ્ટ કર્યું છે.
આ પણ વાંચો: Ravindra Jadejaની વનડે કારકિર્દી પર પૂર્ણવિરામ? પૂજારાના નિવેદનથી ભારતીય ક્રિકેટમાં ચર્ચા
