ભારતીય મહિલા ક્રિકેટ ટીમની સ્ટાર ઓપનર સ્મૃતિ મંધાનાએ ફરી એક વખત ઈતિહાસ રચ્યો છે. એશિયા ગેમ્સની સેમિફાઇનલમાં બાંગ્લાદેશ સામે રમતા મંધાનાએ મહિલા T20I ક્રિકેટમાં સૌથી વધુ રન બનાવનારી બેટર બનવાની સિદ્ધિ મેળવી છે. આ સાથે તેમણે ન્યૂઝીલેન્ડની દિગ્ગજ ખેલાડી સુઝી બેટ્સને પાછળ છોડી દીધી છે.બાંગ્લાદેશ સામેની સેમિફાઇનલમાં ભારતે ટોસ જીતીને પ્રથમ બેટિંગ કરવાનો નિર્ણય લીધો હતો. ભારતીય ઇનિંગ્સની શરૂઆત કરવા આવેલી સ્મૃતિ મંધાનાએ પોતાની આક્રમક બેટિંગથી ટીમને ઝડપી શરૂઆત અપાવી અને T20I ક્રિકેટમાં સૌથી વધુ રનનો વર્લ્ડ રેકોર્ડ પોતાના નામે કર્યો.
સુઝી બેટ્સને પાછળ છોડી
મેચ પહેલાં સુઝી બેટ્સ મહિલા T20Iમાં સૌથી વધુ રન બનાવનારી બેટર હતી.બેટ્સે 186 મેચમાં કુલ 4,758 રન બનાવ્યા હતા. બાંગ્લાદેશ સામેની મેચમાં મંધાનાએ આ આંકડો પાર કરીને T20Iમાં સૌથી વધુ રન બનાવનારી મહિલા બેટરનો દરજ્જો મેળવ્યો.મંધાનાના નામે હવે 178 મેચમાં 4,788 રન નોંધાયા છે. ખાસ વાત એ છે કે મંધાનાએ સુઝી બેટ્સ કરતાં 8 મેચ ઓછી રમીને આ સિદ્ધિ મેળવી છે.
બાંગ્લાદેશ સામે 19 બોલમાં 37 રન
રેકોર્ડ બનાવ્યા બાદ મંધાનાની ઇનિંગ્સ લાંબી ચાલી શકી નહોતી. તે 19 બોલમાં 37 રન બનાવીને આઉટ થઈ હતી. તેમની ઇનિંગ્સમાં 5 ચોગ્ગા અને 2 છગ્ગાનો સમાવેશ થયો હતો. મંધાનાનો સ્ટ્રાઇક રેટ 194.74 રહ્યો.મંધાનાએ શેફાલી વર્મા સાથે મળીને ભારતને શાનદાર શરૂઆત અપાવી હતી. બંને ખેલાડીઓએ પ્રથમ વિકેટ માટે માત્ર 6 ઓવરમાં 72 રનની ભાગીદારી કરી હતી. આ ઝડપી શરૂઆતથી ભારતે સેમિફાઇનલમાં બાંગ્લાદેશ સામે મજબૂત સ્થિતિ બનાવવાની શરૂઆત કરી.
મંધાનાની શાનદાર T20I કારકિર્દી
સ્મૃતિ મંધાના લાંબા સમયથી ભારતીય મહિલા ક્રિકેટની મહત્વની બેટર રહી છે. તેમની આક્રમક બેટિંગ, સતત રન બનાવવાની ક્ષમતા અને મોટા મુકાબલાઓમાં પ્રદર્શનને કારણે તેઓ ભારતીય ટીમના મુખ્ય ખેલાડીઓમાં સ્થાન ધરાવે છે.હવે મહિલા T20Iમાં સૌથી વધુ રનનો રેકોર્ડ પણ તેમના નામે થઈ ગયો છે. સુઝી બેટ્સને પાછળ છોડીને મંધાનાએ પોતાના નામે વધુ એક મોટી સિદ્ધિ ઉમેરી છે.
આ પણ વાંચો - West Indies Squads announced : ભારત પ્રવાસ માટે વેસ્ટ ઈન્ડિઝની ટીમ જાહેર, આ સ્ટાર ખેલાડીને મળી તક
