ભારતીય ક્રિકેટના યુવા સ્ટાર વૈભવ સૂર્યવંશીએ વધુ એક મોટી સિદ્ધિ પોતાના નામે કરી છે.માત્ર 15 વર્ષની ઉંમરે તેણે એવો વર્લ્ડ રેકોર્ડ બનાવ્યો છે, જે અત્યાર સુધી કોઈ ખેલાડી કરી શક્યો નહોતો. વૈભવ મેન્સ T20 ક્રિકેટના ઇતિહાસમાં સૌથી નાની ઉંમરે ટીમની કેપ્ટનશિપ કરનાર ખેલાડી બની ગયો છે. 14 નવેમ્બરથી શરૂ થયેલી સૈયદ મુશ્તાક અલી ટ્રોફી 2026માં બિહારની ટીમની કમાન સંભાળતાં જ તેણે આ ખાસ સિદ્ધિ મેળવી હતી.
ભારતીય ક્રિકેટમાં તેની વધતી ઓળખ
વૈભવે માત્ર 15 વર્ષ અને 232 દિવસની ઉંમરે પ્રથમ વખત બિહારની T20 ટીમનું નેતૃત્વ કર્યું હતું. આ સાથે તેણે આંતરરાષ્ટ્રીય અને સ્થાનિક T20 ક્રિકેટના ઇતિહાસમાં નવો રેકોર્ડ બનાવ્યો છે. તેની આ સિદ્ધિથી ભારતીય ક્રિકેટમાં તેની વધતી ઓળખ અને જવાબદારી બંનેની ચર્ચા શરૂ થઈ ગઈ છે.
15 વર્ષની ઉંમરે બન્યો સૌથી યુવા T20 કેપ્ટન
સૈયદ મુશ્તાક અલી ટ્રોફીમાં બિહારની પ્રથમ મેચ સૌરાષ્ટ્ર સામે રમાઈ હતી. આ મેચમાં વૈભવ સૂર્યવંશી કેપ્ટન તરીકે મેદાનમાં ઉતર્યો હતો. તેણે પોતાની કેપ્ટનશિપની પ્રથમ મેચમાં ટોસ પણ જીત્યો હતો અને પહેલાં બેટિંગ કરવાનો નિર્ણય લીધો હતો.આ સાથે જ વૈભવ મેન્સ T20 ક્રિકેટમાં સૌથી નાની ઉંમરે કેપ્ટન બનનાર ખેલાડી બની ગયો હતો. તેણે માત્ર 15 વર્ષ અને 232 દિવસની ઉંમરે આ સિદ્ધિ મેળવીને અગાઉનો રેકોર્ડ તોડી નાખ્યો હતો.વૈભવે પોતાની આ નવી જવાબદારી અંગે ખુશી વ્યક્ત કરતાં કહ્યું હતું કે બિહારની ટીમની કેપ્ટનશિપ કરવી તેના માટે સપનું સાકાર થવા સમાન છે. આ તક મળવા બદલ તેણે પોતાને ભાગ્યશાળી ગણાવ્યો હતો.
વૈભવે તોડ્યો ક્રોએશિયાના ખેલાડીનો રેકોર્ડ
મેન્સ T20 ક્રિકેટમાં સૌથી યુવા કેપ્ટન બનવાના મામલે વૈભવે ક્રોએશિયાના જેક વુકુસિચનો રેકોર્ડ તોડ્યો છે. જેક વુકુસિચે વર્ષ 2025માં 17 વર્ષ અને 311 દિવસની ઉંમરે પ્રથમ વખત ક્રોએશિયાની T20 ટીમની કેપ્ટનશિપ કરી હતી.હવે વૈભવ આ યાદીમાં પ્રથમ સ્થાને પહોંચી ગયો છે. આ યાદીમાં પાકિસ્તાનના તૈમૂર અલી ત્રીજા સ્થાને છે. તેણે વર્ષ 2009માં ક્વેટા બિયર્સની કેપ્ટનશિપ કરી હતી.
તમામ મેચમાં નહીં કરે બિહારની કેપ્ટનશિપ
વૈભવ સૂર્યવંશી સૈયદ મુશ્તાક અલી ટ્રોફીની તમામ મેચોમાં બિહારની કેપ્ટનશિપ કરવાનો નથી. તે ટૂંક સમયમાં રાઇઝિંગ સ્ટાર્સ એશિયા કપ માટે ભારતીય A ટીમ સાથે જોડાવાનો છે.આ ટૂર્નામેન્ટ 19 નવેમ્બરથી શરૂ થશે. ભારતીય A ટીમને ગ્રૂપ Bમાં રાખવામાં આવી છે, જેમાં નેપાળ, પાકિસ્તાન અને UAEની ટીમો પણ સામેલ છે.આથી વૈભવ બિહાર માટે શરૂઆતની કેટલીક મેચોમાં જ કેપ્ટનશિપ કરતો જોવા મળી શકે છે.
સચિન તેંડુલકરે પણ આપી હતી સલાહ
વૈભવ સૂર્યવંશીને અગાઉ દલીપ ટ્રોફીમાં ઈસ્ટ ઝોનનો ઉપકેપ્ટન બનાવવામાં આવ્યો હતો. જોકે, આ નિર્ણયને લઈને ક્રિકેટ જગતમાં ચર્ચા થઈ હતી.વૈભવને નેતૃત્વની જવાબદારી સોંપવા અંગે અનેક લોકોએ સવાલો ઉઠાવ્યા હતા. દિગ્ગજ ક્રિકેટર સચિન તેંડુલકરે પણ અભિપ્રાય આપ્યો હતો કે આટલી નાની ઉંમરે વૈભવ પર નેતૃત્વનું વધારે દબાણ ન નાખવું જોઈએ.જોકે, હવે વૈભવે બિહારની T20 ટીમની કેપ્ટનશિપ કરીને ઇતિહાસ રચ્યો છે. માત્ર 15 વર્ષની ઉંમરે મળેલી આ જવાબદારી તેની ક્રિકેટ કારકિર્દી માટે એક નવો પડાવ સાબિત થઈ શકે છે
આ પણ વાંચો - SMAT 2026 : 15 બોલમાં ફિફ્ટી, 21 બોલમાં 60 રન! સૂર્યાની વાપસીથી બોલરોમાં ફફડાટ
