ટીમ ઈન્ડિયાની પુરુષ સિનિયર પસંદગી સમિતિમાં મોટો ફેરફાર થવાની ચર્ચા ચાલી રહી છે. મુખ્ય પસંદગીકાર અજિત અગરકરનો વર્તમાન કરાર 4 ઓક્ટોબરે પૂર્ણ થવાનો છે અને તેમના કાર્યકાળના વિસ્તરણ અંગે હજુ સત્તાવાર જાહેરાત થઈ નથી. તાજેતરના મીડિયા રિપોર્ટ અનુસાર અગરકરને વધુ સમય માટે જાળવી રાખવામાં આવે તેવી શક્યતા ઓછી હોવાનું માનવામાં આવે છે.અગરકર જુલાઈ 2023માં ભારતીય પુરુષ ટીમની સિનિયર પસંદગી સમિતિના અધ્યક્ષ બન્યા હતા.હવે તેમના ઉત્તરાધિકારી અંગે ચર્ચા તેજ બની છે.મળી માહિતી અનુસાર પૂર્વ ભારતીય વિકેટકીપર-બેટર પાર્થિવ પટેલ અને પૂર્વ સ્પિનર પ્રજ્ઞાન ઓઝાના નામ મુખ્ય દાવેદારો તરીકે સામે આવી રહ્યા છે.
પાર્થિવ પટેલ અને પ્રજ્ઞાન ઓઝાનું નામ આગળ
પાર્થિવ પટેલ ભારત માટે ટેસ્ટ, વનડે અને T20I ક્રિકેટ રમી ચૂક્યા છે. બીજી તરફ, પ્રજ્ઞાન ઓઝા પણ ભારત માટે આંતરરાષ્ટ્રીય ક્રિકેટ રમી ચૂક્યા છે અને હાલમાં BCCIની પુરુષ પસંદગી સમિતિના સભ્ય છે.BCCIના સત્તાવાર રેકોર્ડમાં પણ પ્રજ્ઞાન ઓઝાનું નામ વર્તમાન પુરુષ પસંદગી સમિતિના સભ્ય તરીકે નોંધાયેલું છે.મીડિયા રિપોર્ટ અનુસાર,બંને ખેલાડીઓએ IPLમાં પણ સફળ કારકિર્દી બનાવી છે.જોકે નવા ચીફ સિલેક્ટર તરીકે અંતિમ પસંદગી કોણની થશે તે અંગે BCCI તરફથી હજુ કોઈ સત્તાવાર નિર્ણય જાહેર કરવામાં આવ્યો નથી.
અજિત અગરકરનો કાર્યકાળ પૂર્ણ થવાની ચર્ચા
અજિત અગરકરને જુલાઈ 2023માં પસંદગી સમિતિના અધ્યક્ષ બનાવવામાં આવ્યા હતા. BCCIના સત્તાવાર નિવેદન અનુસાર તેમને પુરુષ સિનિયર પસંદગી સમિતિના અધ્યક્ષ તરીકે નિયુક્ત કરવામાં આવ્યા હતા.તાજેતરના અહેવાલો અનુસાર તેમનો કરાર 4 ઓક્ટોબર સુધી છે. આ દરમિયાન વેસ્ટ ઈન્ડિઝ સામેની આગામી વનડે અને T20I શ્રેણી માટેની ટીમોની પસંદગી પ્રક્રિયા પણ અગરકરની અધ્યક્ષતાવાળી સમિતિએ કરી છે. આ બેઠક તેમનું અંતિમ પસંદગી બેઠક બની શકે તેવી ચર્ચા પણ અહેવાલોમાં છે.
રોહિત શર્માના મુદ્દે પણ ચર્ચા
અગરકરના કાર્યકાળના અંત અંગેની ચર્ચા વચ્ચે રોહિત શર્માના વનડે ભવિષ્યને લઈને પણ અહેવાલો સામે આવ્યા છે. કેટલાક અહેવાલોમાં દાવો કરવામાં આવ્યો હતો કે પસંદગીકારોએ રોહિતને ભવિષ્યની વનડે યોજનાઓ અંગે વાત કરી હતી.જોકે BCCIના સચિવ દેવજીત સૈકિયાએ રોહિતના ભવિષ્ય અંગે જાહેરમાં સ્પષ્ટતા કરી હતી કે જો તે પસંદગીના માપદંડમાં ફિટ રહેશે તો તેની પસંદગી થઈ શકે છે. તાજેતરમાં વેસ્ટ ઈન્ડિઝ સામેની વનડે શ્રેણી માટે પણ રોહિતની પસંદગી કરવામાં આવી છે.
અગરકરના કાર્યકાળમાં મોટી સફળતા
અજિત અગરકરના કાર્યકાળ દરમિયાન ભારતીય ટીમે સફેદ બોલના ક્રિકેટમાં કેટલીક મોટી સફળતા મેળવી છે. તેમના કાર્યકાળમાં ભારતે 2024 અને 2026નો T20 વર્લ્ડ કપ તથા 2025ની ચેમ્પિયન્સ ટ્રોફી જીતી છે.હવે જો અગરકરનો કાર્યકાળ આગળ નહીં વધે તો BCCI સામે નવા મુખ્ય પસંદગીકારની પસંદગીનો મહત્વનો નિર્ણય રહેશે. હાલમાં પાર્થિવ પટેલ અને પ્રજ્ઞાન ઓઝાના નામ અહેવાલોમાં ચર્ચામાં છે, પરંતુ અંતિમ નિર્ણય BCCIની સત્તાવાર જાહેરાત બાદ જ સ્પષ્ટ થશે.
આ પણ વાંચો - Hardik Pandyaને ટીમ ઈન્ડિયામાં કેમ ન મળ્યું સ્થાન? ગૌતમ ગંભીરનો સીધો જવાબ
