કતારના દોહામાં આજથી શરૂ થયેલા રાઇઝિંગ સ્ટાર્સ એશિયા કપને ભારતીય ક્રિકેટના યુવા ખેલાડીઓ માટે મોટી તક માનવામાં આવી રહ્યો છે. ઇન્ડિયા Aના કેપ્ટન તિલક વર્માનું માનવું છે કે આ ટુર્નામેન્ટમાં સારું પ્રદર્શન કરનારા ખેલાડીઓ માટે સિનિયર ટીમના દરવાજા ખુલી શકે છે. ખાસ કરીને 2027ના ODI વર્લ્ડ કપ પહેલાં આ સ્પર્ધા ખેલાડીઓની ક્ષમતા ચકાસવા માટે મહત્ત્વપૂર્ણ બની શકે છે. 

સિનિયર ટીમમાં સ્થાન મેળવવાની મોટી તક

ઇન્ડિયા Aના કેપ્ટન તિલક વર્માએ રાઇઝિંગ સ્ટાર્સ એશિયા કપને આંતરરાષ્ટ્રીય ક્રિકેટમાં સ્થાન મેળવવા માટેનું મહત્ત્વપૂર્ણ પગથિયું ગણાવ્યું છે. તેમના મતે, આ ટુર્નામેન્ટમાં સારું પ્રદર્શન કરનારા ખેલાડીઓને સિનિયર ભારતીય ટીમમાં રમવાની તક મળી શકે છે. તિલકે કહ્યું કે આગામી 10 મહિનામાં ODI વર્લ્ડ કપ યોજાવાનો છે. આવી સ્થિતિમાં દરેક ખેલાડી માટે આ ટુર્નામેન્ટ મહત્ત્વપૂર્ણ છે. જો ખેલાડીઓ અહીં સારું પ્રદર્શન કરશે તો તેમને આગળની તક મળી શકે છે. સાથે જ તેમણે કહ્યું કે ટુર્નામેન્ટ જીતવું પણ ટીમ માટે એટલું જ જરૂરી છે.

વૈભવ અને અભિષેક માટે વનડેમાં પોતાને સાબિત કરવાની તક

ઇન્ડિયા Aની ટીમમાં અભિષેક શર્મા, વૈભવ સૂર્યવંશી, રિંકુ સિંહ અને પ્રભસિમરન સિંહ જેવા ખેલાડીઓ સામેલ છે. આ ખેલાડીઓ મુખ્યત્વે T20 ક્રિકેટમાં પોતાના પ્રદર્શન માટે જાણીતા છે. હવે તેમની પાસે 50 ઓવરના ક્રિકેટમાં પણ પોતાની ક્ષમતા સાબિત કરવાની તક છે. તિલકે ખાસ કરીને વૈભવ અને અભિષેકનો ઉલ્લેખ કર્યો હતો. તેમણે કહ્યું કે બંનેએ T20 ક્રિકેટમાં સારું પ્રદર્શન કર્યું છે. હવે વનડે ફોર્મેટમાં પણ પોતાની રમતને આગળ વધારવી જરૂરી છે. આ ટુર્નામેન્ટ તેમને વનડે ક્રિકેટમાં લય મેળવવામાં મદદ કરી શકે છે.

ઈજામાંથી પાછા ફરેલા હર્ષિત અને પ્રિન્સ પર નજર

આ ટુર્નામેન્ટમાં હર્ષિત રાણા અને પ્રિન્સ યાદવ જેવા ખેલાડીઓ પણ ઈજામાંથી સાજા થઈને વાપસી કરી રહ્યા છે. હર્ષિત હેમસ્ટ્રિંગ અને જાંઘના સ્નાયુઓની ઈજાને કારણે મેદાનથી દૂર હતો. પ્રિન્સ પણ ઈજામાંથી પાછો ફરી રહ્યો છે. તિલકના મતે, આ ખેલાડીઓ માટે પોતાની ફિટનેસ અને ક્ષમતા સાબિત કરવાની સારી તક છે. ટીમમાં એવા પાંચથી સાત ખેલાડીઓ છે, જેઓ અગાઉ સિનિયર ભારતીય ટીમ તરફથી રમી ચૂક્યા છે. તેથી ટુર્નામેન્ટનું સ્તર પણ ઊંચું રહેશે.

દબાણ લીધા વગર રમવાની તિલકની સલાહ

તિલકે પોતાના ખેલાડીઓને દબાણ લીધા વગર રમવાની સલાહ આપી છે. તેમણે કહ્યું કે દરેક ખેલાડીએ પોતાની મહેનત પર વિશ્વાસ રાખવો જોઈએ અને રમતનો આનંદ માણવો જોઈએ. જ્યારે ખેલાડી દબાણ વગર રમે છે ત્યારે તેની સ્વાભાવિક પ્રતિભા બહાર આવે છે. તિલકે પોતાના IPLના અનુભવનો પણ ઉલ્લેખ કર્યો હતો. 2022માં મુંબઈ ઇન્ડિયન્સ તરફથી પોતાની પ્રથમ IPL સિઝન રમ્યા બાદ તેમને આત્મવિશ્વાસ મળ્યો હતો અને ત્યારથી તેમની કારકિર્દીએ ગતિ પકડી હતી. તેમના મતે, આ ટુર્નામેન્ટ પણ યુવા ખેલાડીઓ માટે એવી જ તક બની શકે છે.

ઇન્ડિયા Aની ટીમ 20 નવેમ્બરે નેપાળ સામે પોતાની શરૂઆત કરશે. ત્યારબાદ 22 નવેમ્બરે પાકિસ્તાન શાહીન અને 24 નવેમ્બરે UAE સામે રમશે. હવે આ યુવા ખેલાડીઓ તિલકના વિશ્વાસને મેદાન પર કેટલો સાચો સાબિત કરે છે તેના પર સૌની નજર રહેશે.

આ પણ વાંચો: Shoaib Akhtarને લાગ્યું કે મેં બ્રાયન લારાને મારી નાખ્યા! 7 વર્ષ સુધી માફી માગવાની હિંમત ન થઈ