ભારતીય વિકેટકીપર અને બેટ્સમેન સંજૂ સેમસન પોતાના જૂના ફોર્મમાં પાછો ફરી ચૂક્યો છે. તેણે અફઘાનિસ્તાન સામેની બીજી T20 મેચમાં ઓપનર તરીકે રમતા માત્ર 20 બોલમાં પોતાની ફિફ્ટી પૂરી કરી હતી. સેમસને આ મેચમાં 22 બોલમાં 7 ચોગ્ગા અને 4 છગ્ગાની મદદથી 57 રનની તોફાની ઇનિંગ રમી હતી. T20 વર્લ્ડ કપ 2026માં ભારતને ચેમ્પિયન બનાવવા અને 'પ્લેયર ઓફ ધ ટુર્નામેન્ટ' બન્યા બાદ સેમસન ખરાબ ફોર્મ સામે ઝઝૂમી રહ્યો હતો, અને તે છેલ્લી 5 ઇનિંગ્સમાં 30 રન પણ બનાવી શક્યો ન હતો. જો કે, આ ધમાકેદાર ઇનિંગ્સ સાથે જ તેણે પોતાના કમબેકના સ્પષ્ટ સંકેત આપી દીધા છે. આ અડધીસદી સાથે તેણે રોહિત શર્માના એક ખાસ ક્લબમાં પોતાનું સ્થાન બનાવી લીધું છે.
ઓપનર તરીકે 1000થી વધુ રન પૂરા કર્યા
સંજૂ સેમસને T20 આંતરરાષ્ટ્રીય ક્રિકેટમાં ભારત માટે ઓપનર તરીકે બેટિંગ કરતા એક મોટો કીર્તિમાન સ્થાપિત કર્યો છે. તેણે ઓપનર તરીકે 1000થી વધુ રન પૂરા કરી લીધા છે, અને ભારત તરફથી સૌથી વધુ રન બનાવનારા ટોપ-5 ઓપનરોની યાદીમાં સ્થાન મેળવી લીધું છે. આ યાદીમાં પૂર્વ કેપ્ટન રોહિત શર્મા 3750 રન સાથે પ્રથમ સ્થાને છે. ત્યારબાદ કેએલ રાહુલ (1826 રન), શિખર ધવન (1759 રન) અને અભિષેક શર્મા (1726 રન) આવે છે. હવે 1026 રન સાથે સંજૂ સેમસન પણ ભારતના આ દિગ્ગજ ઓપનરોના ખાસ ક્લબમાં સામેલ થઈ ગયો છે.