ભારતીય ક્રિકેટ ટીમના સ્ટાર બેટર અને ODI-ટેસ્ટ કેપ્ટન શુભમન ગિલ ન્યૂઝીલેન્ડમાં પ્રેક્ટિસ દરમિયાન એક ખાસ ડિવાઇસ પહેરેલો જોવા મળ્યો છે. ગિલના કપાળ પર દેખાયેલા આ ગેજેટે ક્રિકેટપ્રેમીઓનું ધ્યાન ખેંચ્યું છે. આ કોઈ સામાન્ય હેડબેન્ડ કે સ્માર્ટવૉચ નથી, પરંતુ ‘Temple’ નામનું એક અદ્યતન વેરેબલ ડિવાઇસ છે, જે મગજમાં લોહીના પ્રવાહ સાથે જોડાયેલા સંકેતો અને શારીરિક તણાવ વિશે માહિતી મેળવવા માટે બનાવવામાં આવ્યું છે. 29 ઑક્ટોબર, 2026ના રોજ ઑકલેન્ડમાં ભારતીય ટીમના પ્રેક્ટિસ સેશન દરમિયાન ગિલ આ ડિવાઇસ પહેરેલો જોવા મળ્યો હતો. આ ટેક્નોલોજી Zomatoના સહ-સ્થાપક દીપેન્દ્ર ગોયલ સાથે જોડાયેલી છે. ગિલ ઉપરાંત ભારતીય બેડમિન્ટન ખેલાડી પીવી સિંધુ પણ અગાઉ આ ડિવાઇસ પહેરેલી જોવા મળી હતી.
શું છે Temple ડિવાઇસ?
Temple એક વેરેબલ ટેક્નોલોજી ડિવાઇસ છે, જેને ખેલાડીઓના શારીરિક અને માનસિક વર્કલોડ વિશે વધુ માહિતી મેળવવા માટે વિકસાવવામાં આવી રહ્યું છે. સામાન્ય ફિટનેસ ટ્રેકર હૃદયના ધબકારા, ઊંઘ, પગલાં અને શારીરિક પ્રવૃત્તિ જેવી બાબતો પર ધ્યાન આપે છે. તેની સરખામણીએ Temple મગજમાં લોહીના પ્રવાહમાં થતા ફેરફારો સહિતના શારીરિક સંકેતોનું નિરીક્ષણ કરવાનો પ્રયાસ કરે છે. આ ડિવાઇસનો હેતુ ખેલાડી કસરત કે તાલીમ દરમિયાન કેટલો શારીરિક અને માનસિક તણાવ અનુભવે છે, તેની સમજ મેળવવામાં મદદ કરવાનો છે.
શું છે દીપેન્દ્ર ગોયલ સાથે તેનો સંબંધ?
Temple એક નાનું, માથાની બાજુએ કપાળના કાન પાસેના ભાગ પર લગાવવામાં આવતું વેરેબલ ડિવાઇસ છે. તેને Zomatoના સહ-સ્થાપક દીપેન્દ્ર ગોયલ સાથે જોડાયેલી ટેક્નોલોજી કંપની Temple Private Limited વિકસાવી રહી છે. ગોયલનો આ પ્રોજેક્ટ ફૂડ ડિલિવરી બિઝનેસથી અલગ છે અને તેનો હેતુ માનવ શરીર, મગજમાં લોહીના પ્રવાહ તથા વૃદ્ધત્વ સાથે જોડાયેલા શારીરિક ફેરફારોનો અભ્યાસ કરવાનો છે
ખેલાડીઓ માટે કેમ ઉપયોગી બની શકે?
આધુનિક ક્રિકેટમાં માત્ર બેટિંગ અને બોલિંગની પ્રેક્ટિસ પૂરતી નથી. ખેલાડીઓએ ઊંઘ, રિકવરી, તાલીમનો ભાર અને માનસિક એકાગ્રતા પર પણ ધ્યાન આપવું પડે છે. લાંબી ટૂર અને સતત મેચોના કાર્યક્રમમાં શરીર કેટલો થાક અનુભવે છે તે સમજવું ટીમ મેનેજમેન્ટ માટે મહત્વનું બની શકે છે. Temple જેવી ટેક્નોલોજી ભવિષ્યમાં ખેલાડીઓના શારીરિક સંકેતો વિશે વધારાની માહિતી આપી શકે છે. તેનાથી તાલીમની તીવ્રતા અને રિકવરી અંગે નિર્ણય લેવામાં મદદ મળવાની શક્યતા છે. જોકે, ગિલ આ ડિવાઇસમાંથી મળતી માહિતીનો પોતાની તાલીમમાં કેવી રીતે ઉપયોગ કરે છે, તે અંગે તેણે જાહેરમાં કોઈ વિગત આપી નથી.
ગિલ ન્યૂઝીલેન્ડ સામેની શ્રેણી માટે તૈયાર
ગિલ ન્યૂઝીલેન્ડ પ્રવાસમાં ભારતની ODI અને ટેસ્ટ ટીમનું નેતૃત્વ કરવાનો છે. પાંચ મેચની T20I શ્રેણી દરમિયાન ભારતીય ટીમે પ્રથમ ત્રણ મેચ જીતીને શ્રેણીમાં 3-0ની સરસાઈ મેળવી હતી. ગિલ T20I ટીમનો ભાગ ન હોવા છતાં ઑકલેન્ડમાં ટીમના પ્રેક્ટિસ સેશનમાં જોડાયો હતો. ભારત અને ન્યૂઝીલેન્ડ વચ્ચેની ODI શ્રેણી 4 નવેમ્બરથી શરૂ થવાની છે, જ્યારે બે ટેસ્ટ મેચની શ્રેણી 19 નવેમ્બરથી શરૂ થશે. ગિલના કપાળ પર દેખાયેલા આ ડિવાઇસને કારણે ક્રિકેટમાં નવી ટેક્નોલોજીના ઉપયોગ અંગે ચર્ચા શરૂ થઈ છે. હવે જોવાનું એ રહેશે કે Temple જેવી ટેક્નોલોજી ભવિષ્યમાં વધુ ખેલાડીઓની તાલીમ અને રિકવરીનો ભાગ બને છે કે નહીં.
આ પણ વાંચો: એકપણ છગ્ગા વગર 167 રન! બેન ડકેટે Sachin Tendulkarની યાદીમાં મેળવી ખાસ જગ્યા
