ભારતીય ક્રિકેટના દિગ્ગજ વિરાટ કોહલીની લોકપ્રિયતા માત્ર ક્રિકેટ જગત પૂરતી મર્યાદિત નથી. દુનિયાના અન્ય રમતોના ખેલાડીઓ પણ તેમની રમત અને વ્યક્તિત્વના પ્રશંસક છે. હવે ઇંગ્લેન્ડના ફૂટબોલર હેરી કેને પણ કોહલીનો ખાસ ઉલ્લેખ કરીને આ વાતનો પરિચય આપ્યો છે. બેલન ડી'ઓર જીત્યા બાદ મળેલી શુભેચ્છાઓ વિશે વાત કરતાં કેને વિરાટ કોહલીનું નામ લીધું હતું.
કોહલીનું નામ સાંભળીને હેરી કેન થયા પ્રભાવિત
હેરી કેનને તાજેતરમાં બેલન ડી'ઓર પુરસ્કાર મળ્યો છે. આ સિદ્ધિ બાદ તેમને દુનિયાભરના ખેલાડીઓ અને જાણીતી હસ્તીઓ તરફથી અભિનંદન સંદેશ મળ્યા હતા. એક પ્રેસ કોન્ફરન્સમાં તેમને પૂછવામાં આવ્યું કે કઈ વ્યક્તિની શુભેચ્છા મળતાં તેઓ સૌથી વધુ પ્રભાવિત થયા હતા. આ સવાલના જવાબમાં કેને ડેવિડ બેકહામ, ટોમ બ્રેડી અને વિરાટ કોહલીનાં નામ લીધાં હતાં. તેમણે કહ્યું હતું કે ડેવિડ બેકહામ તેમના મોટા આદર્શ છે અને ટોમ બ્રેડી તથા વિરાટ કોહલી જેવા ખેલાડીઓની તેઓ ખૂબ પ્રશંસા કરે છે. કેનના આ જવાબથી સ્પષ્ટ થાય છે કે તેઓ કોહલીને માત્ર એક મહાન ક્રિકેટર તરીકે જ નહીં, પરંતુ રમતજગતની પ્રેરણાદાયી હસ્તી તરીકે પણ જુએ છે.
https://x.com/Melbourne__82/status/2117530976901550380?a=ENx89gDnUmUMpu6yy0c&s=20
કોહલીએ પણ કેનને પાઠવ્યો હતો ખાસ સંદેશ
હેરી કેનને બેલન ડી'ઓર મળ્યા બાદ વિરાટ કોહલીએ સોશિયલ મીડિયા પ્લેટફોર્મ X પર તેમને અભિનંદન આપ્યા હતા. કોહલીએ પોતાના સંદેશમાં કેનની મહેનત, ધીરજ અને રમત પ્રત્યેની પ્રામાણિકતાની પ્રશંસા કરી હતી. કોહલીએ લખ્યું હતું કે, "હેરી મારા મિત્ર, આ પુરસ્કાર માટે તમે સંપૂર્ણપણે હકદાર છો. ફૂટબોલમાં આટલાં વર્ષો સુધી ટોચના સ્તરે રમતાં તમે જે ધીરજ, મહેનત અને પ્રામાણિકતા દર્શાવી છે, તેના માટે તમને આ સન્માન મળવું જ જોઈએ. તમારા માટે ખૂબ ખુશી છે. ભગવાન તમને અને તમારા પરિવારને આશીર્વાદ આપે." કોહલીના આ સંદેશનો જવાબ આપતાં કેને તેમનું નામ પણ ખાસ રીતે યાદ રાખ્યું હતું.
2016થી શરૂ થઈ હતી બંને ખેલાડીઓની ઓળખાણ
વિરાટ કોહલી અને હેરી કેન વચ્ચેની ઓળખાણ વર્ષ 2016થી શરૂ થઈ હતી. તે સમયે T20 વર્લ્ડ કપમાં ઓસ્ટ્રેલિયા સામેની મેચમાં કોહલીએ અણનમ 82 રનની ઇનિંગ રમીને ભારતને જીત અપાવી હતી. કેને સોશિયલ મીડિયા પર કોહલીની આ ઇનિંગની પ્રશંસા કરી હતી. ત્યારબાદ બંને ખેલાડીઓ વચ્ચે સોશિયલ મીડિયા પર શુભેચ્છાઓની આપ-લે થતી રહી હતી. મે 2019માં લોર્ડ્સ ક્રિકેટ ગ્રાઉન્ડ ખાતે બંને પહેલીવાર રૂબરૂ મળ્યા હતા. ત્યારથી તેમની વચ્ચે મિત્રતાભર્યો સંબંધ જોવા મળ્યો છે. ક્રિકેટ અને ફૂટબોલ જેવી અલગ-અલગ રમતોના આ બે મોટા ખેલાડીઓ વચ્ચેનો આ પરસ્પર આદર ફરી એકવાર ચર્ચામાં આવ્યો છે.
આ પણ વાંચો: IND VS NZ: કોહલી સામે સેન્ટનરનો પેચ! વનડે ક્રિકેટની આ ખતરનાક બેટિંગ-બોલિંગ જંગમાં કોણ છે હેવી?
